सुटिङ रिपोर्ट : आर्यन अस्पताल भर्ना

धरान । अस्पतालको बेडमा एक युवक सुतिरहेका हुन्छन् । विरामी कुरुवा बसेका दुई युवती पनि दायाँ बाया बेडमा अडेस लागेर निदाइरहेका हुन्छन् ।
हावाको झोकाले झ्यालको पर्दा हल्लाएपछि युवकको आँखा खुल्छ । बाहिर पानी परिरहेको छ, उनी भावुक हुन्छन् । दुई युवतीले थाह नपाउने गरि विस्तारै उठ्छन्, स्लाइन चढाएको पाइप थुत्छन् र अस्पतालको बेडबाट बाहिरिन्छन् । युवक बाहिरिएको केही क्षणपछि एक युवती उठ्छिन् । वेडमा विरामी नदेखेपछि अत्तालिदै खोज्छिन् र उनी पनि कोठाबाट बाहिरिन्छिन् ।
यो दृष्य बिहिबार बीपी कोइराला स्वास्थ्य विज्ञान प्रतिष्ठानको हो । अस्पतालको वेड साँच्चैको भएपनि विरामी र कुरुवा भने वास्तविक होइन । चार दिनयता धरानमा सुटिङ भइरहेको चलचित्र ‘नोभेम्बर रेन’ को दृष्य हो यो । निलो गाउन लगाएर वेडमा सुत्ने युवक चर्चित नायक आर्यन सिग्देल हुन् भने कुरुवा युवतीद्धय नायिका नम्रता श्रेष्ठ र नवनायिका छुल्टिम गुरुङ हुन् ।
चलचित्रका निर्देशक दिनेश राउतका अनुसार प्रि क्लाइमेक्स दृष्यको सुटिङ भइरहेको हो । ‘नायक आयुष(आर्यन) बर्षा हुदा रम्ने स्वाभावका हुन्छन्, त्यसैले अस्पतालमा भर्ना हुदा पनि उनी बेडबाट बाहिर जान खोजेको दृष्य हो यो’–निर्देशक राउतले छाँयाकन भइरहेको दृष्यबारे प्रष्ट्याए । तर, उनले नायक के भएर अस्पताल भर्ना भएका हुन्छन् भन्ने चाँहि खुलाएनन् । ‘दुवै नायिका बच्चैदेखिका साथी हुन्छन्, त्यसैले नायकलाई अस्पतालमा कुर्न आएका हुन्छन्’–उनले यति मात्रै भने ।
निर्मातासमेत रहेको नायक आर्यनका अनुसार फिल्मको कथा अस्पतालबाटै शुरु हुने र अधिकांश कथा अस्पतालकै सेरोफेरोमा भएकोले पनि बीपी प्रतिष्ठानमा छाँयांकन गर्नुपरेको हो । नायक आर्यन अनुसार नायिका सितल(नम्रता) अस्पतालमै इन्र्टन गरिरहेका हुन्छिन् र उनी पनि विरामी भएर त्यही अस्पतालमा भर्ना हुन्छन् । अर्की नायिका पनि अस्पतालमा आइरहनुपर्ने संयोग हुन्छ । ‘दुवै जनाले मलाई माया गर्छन, र म पनि दुवैजनालाई माया गर्छु’–नायक आर्यनले भने–‘हामी ३ बीचमा सामिप्यता छ, त्यसैले उनीहरु मेरो पीडामा साथ दिन अस्पताल आउछन् ।’ फिल्म प्रेमकथामा आधारित र दुई जना हिरोइन भएपनि त्रिकोणात्मक प्रेम कथा भने नभएको उनले दाबी गरे ।
नायिका सितल(नम्रता)ले आफ्नो जन्मस्थानमा सुटिङ गर्न पाउदा खुशी लागेको बताइन् । उनी २७ बर्षअघि तत्कालीन घोपा क्याम्प(हाल बीपी प्रतिष्ठान)मा जन्मिएकी थिइन् । यो चलचित्रमा पनि उनी यही जन्मिएको दृष्य छ । ‘आफ्नो जन्मस्थानमा आएर सुटिङ गर्न पाउदा रमाइलो लागिरहेको छ’–उनले भनिन् । यसअघि उनले धरानमा म्युजिक भिडियो सुटिङ गरेपनि चलचित्रको भने भएको थिएन । आगामी भ्यालेन्टाइन डे(१४ फेब्रुअरी)मा रिलिज गर्ने घोषणा गरिएको चलचित्र ‘नोभेम्बर रेन’को भदौ ३० गतेदेखि धरानमा छाँयांकन शुरु गरिएको थियो ।
करिब चार बर्षको अन्तरालपछि आर्यन र नम्रता एकसाथ यो चलचित्रमा अभिनय गर्दैछन् । यसअघि आर्यन र नम्रताले मेरो एउटा साथी छ मा सँगै अभिनय गरेका थिए । नायिका छुल्टिमको यो डेब्यु चलचित्र हो । चलचित्रमा आर्यन सिग्देल, नम्रता श्रेष्ठ, केशव भटराई, छुल्टिम गुरुङ, हिउवाला गौतम, अल्पना कर्मचार्य, अमितेश शाह, शिशिर राना, महेश त्रिपाठी, अर्जुन खड्कालगायतको अभिनय छ । चलचित्रको निर्माता सुवास गिरी, कार्यकारी निर्मातामा कमल गिरी छन् भने लेखन चेतन गुरुङ, संगीत ताराप्रकाश लिम्बू, द्धन्द हिमाल केसीको रहेको छ ।