जलवायु परिर्वतनबारे जनचेतना जगाउन चित्रकला प्रर्दशनी

धरान । धरान ६ देशीलाइनस्थित वेलकम गेष्टहाउको तेस्रो तलामा रहेको हलमा प्रवेश गर्नेवित्तिकै अनौठो चित्रकलाको संसार शुरु हुन्छ । महिला र पुरुषको शरीरमा सुकेको रुख, रुखको जरामा गर्भभित्रको बच्चा, रुखको ठुटामामाथि टाउकोविनाको मान्छे बसेका छन् । हेर्दै अनौठो लाग्ने यी चित्रहरुले प्रवृत्ति एवं वातावरण विनाश भइरहदा त्यसको प्रतिकुल असर मानव सम्भ्यतालाई परिरहेको सन्देश दिइरहेका छन् ।
यी चित्रहरु धरानका युवा कलाकार साजन थापा मगरले तयार पारेका हुन् । ग्रीन हर्ट नाम दिएर उनको चित्रहरुको तीन दिने प्रर्दशनी शुक्रबारदेखि धरानमा शुरु भएको छ । उनका चित्रहरु जलवायु परिवर्तन र त्यसले पुर्याएको असरहरुबारे केन्द्रीत छन् । चित्रकला प्रर्दशनीमा २८ वटा चित्र र कलाकार मगरले नै बनाएका २ वटा मुर्ति पनि प्रर्दशनीमा राखिएको छ । यो प्रर्दशनी युमा फाइन आर्ट एकेडेमीको आयोजना तथा इडिएफ र सुनौलो पुस्तकालयको सहयोगमा भएको हो । चित्रकला प्रर्दशनीको उद्घाटन नेपाल ललितकला प्रज्ञा प्रतिष्ठान, हस्तकला विभाग प्रमुख कर्णप्रसाद मास्केले गरेका थिए ।

प्रवृत्ति विना मानव जीवन कल्पना गर्न नसकिने भएकोले कलाको माध्यमबाट वातावरण र प्रकृति जोगाउन आग्रह गरेको कलाकार मगरले बताए । ‘अहिले जे जति दैविप्रकोप, बाढीपहिरो, अत्यधिक गर्मीलगायत घटना हुन्छन्, यी सबै मानिसको कारणले भएको जलवायु परिर्वतनको असर हो’–कलाकार मगरले भने–‘त्यसैले प्रकृति, हरियाली जोगाउनुपर्छ भन्ने सन्देश दिन ग्रिन हर्ट शिर्षकमा प्रर्दशनी गरेको हँु ।’ प्राज्ञ मास्केले कलाकार सजनको सृर्जना हेर्दा आफुलाई सन्तुष्टि मिलेको बताए । उनले कलाकार मगरमा धेरै सम्भावना रहेको पनि बताए । ‘सजनको चित्र हेर्दा उनी निक्कै लगनशील देखिन्छन्, कलात्मकढंगले भाव व्यक्त गर्न उनी सक्षम छन्’–वरिष्ठ कलाकार मास्केले भने–‘मैले उनको पहिला पनि चित्र हेरेको थिए, अहिलेको चित्र हेर्दा सन्तुष्ट छुँ ।’ कवि मनु मञ्जिलले प्रकृति र वातावरणप्रति समर्पित चित्रहरु अस्तित्व चेतनाकोरुपमा अथ्र्याए । उनले चित्रलाई देख्न सकिने कविताकोरुपमा व्याख्या गर्दै कलामार्फत आफ्नो पहिचान र परिचय स्थापित गर्नुपर्ने धारणा राखे ।

कलाकार मगर करिब दुई बर्षअघिदेखि नै जलवायु परिवर्तनको बिषयमा चित्रकला प्रर्दशनीको तयारी जुटेका थिए । यसअघि, उनले राजधानीमा आरोहण गुरुकुलको आयोजनामा कवि तथा कलाकारहरुको मुहार चित्र(पोट्रेट)को एकल चित्रकला प्रर्दशनी गरिसकेका छन् । यसैगरि, मुकीमोनने अर्थात फलफुल काटेर गरिने कलाको पनि प्रर्दशनी पनि भइसकेको छ । प्रर्दशनीमा राखिने चित्रहरुको मुल्य १० हजारदेखि ४० हजारसम्मको रहनेछ । बिक्रीबाट संकलन भएको रकममध्ये २० प्रतिशत धरान ४, छाताचोकस्थित पुर्नस्थापना गृहलाई सहयोगस्वरुप प्रदान गरिने आयोजकले जनाएको छ । प्रज्ञ मास्केले शुक्रबार उद्घाटन समारोहमा सहयोगस्वरुप कलाकार मगरलाई नगद १० हजार हस्तान्तरण गरेका थिए । कलाकार मगरले अतिथिहरुलाई मायाको चिनोस्वरुप हरियो विरुवा प्रदान गरेका थिए । स्कुल पढ्दादेखि नै चित्र बनाउने मगरले एक दशकअघि कलाकार बिक्रम श्रीसँग मुतिकला पनि सिकेका थिए । नाट्य अभिनयमा पनि पोख्त उनी करिब ५ बर्षअघिदेखि राजधानीमा आरोहण गुरुकुलमा अभिनय पनि सिकिरहेका छन् ।