नेवि कपको उपाधि धरान सिटि कलेजलाई

धरान । साविक विजेता विरेन्द्र मेमोरियल कलेजलाई निराश बनाउदै धरान सिटि कलेजले तेस्रो धरान अन्तर कलेज फुटबल प्रतियोगिता(नेबि कप) को उपाधि जितेको छ ।
धरान १६ स्थित भगवती माविको मैदानमा शुक्रबार सम्पन्न फाइनलमा सिटि कलेजले साविक विजेता विरेन्द्रलाई २–० ले पराजित गर्दै उपाधि उचालेको हो । सिटिको जितको लागि दुवै गोल शशीचन्द्र राईले गरे । उनले पहिलो हाफको ८ औं मिनेटमा र दोस्रो हाफको २५ औं मिनेटमा गोल गर्दै टिमको जित पक्का गरेका थिए । उनी फाइनल खलेका म्यान अफ दि म्याच पनि घोषित भए । जितसँगै सिटि कलेजले नगद १५ हजार र विजेताको ट्रफी हात उचाल्यो भने विरेन्द्रले नगद १० हजार र उपविजेता ट्रफीमै चित्त बुझायो ।
प्रतियोगिताको उत्कृष्ट खेलाडीमा सिटि कलेजका सौजन राई घोषित भ एभने उत्केष्ट फरवर्डमा सिटिकै शशीचन्द्र राई, उत्कृष्ट गोलकिपरमा सिटिका इश्वर बस्नेत, उत्कृष्ट मिडफिल्डरमा विरेन्द्र मेमोरियलका युङसबा चेम्जोङ, उत्कृष्ट रक्षकमा दिपेश राई घोषित भए । प्रतियोगिता अवधिभर ६ गोल गरेका सुनसरी टेक्निकल कलेजका मणि भुजेलले सर्वाधिक गोलकर्ताका पुरस्कार जिते भने समिट कलेजले फेयर प्ले टिमको पुरस्कार पायो ।

विजेता टिम तथा खेलाडीहरुलाई आयोजक धरान नेबि लोकतान्त्रिक खेलकुद संघका अध्यक्ष दिपक थापा मगर, प्रतियोगिताका संयोजक अनिल लिम्बू, प्रमुख अतिथि एवं नेविसंघ सुनसरीका सभापति विकास केसी, कांग्रेस जिल्ला सहसचिव विकास आचार्य, कांग्रेस नगर कार्यवाहक सभापति शैलेज कोइराला, नेविसंघ जिल्ला उपसभापति चन्द्रसुन्दर खेवालगायतले ट्रफी एवं पुरस्कार वितरण गरेका थिए । प्रतियोगिता १०० औं बीपी जयन्तीको अवसरमा भदौ २० गतेदेखि शुरु भएको थियो । प्रतियोगितामा धरानका विभिन्न १६ वटा उच्चमावि तथा कलेजहरुले सहभागीता जनाएको संयोजक अनिल लिम्बूले जानकारी दिए ।