दृष्टिविहिन पढ्ने विद्यालयमा राजनीति, शिक्षक/ शिक्षिकाको आन्दोलन, नेवि संघको ताला, विद्यार्थीहरु भने आक्रोशित

धरान,साउन २५ । दृष्टिविहिन विद्यार्थीहरु पढ्ने धरान १५ स्थित पुर्वाञ्चल ज्ञान चक्षु विद्यालयमा प्रअ अवकाश हुने समय नजिकिएपछि राजनैतिक हस्तक्षेप एवं चलखेल बढेको छ । त्यही कार्यरत ६ जना शिक्षक एवं शिक्षिकाले प्रअको राजिनामा माग गर्दै पढाउन छोडेको घटना अन्ततः राजनीतिकरण हुन पुगेको छ ।
आन्दोलन शिक्षकहरुको माग पुरा नभएको भन्दै मंगलबार विदाको समय पारेर कांग्रेसको भातृसंगठन नेवि संघ क्षेत्रीय समितिले विद्यालयको प्रशासन र लेखा फाँटमा तालाबन्दी गरेको छ । आन्दोलनरत शिक्षकहरुको नेतृत्वमा ताला लगाउन आएको थाह पाएपछि दृष्टिविहिन विद्यार्थीहरुले विरोध गर्दै नाराबाजी गरेका थिए । पढाउन छोडेर राजनीति गरेको र विद्यालयमा बाहिरी हस्तक्षेप निम्त्याएर शैक्षिक वातावरण विगारेको भन्दै आन्दोलनरत शिक्षक, शिक्षिकाहरुप्रति विद्यार्थीहरु आक्रोशित छन् । यसअघि पनि आन्दोलनरत शिक्षक, शिक्षिकाहरुले ताला लगाएर धर्नामा बस्ने प्रयास गरेपनि विद्यार्थीहरुकै विरोधको कारण रोकिएको थियो । मंगलबार भने विदाको समयमा नेविसंघका कार्यकर्ताहरुले बिहान करिब ११ बजेतिर ताला लगाएको हो ।
प्रअ केशरी थापाले विभेद एवं अन्याय गरेको, विगतको सहमति कार्यान्वयन नगरेकोलगायत आरोप लगाउदै २ जना करारसहित ६ शिक्षक, शिक्षिकाहरु आन्दोलनमा छन् । साउन १० गते विद्यालयमा हाजिर गरेर हिडेका ती शिक्षक,शिक्षिकाहरु त्यसपछि पढाउन नआएको विद्यालय प्रशासनले जनाएको छ । प्रअ थापा मंसिर १७ गतेदेखि अवकाश हुनेछिन् । आन्दोलन गर्नेहरुमा करार शिक्षकद्धय प्रकाश कार्की र तुलसी तिम्सिना हुन् भने अन्यमा सुशिला थापा, डोल्मा योञ्जन, विद्या शाक्य र सीता कार्की छन् । करार शिक्षक कार्की पार्टटाइम शिक्षककोरुपमा प्रवेश पाएका थिए भने तिम्सिना परीक्षणकालमा रहेका शिक्षक हुन् । करार शिक्षक कार्कीलाई प्रक्रिया पुर्याएर नियुक्ती गर्ने प्रयास थालेपछि विवाद शुरु भएको थियो । उनकै नेतृत्वमा शिक्षक, शिक्षिका आन्दोलनमा छन् । उनी नेपाली कांग्रेस समर्थित शिक्षक हुन् । आन्दोलनरत शिक्षक, शिक्षिकाहरु जिल्ला शिक्षा कार्यालय र धरान उपमहानगरपालिकामा पनि धर्नामा बसेपनि माग पुरा नभए पछि राजनीतिक दलहरुसँग लविङ गरेका थिए ।

