बीपीको सर्जरी विभाग प्रमुखको कार्यकक्षमा ताला

धरान । अस्पताल प्रशासनको निर्देशन अटेर गरेर विरामीलाई परीक्षण गर्न निजी क्लिनिकतिर पठाउने बीपी कोइराला स्वास्थ्य विज्ञान प्रतिष्ठान


को सर्जरी विभाग प्रमुख सि.एस.अग्रवालको कार्यालयमा ताला लागेको छ ।
प्रतिष्ठानको कर्मचारी कल्याण समाजले बुधबार अग्रवालको कार्यालयसँगै उनले पेइङमा जाँच गर्ने कोठामा पनि ताला लगाउदै प्रवेश निषेध गरिएको जनाएको छ । यस्तै, डा.अग्रवाललाई कारबाहीस्वरुप समाजले दैनिक कार्यमा पनि प्रतिबन्ध लगाएको घोषणा गरेको छ । समाजका प्रतिनिधिहरु दन्तचिकित्सा शिक्षक कल्याण समाजको अध्यक्षसमेत रहेका डा.अग्रवालको कार्यकक्षमा ताला लगाउन पुग्दा उनी भने थिएनन् । उनी केही दिनदेखि विदा लिएर भारत गएको बुझिएको छ । समाजले दुई पटक अनुगमन गर्दा डा.अग्रवालले विरामीहरुलाई जाँच गर्न बाहिरका क्लिनिक एवं जाँच केन्द्रमा पठाएको भेटिएपछि समाजले असोज १५ गतेभित्र कारबाही गर्न अस्पताल प्रशासनलाई अल्टिमेटम दिएको थियो ।
अल्टिमेटमभित्र प्रशासनले कारबाही प्रक्रिया अघि नबढाएपछि समाज आफैले कारबाहीमा उत्रन बाध्य भएको महासचिव वेदुकाकुमारी पुलामीले बताइन् । ‘कर्मचारी कल्याण समाज र प्रतिष्ठान प्रशासनले पटक पटक अपिल, सचेतना गर्दा पनि विरामीहरुलाई प्रतिष्ठान बाहिर खोलिएको सेन्टरहरुमा पठाउन नछाडेपछि हामीले प्रशासनलाई कारबाहीको अल्टिमेटम दिएका थियौं’–महासचिव पुलामीले भनिन्–‘तरपनि, निजउपर कुनै कारबाही नभएकोले समाजको निर्णयअनुसार नै कार्यकक्षमा तालाबन्दी गरेर दैनिक कार्यमा र कार्यालय प्रवेशमा निषेध गरेका हौं ।’ डा.अग्रवाललाई निलम्बर गरेर उनले बाहिर पठाएको विरामीहरुको छानबीन गरि त्यसको दोब्बार रकम असुल गर्नुपर्ने र थप कडा प्रशासनिक एवं विभागीय कारबाही नगरेसम्म उनीमाथि भएको कारबाही फुकुवा नहुने उनले बताइन् ।
कमीशनको लोभमा समाजले गत भदौ १ गतेदेखि प्रतिष्ठानमा उपचारमा आएका विरामीलाई बाहिर स्वास्थ्य परीक्षण गर्न प्रतिबन्ध लगाएको घोषणा गरेको थियो । साउन ३१ गते र पुनः गत बिहिबार दोस्रो पटक अनुगमनको क्रममा डा.अग्रवालले विरामीलाई जाँच गर्न बाहिर पठाएको फेला परेपछि समाजले उनलाई कारबाही गर्न प्रतिष्ठानसँग माग गरेको थियो । समाजले डा.अग्रवाललाई तत्काल निलम्बन गरि भदौ १ गते यता कति विरामीलाई बाहिर स्वास्थ्य परीक्षण गर्न पठायो भनेर छानबीन गरेर दोब्बार रकम असुली गर्न प्रतिष्ठानसँग माग गरेको थियो । ‘यो कुनै एउटा चिकित्सकविरुद्धको एक्सन होइन, प्रतिष्ठानलाई आर्थिकरुपमा धारासायी बनाउन विरामीको जाँच बाहिर पठाउने कर्मचारी र चिकित्सक विरुद्धको कदम हो’–अध्यक्षका अध्यक्ष सुजेन्द्र गोले तामाङले भने–‘हामीले डा.अग्रवाललाई मात्रै निषेध गरेका हौं, सबै उपचार सेवा सुचारु नै रहन्छ ।’
प्रतिष्ठानका उपकुलपति प्रा.डा.बीपी दासले तालाबन्दीले द्धन्द निम्त्याउने भन्दै यसलाई छलफलको माध्यमबाट समाधान गरिनुपर्ने प्रतिक्रिया दिए । समाजको अल्टिमेटमबारे अनभिज्ञता प्रकट गर्दै उनले प्रतिष्ठान पनि विरामीको जाँचहरु बाहिर पठाउन पुर्णरुपमा प्रतिबन्ध लगाउन प्रयासरत रहेको उनले बताए । ‘हाम्रो नीति पनि यहाँबाट जाँचहरु बाहिर जानै नदिने भन्ने हो, अहिले धेरै हदसम्म यो क्रम रोकिएको छ’–उपकुलपति दासले भने–‘दुवै पक्षको कुरा सुन्नुपर्छ, यसबारेमा समाजसँग छलफल गछौं ।’ यस्तै, अस्पताल निर्देशक डा.अरविन्द सिन्हाले जाँचहरु बाहिर पठाएको भन्ने बिषयमा अन्तरिकरुपमा अनुगमन र छानबीन भइरहेको दाबी गरे । कोही विरामीले डाक्टरले बाहिर जाँच गर्न पठाएको बारेमा लिखितरुपमा उजुरी दिएमा कारबाही गर्ने उनको भनाई थियो ।
कमिशनको लोभमा चिकित्सकहरुले विरामी जाँच गर्न अन्यत्र पठाउदा प्रतिष्ठानको आम्दानी बाहिरिएको र आर्थिकरुपमा धरासायी बन्दै गएको समाजको भनाई छ । प्रतिष्ठानमा सम्पूर्ण ल्याव टेष्ट, इको, इन्डोस्कोपी, सि.टि.स्क्यान, अल्ट्रासाउण्ड तथा एक्स रेलगायत सेवाहरु उपलब्ध भएपनि चिकित्सकहरुले विभिन्न वहानामा विरामीहरुलाई अन्यत्र जाँचको लागि पठाउने गरेका छन् । बीपी नजिकै विभिन्न सेन्टरहरु खुलेका छन् । ती सेन्टरहरुमा विरामी जाँचमा पठाएवापत चिकित्सकहरुले एकमुष्ट कमिशन पाउने गरेका छन् । अस्पतालले विरामीको सुविधाको लागि केही महिनाअघिदेखि ल्याबको समय तालिका पनि विस्तार गरिसकेको छ भने बिहान ११ बजेसम्मको सेम्पल कलेक्सनको रिपोर्ट त्यही दिन बेलुकासम्म दिने व्यवस्था गरेको छ । पहिला दिउँसो १ बजेपछि २ बजेसम्म ल्याब वन्द हुने गरेपनि अचेल त्यो समयमा पनि सेवा दिइन्छ भने साँझ ८ बजेसम्म ल्याब खुल्लै रहन्छ । ल्याबमा परीक्षण हुने रगत, खकार, दिसा, पिसाब र एक्सरेलगायतको परीक्षणहरु बिहान एघार बजेसम्म बुझएकोमा त्यसैदिन बेलुकासम्म उपलब्ध हुन्छ ।