राजेन्द्र महतोको बीपी(धरान)मा उपचार

धरान । शनिबार विराटनगरको जोगवनी नाका ठप्प पार्न धर्नामा बस्दा प्रहरीसँगको झडपमा घाइते भएका सद्भावना पार्टीका अध्यक्ष राजेन्द्र महतो थप उपचारका लागि धरानस्थित बीपी कोइराला स्वास्थ्य विज्ञान प्रतिष्ठानमा भर्ना भएका छन् ।
विराटनगरको गोल्डेन अस्पतालमा उपचार गराइरहेका नेता महतो आइतबार मध्यराति एम्बुलेन्समा प्रतिष्ठान आएका थिए । मध्यरातमा आइसियुमा भर्ना गरेर उपचार गरिएका महतोको सोमबार बिहानदेखि पेइङ वार्डमा राखेर उपचार भइरहेको छ । स्वास्थ्य मन्त्री हुदा प्रतिष्ठानका सहकुलपतिसमेत रहेका महतोलाई प्रतिष्ठानका पदाधिकारीले उपचारको लागि धरान ल्याएको चर्चा चले पनि पदाधिकारीले भने नकारेका छन् ।
महतोको टाउको र हात, खुट्टामा चोटपटक लागेकोले न्युरो सर्जन र अर्थोपेडिक चिकित्सकको प्रत्यक्ष निगरानीमा उपचार भइरहेको छ । हाडजोर्नी विभागका सह प्राध्यापक एवं प्रतिष्ठानका डेपुटी निर्देशक पशुपति चौधरीको नेतृत्वमा उनको उपचार भइरहेको छ । चिकित्सक चौधरीका अनुसार महतोको स्वास्थ्यमा सुधार भइरहेको छ, र उनी खतरामुक्त छन् । उपचारको क्रममा महतोले चिकित्सकलाई रिगटा लागेको पनि बताएका थिए । ‘स्वास्थ्यमा सुधार भइरहेको छ, जीवन खतरा छैन’–चौधरीले भने–‘टाउकोसँगै हात र खुट्टामा चोट भएको र ब्लड प्रेसर, सुगरको मात्रा बढी देखिएकोले केही दिन अब्जरवेशनमा राख्नुपरेको हो ।’ महतोले सुगरको औषधी सेवन गरिरहेको भएपनि अहिले मात्रा बढेको देखिएको हो ।

चिकित्सक चौधरीका अनुसार महतोको टाउकोको छाला(स्काइभ)मा चोट लागेर रगत जमेको भएपनि भित्र ब्रेनमा चोट देखिएको छैन । यस्तै, देब्रे हातको साहिली औला थोरै क्र्याक देखिएको छ भने दाहिने खुट्टाको तीघ्रामा स सानो २ वटा घाउ छ । देब्रे खुट्टामा ४ सेन्टिमिटर जति घाउ छ । शरीरमा भएको चोट(घाउ)को ड्रेसिङ गरिरहनु पर्ने र सुगर, प्रेसरलाई पनि नियन्त्रणमा ल्याउनुपर्ने अवस्था भएकोले चिकित्सकको निगरानीमा उपचार गरिएको चौधरीले बताए । ‘हामीले व्यक्ति बिशेषलाई भर्ना गरेर राखेको होइनौं, यहाँ आउने जो कोही विरामीलाई उपचार गर्नुपर्ने हाम्रो कर्तव्य हो, उहाँको लागि पनि त्यही गरिरहेका छौं’–उनले भने–‘प्रेसर र सुगर बढी छ, टाउकोमा चोट लागेकोबेला बिशेष ख्याल गर्नुपर्छ ।’ प्रतिष्ठानका उपकुलपति डाक्टर बीपी दासले बाहिर हल्ला चलेजस्तो प्रतिष्ठानले गाडी पठाएर ल्याएको नभई घाइते महतो विराटनगरबाट आफै एम्बुलेन्समा आएको बताए । उनका अनुसार करिब राती १२ बजे महतो प्रतिष्ठानमा उपचारको लागि भर्ना भएका थिए । ‘उहाँ आफै एम्बुलेन्समा आउनु भएको हो, हामीले ल्याएका होइनौं’–उनले भने ।