पानीटंकी विवादमा नयाँ मोड, उपयुत्त विकल्प भेटिएको ईञ्जिनियरको ठहर,जग्गाधनी निःशुल्क दिन तयार
समितिको म्याद चैत २७ गते सकिएपनि आवश्यक काम तथा प्रतिवेदन बुझाउने काम बाँकी रहेको भन्दै बैशाख ३ गतेसम्मको लागि म्याद थप भएको हो । समितिमा रहेका उपमहानगरपालिका र संघर्ष समितिका प्रतिनिधिहरुबीच बुधबार बिहान भएको संयुक्त वैठकले बैशाख ३ गतेसम्मको लागि म्याद थप गरेको हो । ‘बैठकले समितिको म्याद ३ गतेसम्मलाई थपेका छौं, हामी उचित विकल्प खोजेर विवाद अन्त्य गर्न चाहन्छौं,’समितिका सदस्य अमर इजमले भने,‘विकल्प खोज्न समिति गठन भएको हो, हामी उचित विकल्पसहित विवादलाई समाधान गर्ने पक्षमा छौं ।’
करिब १० दिनअघि(चैत १६ गते) उपमहानगरपालिका र विजयपुर दरबार परिसर संरक्षण संघर्ष समितिबीच भएको वार्ताले १० सदस्यीय समिति गठन गरेको थियो । विवाद समाधान गर्न गठित समितिमा दुवैतर्फबाट ५÷५ जना सदस्य छन् । समितिका सदस्य एवं वडा नं १४ का अध्यक्ष कृष्ण भटराईले पनि संघर्ष समितिकोतर्फबाट प्राविधिक अध्ययनको काम बाँकी रहेको भनेपछि ३ गतेसम्मको लागि म्याद थपिएको खुलाए । ‘स्थलगत निरीक्षण, अध्ययनको काम बाँकी नै छ भनेपछि र प्रतिवेदन राम्रो आओस भनेर समय थपिएको हो,’उनले भने । संरक्षण गरिनुपर्ने ऐतिहासिक, पुरात्तात्विक दरबार क्षेत्रमा पानीटंकी बनाउन नहुने भन्दै संघर्ष समितिले विकल्प खोज्न माग गर्दै आएको थियो । चार किरात संस्थासँग उपमहानगरले २ कट्ठा क्षेत्रमा टंकी बनाएर संरक्षण गर्ने खाकासहित १८ बुँदे सहमति गरेको थियो । संघर्ष समितिले भने सहमतिमा टंकी निर्माण गर्ने बुँदाको विरोध गर्दै आएको छ ।
इञ्जिनियर सुब्बाका अनुसार उचित विकल्पकोरुपमा देखिएको स्वास्तिका गौरा मार्गको ठाउँको उचाई ६ सय ३५ मिटर रहेको छ । यो आयोजनाले निर्माण गर्न लागेको विजयपुर क्षेत्रको भन्दा करिब १० मिटर बढी उचाई हो । दुवै स्थानबाट नारायणपुर क्षेत्रलाई पानी वितरण गर्न सहज हुने भएकोले द्धन्द बढाउनुभन्दा जनप्रतिनिधिले ठोस निर्णय गर्नु उपयुक्त हुने उनको भनाई छ । ‘विजयपुर क्षेत्र सम्पदाकोरुपमा संरक्षण गर्नुपर्ने क्षेत्र हो, आयोजनाले साइट छनौट गर्ने बेलामा नै ध्यान पुर्याउनुपर्ने थियो । जे होस्, विकल्पमा ठाउँ छन्, द्धन्द बढाउनु भन्दा उचित निर्णय गरोस भन्ने चाहन्छु,’इञ्जिनियर सुब्बाले भने,‘फुस्रेमा बनिरहेको ट्रिटमेन्ट प्लान्टलाई सर्दु र खर्दुको इन्टेक एरियामा नै बनाएको भए पम्पिङ गरिरहनुपर्ने थिएन ।’ स्थलगत प्राविधिक अध्ययनमा विवाद समाधान समितिअन्र्तगत उपमहानगरका प्रतिनिधिहरुको भने उपस्थिति थिएन । समिति सदस्य एवं वडा १४ का अध्यक्ष भटराईले आफुहरुलाई जानकारी नै नगराएको कारण उपस्थित हुन नसकेको बताउछन् । ‘स्थलगत अध्ययनको लागि जानकारी गराए सहजीकरण गर्न आउछौं भनेका थियौं, तर मलाई खबर भएन,’उनले भने ।
.......................................................
निःशुल्क जग्गा दिन तयार छुः राई
विकल्पको खोजीमा स्थलगत अध्ययन गर्न पुगेको प्राविधिकसहितको टोलीलाई आफ्नो जग्गा रिबर्ज वेयरको लागि उपयुक्त थलो बन्छ भने आवश्यक २ कट्ठा जग्गा निःशुल्क दिने बताएका हुन् । स्थलगत अध्ययनमा गएको ईञ्जिनियर सुब्बाले राईको जग्गा रिजर्ब वेयर बनाउन उचित हुने प्रतिक्रिया दिएका थिए । यो ठाउँको उचाई ६ सय ३५ मिटर रहेको छ । ‘मेरो श्रीमति पञ्चमायाको नाममा जग्गा छ, प्राविधिकरुपमा ठिक छ भने चाहिने जग्गा दिन्छुँ । विवाद नहोस, विजयपुर क्षेत्रको संरक्षण पनि होस भनेर यो निर्णय गरेको हँु,’मोवाइल सम्पर्कमा राईले भने,‘मलाई पैसा चाहिएन, मेरो छोरानातीले पछि थाह पाउने गरि सिलालेख राखिदिए पुग्छ ।’
जग्गा दिन तत्पर हुने राई खानेपानीका अनुभवी प्राविधिक पनि हुन । उनी २ बर्षअघिसम्म खानेपानी संस्थान धरानमा कार्यरत थिए । उनी अवकाश भइसके पनि संस्थानले बेला बेला उनलाई समस्या हुदा बोलाउने गरेको छ । ‘म अवकाश भइसकेको छुँ, तर संस्थानले काम पर्दा बोलाउछ, म जान्छु,’उनले भने । टोलीले सोही क्षेत्रमा विकल्पकोरुपमा अघि सारिएको पुर्ण राईको जग्गा पनि स्थलगत अध्ययन गरेको थियो । त्यो जग्गा भन्दा मदन राईको उपयुक्त भएको प्राविधिकले बताएका थिए ।
Comments
Post a Comment