सशस्त्रका इन्स्पेक्टर र एमालेको डनबीचको झगडाले जनतालाई सास्ती

धरान । नाइट क्लबमा मदिरा पिएर आपसमा झगडा गर्ने सशस्त्र प्रहरीका प्रहरी निरीक्षक र एमालेको भातृ संगठन युवा संघका जिल्ला सदस्य समातिदा शनिबार धरान बन्द भएको छ ।
शुक्रबार राती करिब ९ बजे धरान १३, जिरो प्वान्टस्थित ओ टु नाइट क्लबमा मातेर झगडा गर्ने सशस्त्र प्रहरी निरीक्षक विजय हमाल र युवा संघका जिल्ला सदस्य आविष्कार लिम्बू राती नै पक्राउ परेका थिए । पक्राउ परेका जिल्ला सदस्य लिम्बूलाई छाड्न दबाब दिएपनि प्रहरीले नछोडेपछि युवा संघले दिउँसो ४ बजेदेखि ६ बजेसम्म धरानमा यातायात ठप्प पार्यो । उनलाई आइतबार बिहान १० बजेसम्म नछोडे सशक्त आन्दोलन गर्ने चेतावनी दिएको छ । दबाब आउने संकेत मिलेपछि सशस्त्र प्रहरी निरीक्षक हमाल र लिम्बुलाई इलाका प्रहरी कार्यालय धरानले शनिबार बिहानै इनरुवास्थित जिल्ला प्रहरी कार्यालय सुनसरीमा पठाएको थियो । सशस्त्र प्रहरी निरीक्षक हमाल सुनसरीको लौकहीमा कार्यरत थिए । ओटुका साझेदारसमेत रहेका युवा संघका जिल्ला सदस्य लिम्बू धरानमा डनको छवि बनाएका छन् । उनी गुण्डागर्दी र अपहरण काण्डमा पनि संलग्न हुने गरेको आरोप छ ।
इलाका प्रहरी कार्यालय धरानका डिएसपी टेकबहादुर तामाङका अनुसार झगडा भएपछि आविष्कार लिम्बूले सशस्त्र प्रहरी निरीक्षक हमालको पेस्तोल खोजेका थिए । सो घटनालगत्तै प्रहरीले दुवैलाई पक्राउ गरेको थियो । डिएसपी तामाङका अनुसार दुवै जना मातेको अवस्थामा थिए । सशस्त्र प्रहरी निरीक्षक हमाललाई आन्तरिक कार्वाही पनि शुरुवात भइसकेको उनले जानकारी दिए । ‘विवाद भएपछि इन्पेक्टरको हतियार पनि खोसिएको रहेछ, हामीले दुवैलाई राती नै समातेर बिहान जिल्ला पठाइदिएका छौं’–डिएसपी तामाङले भने–‘आन्तरिक कारबाही शुरु भइसकेको जानकारी पाएको छुँ ।’ डिएसपी तामाङले आन्तरिक कारबाही भएको बताएपनि सशस्त्र प्रहरीका जिल्ला प्रमुख एवं एसपी कृष्णकान्त पाठकले भने घटनाबारे केही बताउन चाहेनन् । ‘मलाई केही थाह छैन, म विदामा छुँ’–उनले भने । जिल्ला प्रहरी कार्यालयका प्रमुख एवं एसपी गणेश थापाले भने घटनामा अनुसन्धान भइरहेको बताए । उनका अनुसार हमाललाई सशस्त्र प्रहरी क्याम्पको हिरासतमा र लिम्बुलाई जिल्ला प्रहरीको हिरासतमा राखिएको छ । ‘अनुसन्धान भइरहेको छ, विभागीय कारबाही त भइ नै हाल्छ’–एसपी थापाले भने ।
स्रोतका अनुसार शुक्रबार राती एक जना सिपाहीसहित सशस्त्र प्रहरी निरीक्षक हमाल ओटु पुगेका थिए । उनको बिल ९ सय उठेको थियो । तर, आफुसँग ५ सय मात्रै भएको बताएपछि विवाद शुरु भएको थियो । विवादकै क्रममा आविष्कार र हमालबीच झगडा शुरु भयो । त्यसैक्रममा हमालले झोलामा बोकेको पेस्तोल पनि खोसाखोस भएको थियो । झगडा शुरु भएपछि हमालको सिपाही भने भागेका थिए । धरानस्थित सशस्त्रको टोली आएपछि आविष्कारका युवाहरुबीच केहीबेर हानाहान भएको स्रोतको भनाई छ । घटनाबारे जानकारी पाएपछि इलाका प्रहरी कार्यालयको टोलीले दुवैलाई पक्राउ गरेको थियो ।
एमाले  र युवा संघले भने अन्य तीन जना सशस्त्र प्रहरी र दुई जना युवतीसहित हमाल ओटु पुगेको र नशाको सुरमा हतियार प्रर्दशन गर्न खोजेपछि रोक्न खोज्दा सञ्चालकसमेत रहेका लिम्बुलाई प्रहरीले पक्राउ गरेको भन्दै विरोध जनाएको छ । युवा संघको केन्द्रीय सदस्य एवं जिल्ला इञ्चार्ज ज्ञानदिप लिम्बू, १ नम्बर क्षेत्रीय कमिटि अध्यक्ष विनोद राई र नगर कमिटि अध्यक्ष राजेन्द्र राईले निकालेको संयुक्त विज्ञप्तीमा सशस्त्र प्रहरी निरीक्षक हमालले बाहिरै मादक पदार्थ सेवन गरेर आएको र आफ्नो आचरणविपरीत युवतीहरुसँग रेष्टुरेष्टमा नाचगान गरेको, हतियार बोकेर हिडेको दाबी गरेका छन् ।