धराने युवाहरु जस्तापाता लिएर ओखलढुंगा जादै

धरान । बैशाख १२ गते गएको महाभुकम्प र त्यसपछिको पराकम्पनबाट घरबारविहिन भएका पीडितहरुलाई राहत वितरणमा सक्रिय धराने युवाहरुको टिम सभे नेपाल, धरान ठिक एक महिनापछि पुनः राहत लिएर पूर्वको ओखलढुंगा जाने भएको छ । युवाहरुको टिमले अस्थायी घर(टहरा) निर्माणको लागि आवश्यक जस्ता पाता लिएर मंगलबार(जेठ १२ गते) बिहानै ओखलढुंगातर्फ प्रस्थान गर्ने जानकारी दिएका छन् ।
ओखलढुंगाको प्राप्चा गाविस ८ र ९ वडाका भुकम्प पीडितहरुलाई ती जस्तापाता वितरण गरिने सेभ नेपालका संयोजक योगेन राईले जानकारी दिए । उनका अनुसार प्राप्ता गाविसको वडा ८ र ९ का ४५ जना घर परिवार भुकम्प पछि पहिरोको त्रासमा भएकाले पुर्नबास गर्नुपर्ने अवस्था छ । ती घर परिवारले अन्यत्र सुरक्षित स्थानमा पुर्नबास गराउन जिल्ला दैवि प्रकोप उद्दार समितिलाई लिखित निवेदन पनि दिइसकेका छन् । ‘प्राप्चाको दुई वटा वडाका ४५ घरपरिवारलाई अन्यत्र पुर्नबास गराउनुपर्ने अवस्था रहेछ, उहाँहरुलाई नै अस्थायी टहरा बनाउन भएपनि सहयोग पुगोस् भनेर जस्तापाता लिएर जादैछौं’–संयोजक राईले भने ।
युवाहरुको टिमले ५२ वण्डल जस्ता पाता लिएर ओखलढुंगा जादैछन् । यसबाहेक १०५ थान म्याट र केही थान ब्लांकेट पनि साथमा रहेको युवाहरुले बताएका छन् । सामाग्री हस्तान्तरण गर्न राजेश लिम्बूको नेतृत्वमा ९ जना युवाहरुको टोली ओखलढुंगा जानेछ । टोलीले प्राप्चा गाविसका सम्न्धित पीडितहरुलाई नै सामाग्री हस्तन्तरण गर्ने टिम लिडर लिम्बूले बताए । ‘हामी सकेसम्म पीडितहरु बसेको स्थानमा नै पुर्याउनेछौं, त्यहासम्म पुग्न नसकेपनि पीडितहरुकै हातमा जिम्मा दिनेछौं’–उनले भने ।

सेभ नेपालको टिमले यसअघि पनि सबैभन्दा बढी धनजनको क्षति भएको सिन्धुपाल्चोक जिल्लाको विभिन्न गाउँमा दुई चरणमा गएर राहत सामग्री वितरण गरेको थियो । त्यतिबेला युवाहरुले आफै सामग्री बोकेर पीडितहरुकै घर घरमा त्रिपाल, म्याट, चाउचाउ, चिउरालगायत सामग्री पुर्याएका थिए । रोयल इष्टर्न इन्फिल्डर्स, साइक्लिङ, प्याराग्लाइडिङलगायत विभिन्न क्षेत्रका युवाहरु टिममा संलग्न छन् । पहिलो र दोस्रो चरणमा विभिन्न व्यक्तिहरुबाट सहयोग स्वरुप प्राप्त रकमले पुनः जस्तापाता लैजान लागिएको हो । यो टिमलाई इटहरी निवासी साधना लिम्बूको पहलमा विदेशबाट प्राप्त एक लाख ५० हजार बराबरको पनि थप सहयोग प्राप्त भएको छ । सिन्धुपाल्चोक पनि गएकी उनी यसपाली ओखलढुंगा पनि जादैछिन् । उनका अनुसार युके क्यामडेन टाउन टिम श्री सिदार्थमार्फत डेढ लाख रुपैया सहयोग भएको छ भने केन्ट वर्ड, युके(लिला लिम्बू), नरेन्द्र चौधरी(युके) र लुमा खर्चुङ(अमेरिका)बाट पनि सहयोग भएको छ ।