‘दर्शकको माया नै मेरोलागि अवार्ड’

 धरान । गत शुक्रबार रिलिज भएको चलचित्र मौनकी नायिका नम्रता श्रेष्ठलाई फिल्म प्रर्वद्धनको लागि काठमाण्डौं जान हतारो थियो । हतारोको बीचमा पनि उनी मंंगलबार बिहान भानुचौकस्थित हंग्री आइ रेष्टो बारमा पुगिन् ।
त्यहाँ उनको प्रतिक्षामा तीन जना भाग्यमानी फ्यानहरु थिए । समयअभावको बीचमा पनि उनी आफ्ना फ्यानको माया पाउन र प्रत्यक्ष भलाकुसारी गर्न त्यहाँ पुगिन् । आफ्ना दर्शकबाट सही सल्लाह र सुझाव पाउने भएकोले हतारकोबीचमा पनि भेट गर्न पुगेको नायिका श्रेष्ठले बताइन् । ‘दर्शकले फिल्म हेरेका हुन्छन् र उहाँहरुसँग अन्र्तक्रिया हुदा राम्रो सल्लाह, सुझाव पाइन्छ, त्यसले कलाकारहरुलाई हौसला मिल्छ’–उनले भनिन्–‘प्रत्यक्ष कुराकानी हुदा उहाँहरुले इमान्दार भएर सल्लाह दिनुहुन्छ, दर्शकको माया नै मेरो लागि त्यो नै अवार्ड पाए सरह हो ।’
तीन जना फ्यानसँग भलाकुसारी र बिहानको खाना(लञ्ज) लिएपछि नायिका श्रेष्ठ मंगलबार नै काठमाण्डौं फर्किइन् । उनी भदौ २९ गतेदेखि चलचित्र नोभेम्बर रेनको छाँयांकनको लागि गृहनगर धरानमा थिइन् । फिल्म सुटिङको चटारोले धरान धेरै घुम्न नपाएपनि आफु जन्मिएको ठाउँमा सुटिङ गर्न पाउदा असाध्यै रमाइलो लागेको उनले सुनाइन् । ‘म जहाँ जन्मिएको थिएँ, त्यही ठाउँमा सुटिङ गर्न पाए, खुशी छँ’–उनले भनिन्–‘धरानेहरुको राम्रो सपोर्ट पायौं, फिल्मको टिम पनि राम्रो थियो ।’
साधना भवनस्थित हंग्री आइ रेष्टो बारले सोधेको प्रश्नको सही जवाफ एसएमएसबाट पठाएकामध्ये तीन जनालाई नायिका नम्रता श्रेष्ठसँग लञ्चको अवसर दिएका थिए । सही जवाफ पठाउने मध्येका धरान ५ की एलिसा श्रेष्ठ, धरान १३ की भुमिका श्रेष्ठ र धरान ११ का विजय राईले नायिकासँग भलाकुसारी र लञ्चको अवसर पाएका थिए । ‘सधै रिलमा मात्रै देखेको नायिकालाई रियल(प्रत्यक्ष) देख्न पायौं, एकदमै खुशी छौं’–विजयले भने । यस्तै, एलिसाकी आमा सुमन श्रेष्ठले पनि नेपालकी चर्चित नायिकासँग भेट्न, फोटो सेसन गर्न र सँगै खाना खादा खुशी लागेको बताइन् । छोरी एलिसाको परीक्षा परेकोले नायिकालाई भेट्न उनी आफै पुगेकी थिइन् । भुमिका पनि आफ्नै आँखा सामुन्ने चर्चित नायिकालाई देखेपछि चकित भएको बताइन् ।

धरान आएकी नायिकालाई आफ्नो फ्यानसँग भेट गराउने अवसर जुराइदिएको ह्ंग्री आइका सञ्चालक महेन्द्र प्रधानले बताए । साथै, धरानेहरुले अतिथिहरुलाई स्वागत सत्कार गर्न कुनै कसुर राख्दैन भन्ने सकारात्मक सन्देश दिन पनि यो कार्यक्रम आयोजना गरिएको उनले बताए । ‘नायिकालाई आफ्नो फ्यानसँग भेटाउने त छदैछ, पर्यटक र अतिथिहरुलाई धरानमा राम्रो स्वागत, सत्कार हुन्छ है भन्ने सकरात्मक सन्देश जाओस् भन्ने उद्देश्य हो’–उनले भने ।