गोपाल मन्दिर र जग्गा हडपेको भन्दै विरोध
धरान । करिब आठ दशकअघि धरान १४ विजयपुर(सिंहदेवी मन्दिर मास्तिर)मा स्थापना भएको ‘गोपाल मन्दिर’को अस्तित्व मेटाएर धार्मिक माफियाहरुले अर्कै धार्मिक संस्थाको नाममा मन्दिर र जग्गा हडपेको भन्दै विरोध शुरु भएको छ । ऊँ शिवशक्ति कल्याणी केन्द्रको नाममा पुरानो गोपाल मन्दिरको अस्तित्व मेटाएर ‘बालगोपाल मन्दिर’ बनाएको र करिब ५ कट्टा १८ धुर जग्गासमेत हडपेको भन्दै विरोध शुरु भएको हो । केन्द्रले मन्दिर निर्माणस्थलमा बुधबारदेखि रामकथा नवाह पितृ उद्दार ज्ञान महायज्ञ शुरु गर्नुअघि नै जनसरोकार मञ्च नेपालको अगुवाईमा सिंहदेवी चोकमा धर्ना शुरु गरिएको हो । वि.स.१९९२ सालमा सिंहदेवी मन्दिर मास्तिर गोपाल मन्दिर स्थापना भएको इतिहास छ । तर, पछिल्लो समय धरान नगरपालिकाले गोपाल मन्दिरको जग्गा संरक्षण गर्न भन्दै केन्द्रलाई दिएको खुलेपछि विवाद शुरु भएको थियो । केन्द्रले मन्दिरको जग्गामा वृद्धाश्रम, सत्सङ हलसँगै नाम फेरेर बालगोपाल मन्दिर बनाइसकेको छ । एउटा मन्दिरको अस्तित्व नै लोप गराएर अर्कै धार्मिक संस्थाले जग्गा हडपेको भन्दै मञ्चको अगुवाईमा मंगलबारदेखि नै प्रवेशद्धारअघि(सिंहदेवी चोक)मा धर्ना शुरु भएको थियो ।
