क्यानभासमा ‘कर्ण मास्के’(फोटोफिचर)
धरान,फागुन १९ । सेतो कपाल, सेतै फ्रेन्चकट दाह्रीजुंगा अनि हसिलो अनुहार । उमेरको पछिल्लो कालखण्डमा सेतो कलरको मानक झै बनेका ती व्यक्ति हुन्, स्वर्गीय चित्रकार कर्ण मास्के ।करिब डेढ बर्षअघि मास्केको निधन भएपछि देशभरका कलाकारहरुले उनलाई प्रत्यक्ष देख्न र भेट्न पाएका छैनन् । तिनै मध्ये एक हुन्, धरानका अग्रज कलाकार प्रनोद दत्त । शनिबार बिहान धरानको घण्टाघरमा रंग र कुची लिएर क्यानभासअघि घोत्लिदा स्वर्गीय मास्केको मुहार झलझली याद आइरह्यो । ‘कलाप्रति एकदमै समर्पित व्यक्ति हुन्, आज चित्र बनाउदै गर्दा उहाँको खुब याद आयो,’दत्तले मास्केलाई सम्झदै भने,‘हामीलाई ए फलना यसो गर, उसो गर, राम्रो गर भन्दै कडा र ठाडो शैलीमा भन्नुहुन्थ्यो । शब्द कडा भएपनि मिठासपुर्ण हुन्थ्यो ।’
पोखराबाट २ महिला चित्रकारसहित आएको ८ जनाको कुची ग्रुप आइतबारदेखि धरानमा छ । शुक्रबार धरानका कलाकारहरुसँग विजयपुर क्षेत्रमा वाटरकलर ल्याण्डस्केप बनाएका उनीहरुले शनिबार थप इलाम, झापाका कलाकारहरुसँग मिसिएर स्वर्गीय कलाकार मास्केलाई सम्झिए । ‘हामी कलाकारहरुको अभिभावक जस्तो व्यक्तित्वलाई आफ्नो सृर्जनामार्फत सम्झन पाउदा ज्यादै खुशी छौं, देशको कलाकारलाई सबैले सम्झनु पर्छ, सम्मान दर्शाउनुपर्छ,’कुची ग्रुपका मनोज तामाङले भने । धरान घर भएका मास्के चित्रकलामा एक्रेलिक वाटर कलरमा पोख्त मानिन्थे । पुर्वमा रहेका नयाँ पुस्ताका लागि उनी प्रेरक व्यक्ति थिए । चित्रकारिताको प्रसंग उठ्दा उनको नाम छुट्दैन । आइतबार पोखरा र पुर्वका कलाकारहरुको टोली भेडेटारमा गएर ल्याण्डस्केप चित्र बनाउनेछन् भने सोमबार विमल स्मृति पुस्तकालयमा प्रर्दशनी गरिनेछ ।
Comments
Post a Comment