भुकम्पबाट बचेका दिदी-भाईलाई मदरहुडले पढाउने जिम्मा लियो

धरान । दुई साताअघिको महाभुकम्पमा आफ्ना भाई र बाहिनी बचाउन सफल कालिका गाविस ९, सिन्धुपाल्चोककी ७ बर्षीय सुजिता पहरी र उनको भाईलाई ललितपुरको एक संस्थाले पढाउने जिम्मा लिएको छ । ललितपुरको हात्तिवनस्थित मदरहुड केयर नेपालले सुजिता र उनको ६ बर्षीय भाई सुजनलाई कक्षा १२ सम्म पढाउने जिम्मा लिएको हो । दुवै बच्चा हाल उक्त संस्थामा पुगिसकेका छन् ।
बैशाख १२ गतेको महाभुकम्पमा सुजिताले भाई र बहिनी बचाएको समाचार प्रकाशित भएपछि मदरहुडका कर्मचारी उनीहरुको घरमै पुगेका थिए । संस्थाको प्रस्ताव अभिभावकले स्वीकार गरेपछि बुबा सम्मरबहादुरसहित सुजिता र सुजन आइतबार ललितपुरस्थित संस्थामा गएका थिए । ‘हामी पढाईदिन्छौं, के गर्नुहुन्छ भन्दै संस्थाका मान्छे आए । मैले नै हुन्छ भनेर बुबासँगै दुई जना नानीलाई पठाइदिएको छु । उनीहरुको भविष्य राम्रो बन्छ जस्तो लाग्यो’–आमा सम्झना पहरीले फोन सम्पर्कमा भनिन् ।
आमा सम्झनाका अनुसार ६ बर्षीय सुजन स्कुल गएकै थिएनन् भने ठुली छोरी सुजितालाई कक्षा एकमा भर्ना गरेपनि पुरा गर्न पाइनन् । सानो भाई बहिनी हेरचाह गर्नुपर्ने भएकोले सुजिताको पढाई छुटेको थियो । आमा बुबा काममा जाने भएकोले दिउँसो सुजिताले ६ बर्षीय सुजन, ४ बर्षीय सुदिप र एक बर्षीय बहिनी सुनितालाई घरमा रेखदेख गर्दै बस्नुपथ्र्यो । बैशाख १२ गतेको महाभुकम्प आउदा पनि यी चारै जना घरभित्र खेलिरहेका थिए । भुकम्पले जमिन हल्लिन र घरको माटो खस्न थालेपछि सुजिताले काखे बहिनी र ६ बर्षका सुजनलाई च्यापेर घरबाहिर निस्किइन् । बाहिर आउ भन्दै चिच्याए पनि ४ बर्षीय सुदिपले कुनै भेउ नपाउदा घर भत्किएर ज्यान गयो । भुकम्पले जमिन हल्लाएको चाल पाउनुबित्तिकै भाई र बहिनीसँगै नबाहिरिएको भए चारै जना पुरिने थिए । गाउँकै मिलमा काम गर्ने बुबा सम्मरबहादर घरमा थिएनन् भने आमा सम्झना पनि घाँस काट्न गएकी थिइन् ।

भाई बहिनी बचाउने बालिकाबारे समाचार पढेपछि सोधीखोजी गर्दै गाउँमा पुगेर कक्षा १२ सम्म पढाइदिने प्रस्ताव गर्दा आमाबुबा खुशी भएको संस्थाका अध्यक्ष बिक्रम लिम्बूले बताए । ‘सुजिताको बहादुरीपनबाट प्रभावित भयौं, परिवार ज्यादै गरिब रहेछन्, भुकम्पले झनै पीडित बनाएको छ’–अध्यक्ष लिम्बूले भने–‘आमा बुबाकै इच्छा र स्वीकृतिमा दिदीभाईलाई पढाउन ल्याएका छौं, उनीहरुको बुबा पनि संस्थामा आएर सबै बुझेर फर्किनुभएको छ ।’