चित्रकलाको संगीतमय समापन

 धरान । कोठाको भित्ताभरि प्रकृति जोगाउन आग्रहसहितको आधुनिक शैलीका चित्र टाँगिएका छन् । कलाकार(चित्रकार)हरुको जमघट भएको कोठामा चार जना कलाकारहरु मादल, बाँसुरी, गिटार बोकेर अघिल्तिर बसे, अनि मिठो धुन निकाल्न थाले ।
संगीतको मिठो धुन निकाल्ने संगीतकर्मीहरु सबै चित्रकलामा सिद्धहस्त कलाकारहरु नै थिए । धराने युवा कलाकार सजन थापा मगरको ग्रिन हर्ट नाम दिइएको तीन दिने चित्रकला प्रर्दशनी समापन अघि युवा कलाकारहरुले चित्रसँग संगीतलाई फ्युजन गराए । जलवायु परिवर्तन र त्यसबाट हुने असरबारे जनचेतना फैलाउन आयोजित चित्रकला प्रर्दशनीलाई नौलो र प्रयोगात्मक बनाउन संगीतसँग फ्युजन गरिएको कलाकार मगरले बताए । ‘समापनलाई औपचारिक नगरि प्रयोगात्मक कार्यक्रम गरौं भनेर संगीतिक प्रस्तुती दिने प्रयास गरेका हौं’–उनले भने ।
कलाकार सजनले अफ्रिकन बाजा जिम्बे र मादल बजाएका थिए भने जीवन पौडलेले बाँसुरीबाट मिठो धुन निकालेका थिए । यस्तै, कलाकरद्धय दीपराज लिम्बू र सुमन श्रेष्ठले गीतार बजाएका थिए । उनीहरुले मिठो नेपाली लोकधुन बजाएर सबैलाई मुग्ध बनाए । ‘सजनको चित्रहरु पृष्ठभुमि लाग्यो, र संगीतलाई फ्युजन गरेर प्रयोग गरौं न भनेर नयाँ किसिमको कार्यक्रम गरेका हौं’–मुर्तिकलामासमेत सिद्धहस्त कलाकार जीवन पौडेलले भने ।
चित्रकलाका आफ्ना चेलाहरुले संगीतमा पनि पोख्त देखेपछि युमा फाइन आर्ट एकेडेमीका अध्यक्ष महेन्द्र राईको मुहारमा निक्कै चमक थियो । ‘यतिका बर्ष सँगै हिड्यौं, काम गर्यौं तर, संगीतमा पनि यतिको पोख्त छन् भन्ने थाह थिएन’–खुशी व्यक्त गर्दै उनले भने–‘रंग खेलाउदा खेलाउदै पनि संगीत सृर्जना पनि गर्न सक्ने रहेछन् ।’ कलाकारहरुको प्रस्तुती सुनिसकेपछि विजयपुर एफएमकी स्टेशन मेनेजर हिमाल राईले संगीतको मिठो धुनले चित्रकलालाई झनै सुन्दर बनाएको प्रतिक्रिया दिइन् । नेपाल ललितकला प्रज्ञाप्रतिष्ठानको हस्तकला विभागका प्रमुख एवं प्राज्ञ कर्ण मास्केले धरानमा प्रतिभाशाली युवा कलाकारहरु जन्माउन थालेको बताए ।
युमा फाइन आर्ट एकेडेमीको आयोजना तथा इडिएफ र सुनौलो पुस्तकालयको सहयोगमा कलाकार सजनको शुक्रबारदेखि तीन दिने एकल चित्रकला प्रर्दशनी भएको थियो । प्रर्दशनीमा २८ वटा चित्र र कलाकार मगरले नै बनाएका २ वटा मुर्ति पनि प्रर्दशनमा राखिएको छ । प्रर्दशनीको क्रममा संकलन भएको दुई हजार ८ सय ६० रुपैया धरान ४ छाताचोकस्थित पूर्नस्थापना गृह प्रमुख भिम राईलाई सहयोगस्वरुप हस्तान्तरण गरिएको थियो । यसअघि, उनले राजधानीमा आरोहण गुरुकुलको आयोजनामा कवि तथा कलाकारहरुको मुहार चित्र(पोट्रेट)को एकल चित्रकला प्रर्दशनी गरेका थिए । यसैगरि, मुकीमोनने अर्थात फलफुल काटेर गरिने कलाको पनि प्रर्दशनी पनि भइसकेको छ । स्कुल पढ्दादेखि नै चित्र बनाउने मगरले एक दशकअघि कलाकार बिक्रम श्रीसँग मुतिकला पनि सिकेका थिए । नाट्य अभिनयमा पनि पोख्त उनी करिब ५ बर्षअघिदेखि राजधानीमा आरोहण गुरुकुलमा अभिनय पनि सिकिरहेका छन् ।