राष्ट्रपतिलाई अपमान गर्नेमाथि कारबाहीको माग
धरानका महिला अधिकारकर्मीहरुले विधवा भएकै कारण राष्ट्रप्रमुखजस्तो गरिमामय पदमा रहेकी महिलामाथि असभ्यता र दुव्र्यवहारको पराकाष्ठ प्रर्दशन गरेको भन्दै दोषीलाई कडा कानुनी कारबाहीको माग गरेका हुन् । एकल महिला समुहको नेतृत्वमा महिला सञ्जाल धरानलगायत अधिकारवादी संघसंगठनहरुले बुधबार इलाका प्रशासन कार्यालयमार्फत प्रधानमन्त्री कार्यालयमा ज्ञापनपत्र बुझाउदै कारबाहीका माग गरेका हुन् । उनीहरुले घटनाको छानबिन गर्न गठन गरेको समितिमा एक जना पनि महिला सहभागी नगराएकोमा रोष प्रकट गरेका छन् ।
यही पुष १ गते रामजानकी विवाह महोत्सवमा सहभागी हुने क्रममा राष्ट्रिपति भण्डारीमाथि आक्रमणको प्रयास भएको थियो भने भोलीपल्ट मधेशी मोर्चाका कार्यकर्ताहरुले गंगाजल छर्केर मन्दिर शुद्धि गरेका थिए । यो घटनाको सर्वत्र चर्को विरोध भइरहेको छ ।
नेपालको संविधानले सबै प्रकारका विभेदलाई संवैधानिक रुपले अन्त्य गरेको तथा महिला विरुद्धको भेदभाव उन्मुलन समबन्धी महासन्धीको धारा १ मा वैवाहिकताको विरुद्धमा भेदभाव अन्त्य पर्ने व्यवस्था भएपनि एकल महिलाको सामाजिक सांस्कृतिक तथा धार्मिक अधिकारमाथि भएको आक्रमणप्रति गम्भीर ध्यानाकर्षण भएको अधिकारकर्मी एवं एकल महिला समुहकी कार्यक्रम अधिकृत इन्द्रकला राईले बताइन् । समुहकी सदस्य उर्मिला प्रधानले पनि राष्ट्रप्रमुखमाथि भएको घटनाको निन्दा गर्दै दोषीलाई कारबाही गर्न माग गरिन् । ज्ञापनपत्र बुझाउनु अघि नेपाल पत्रकार महासंघको भवनमा राष्ट्रपति भण्डारीलाई जनकपुरमा गरिएको अपमानको विषयमा छलफल भएको थियो ।
Comments
Post a Comment