तक्मे बुढा मावली(धरान) आए, अनि हसाएर गए

धरान । ‘म त बडि बिल्डिङ होइन, भुडिबिल्डिङ गर्न लागेको छुँ’–चर्चित हाँस्य कलाकार तक्मे बुढाले पेट छाम्दै यसो भन्दा शनिबार सभागृह हासोले गुञ्जायमान बन्यो ।
पूर्वाञ्चलव्यापी प्रथम मिस्टर मस्कुलर शारीरिक सुगठन प्रतियोगितालाई शनिबार तक्मे बुढाले हासोमय बनाइदिए । धरान उनको मावली पनि रहेछ । पटक पटक उनले धरान मेरो मावली हो भनेर उल्लेख गरिरहे ।
तक्मे बुढाको भुमिका सकेपछि केही बेरमा आफ्नै रुप(विल्सन बिक्रम राई)मा नातीको भुमिकामा उनी स्टेजमा देखा परे । दुवै रुपमा उनले दर्शकलाई पेट मिचिमिचि हाँस्न बाध्य तुल्याए । शारीरिक सुगठन प्रतियोगितामा तक्मे बुढा पनि आउने भएपछि सभागृह खचाखच भरिएको थियो । तम्मे बुढाको हरेक बोलीमा नहास्ने कोही थिएनन् । ‘अरु सिक्स प्याक बनाउछन्, मेरो चाहि फेमिली प्याक जस्तो पो हुदैछ’–तक्मेले हसाउदै भने ।

कार्यक्रममा तक्मे बुढाले हास्य कलामार्फत ब्यङ्ग्य गर्न भने कसैलाई बाँकी छोडेनन् । प्रतियोगिताका मुख्य निर्णायक रहेका पुष्प श्रेष्ठलाई पनि निशाना बनाए । ‘जजको काम सकेर घरमा गएछन्, बुहारीले थालमा भात दिदा त अप पो भनेछ’–कलाकारसमेत रहेका श्रेष्ठबारे हसाँउदै तक्मेले भने–‘बुहारी रिसाएर हैरान ।’
धरानको ट्राफिक समस्याबारे पनि तक्मेले ब्यङ्ग्यात्मक हास्य प्रस्तुती दिए र युवाहरुलाई सन्देश पनि दिए । ‘ठुला ठुला इञ्जिनियर त यहाँ पो रैछ बा, कम्पनीले बाइक बनाएर पठाउछ, यहाँका केटाहरुले चाक ठाडो हुनेगरि फेरि अर्कै बनाइदिन्छ’–तक्मेले भने–‘हेल्मेट टाउकोको सुरक्षाको लागि हो, तर धरानमा त पाखुरामा पो लगाएर हिड्छन् ।’ जाँडरक्सी खाएर बिग्रनु भन्दा युवाहरुले शारीरिक व्यायाम गर्नु राम्रो भन्दै उनले सही बाटोमा हिड्न आग्रह पनि गरेका थिए । ‘जाडरक्सीले बिग्रनुभन्दा एक्सरसाइज गर्नु, राम्रो काममा लाग्नु । आफ्नो ठाउँ, देश बनाउनु र जीउ पनि बनाउनु है’–उनले भने ।

तक्मे बुढाको प्रस्तुतीपछि केहीबेरमा नाती भन्दै विल्सन बिक्रम राईको स्वरुपमा स्जेटमा झुल्किएका थिए । त्यसबेला उनले प्रमुख अतिथि रहेका कोशीअञ्चल प्रहरी कार्यालयका प्रमुख एसएसपी यादवराज खनालको अघि सिपाही बन्दै तनक्क तन्किएर उभिए, तर हातले सलाम गरेनन् । ‘सरले क्याप लगाउनु भएको छैन र, कुम मात्रै उठाएको हुँ, मलाई त त्यति थाह छ नि । म पनि संकटकालको भगौडा पुलिस हुँ नि’–विल्सनले भने–‘त्यतिबेला भागेको अहिलेसम्म भागेको भागेकै छु, समात्नै सकेको छैन ।’ टेलिसिरियल मेरी बास्सैबाट तक्मे बुढाको अभिनयले चर्चामा आएका विल्सनले प्रस्तुतीको अन्त्य भने आर्कषक नृत्यबाट गरेका थिए । उनले मखमली पछ्यौरीले सानु...मुहार छोपेको...बोलको गीतमा महिला र पुरुष दुवैको सुन्दरढंगले नृत्य प्रस्तुत गरेका थिए ।