पुर्वमा यो एक मात्र दृृष्टिविहिन विद्यार्थी पढ्ने विद्यालय हो । भौतिक पुर्वाधार र शैक्षिक गुणस्तरले गर्दा यो विद्यालयलाई नेपालकै नमुना बिषेश विद्यालयकोरुपमा मानिन्छ । कक्षा १० मा अध्ययनरत विद्यार्थी मिङ्मा भोटेले विदाको समयमा बाहिरका मान्छेहरु ल्याएर जर्बजस्ती ताला लगाएको भन्दै आक्रोश पोखे । आफुहरुले ताला लगाउन नपाउने भनेर विरोध गर्दा फोटो र भिडियो खिचेर पनि लगेको उनले बताए । ‘हाम्रो शिक्षक, शिक्षिकाहरु पढाउन आउनुहुन्न, अहिले बाहिरका मान्छे ल्याएर जर्बजस्ती ताला लगाए,’ भोटेले भने,‘विद्यालयको आन्तरिक मामलामा बाहिरका मान्छे किन ल्याइयो ? सरमिसले नै हाम्रो स्कुलमा राजनीति घुसाए ।’ कक्षा १० का अर्का छात्र अमरदिप राईले पनि कक्षामा ढिलो आउने, फोनमा मात्र कुरा गर्ने शिक्षक, शिक्षिकाहरु आन्दोलन गरेर आफुहरुको पढाई र भविष्यमाथि खेलवाड गरेको भन्दै आक्रोश पोखे ।
नेवि संघले भने विद्यालयमा पठनपाठनको वातावरण नभएकोले गर्दा विद्यार्थीहरुको हकहितको लागि तालाबन्दी गरेको दाबी गरेको छ । संघका केन्द्रीय सदस्य सागर प्रसाईले प्रअ थापाले विद्यालयलाई राजनीतिको थलो बनाएको आरोप लगाउदै विद्याथी पढ्ने वातावरणको माग गर्दै ताला लगाएको बताए । ‘शिक्षकहरु आन्दोलनमा उत्रनुपर्ने वातावरण प्रशासनले बनायो, र पठनपाठनको वातावरण पनि छैन,’उनले भने,‘हामीले राजनीतिक हस्तक्षेप गरेका होइनौं, विद्यार्थीहरुकै हकहितको लागि हो । प्रअले नै विद्यार्थी, शिक्षकहरुमा गुटबन्दी गरेको हो ।’ जेठ २३ गते भएको शिक्षक, प्रशासनबीचको सहमति कार्यान्वयन हुनुपर्ने उनले बताए ।
आन्दोलनको नेतृत्व गरेका करार शिक्षक प्रकाश कार्कीले भने नेवि संघले तालाबन्दी गर्दा आफुहरु खुशी भएको प्रतिक्रिया दिए । जिल्ला शिक्षा, उपमहानगरपालिकामा न्याय माग गर्न जादा पनि सुनुवाई नभएको गुनासो गर्दै उनले भने,‘नेवि संघले ताला लगायो, हामी त खुशी छौं । अब चाडो समाधान होला ।’ नेविसंघलाई ताला लगाउन नउक्साएको जिकिर गरेपनि तालाबन्दी हुदा भने आफुहरु विद्यालयमा उपस्थित भएको उनले बताए । आफुहरुको कारण नभई प्रअ थापाको कारणले नै यो अवस्था सृर्जना भएको उनको भनाई थियो ।

 प्रअ थापा भने करार शिक्षक कार्की २०७० सालदेखि पार्टटाइम शिक्षककोरुपमा कार्यरत रहेको र रिक्त दरबन्दीमा प्रक्रिया पुर्याएर नियुक्ती प्रक्रिया अघि बढाउदा जुनियर शिक्षक भएर प्रअ बन्न नपाउने भएपछि अनेक आरोप लगाउदै आन्दोलन गर्न थालेको बताउँछिन् । तत्कालीन दृष्टिविहिन शिक्षक सानुमान ताम्राकारलाई विद्यालयले अवकाश दिएपछि कार्कीले पार्टटाइमकोरुपमा पढाउन थालेका थिए । शिक्षक ताम्राकार अवकाशविरुद्ध अदालत गएका थिए । अदालतले २०७३ मा फैसला गरेर उपदान दिनुपर्ने भएपछि उनको रिक्त दरबन्दीमा विद्यालयले पदपुर्तिको प्रक्रिया अघि बढाएको थियो । त्यसबाट असन्तुष्ट बनेका शिक्षक कार्की बिशेष विद्यालयमा त्यस्तो प्रक्रिया नभएको भन्दै विरोधमा उत्रिएका थिए । जबकी उनीभन्दा अघिका २ शिक्षक भुपाल खवास र तुलसी तिम्सिनालाई रिक्त दरबन्दीमा नयाँ प्रक्रियाबाट नै नियुक्ती गरिएको थियो । नयाँ प्रक्रियाबाट नियुक्ती गर्दा उनीहरुभन्दा जुनियर हुने र मंसिरमा खाली हुने प्रअ पद गुम्ने भएकोले कार्की विरोधमा उत्रिएको प्रशासनको भनाई छ । ‘विद्यालयले उहाँहरुलाई नपढाउ भनेको होइन, आफै कक्षा छोडेर गएपछि आएका छैनन् । आज विदाको दिन एक्कासी नेवि संघसँग आएर ताला लगाए,’ प्रअ थापाले भने,‘पहिला पनि विभिन्न जिल्लाबाट भुपु विद्यार्थी, संस्थाको मान्छेहरु ल्याएका थिए, तर यहीका विद्यार्थीहरुले नै विरोध गरेका थिए ।’