बीपी प्रतिष्ठानमा बेथिति: करोडौं अनियमितता भएको दाबी,अनियमितताविरुद्ध दबाब समुह गठन
धरान,असोज २ । बीपी कोइराला स्वास्थ्य विज्ञान प्रतिष्ठान धरानमा करोडौंको आर्थिक अनियमितता भएको त्यहीका कर्मचारीहरुले दाबी गरेका छन् । प्रतिष्ठानस्थित कर्मचारी कल्याण समाजले आइतबार नागरिक समाज, राजनैतिक दल र बुद्धिजिविहरुसँग होटल कञ्चनजंघामा अन्र्तक्रिया गर्दै प्रतिष्ठानको भ्रष्टचार, अनियमितता रोकेर धरासायी हुनबाट जोगाउन समेत आग्रह गरेको थियो ।
समाजका अध्यक्ष सुजेन्द्र गोले तामाङले नयाँ एमआरआइ मेशिन खरीद प्रकरणमा भएको अनियमितता, गत आर्थिक बर्षमा मुटु रोग सेन्टर र क्यान्सर सेन्टरको लागि परामर्शदाता नियुक्तीमा भएको आर्थिक अनियमितता, भवन निर्माणको ठेक्का शिलबन्दी खोल्नु २ घण्टाअघि रद्द गरिनु, भवन निर्माणको रकम कार्यकारिणी समितिको निर्णय विना नै एमआरआई खरीदमा रकमान्तर गरिनुलगायत थुप्रै आर्थिक चलखेलको फेहरिस्त प्रस्तुत गरेका थिए । यी सबै वर्तमान उपकुलपति डा.राजकुमार रौनियार नियुक्ती भएपछिका घटनाक्रमहरु हुन् । एमआरआइ मेशिन खरीद प्रकरण बाहिरिएपछि अख्तियार दुरुपयोग अनुसन्धान आयोगले छानबिन गर्न भन्दै प्रतिष्ठानबाट फाइल लगिसकेको छ ।
समाजका अध्यक्ष तामाङका अनुसार गत बर्ष प्रतिष्ठानले एमआरआई मेशिन खरीद प्रक्रिया अघि बढाउदा रेडियोलोजी विभाग प्रमुख रहेका हालका उपकुलपति रौनियारले नै १.५ तेस्लाको मेशिन किन्न अस्वीकार गरेको थियो । रौनियार उपकुलपति भएपछि भने सोही प्रकृतिको मेशिन खरीद प्रक्रिया अघि बढाएपछि अख्तिायारलेसमेत छानबिन थालेको हो । गत बर्ष हस्पिटेक कम्पनीले टेण्डर हाल्दा जुन जुन बिशेषता मिलेन, त्यही स्पेसिफिकेसनमा हटाएर तथा थपेर सोही कम्पनीसँग मिल्ने स्पेसिफिकेशन बनाएर ठेक्का कार्टेलिङ गरेर खरीद गर्ने प्रपञ्च रचेको तामाङले जानकारी गराए । ‘सबैभन्दा गम्भीर कुरा त क्यान्सर र मुटु रोग सेन्टरको लागि सरकारले विनियोजन गरेको बजेट रातारात कार्यकारिणी समितिको निर्णय विना रकमान्तर गरियो । आर्थिक बर्षको अन्तिम दिन त्यो पनि शनिबार एल.सि.खोलियो,’तामाङले भने । प्रतिष्ठानले करिब १८ करोडमा खरीद गर्न लागेको मेसिनको कम्पनीको वास्तविक मुल्य भने ९ करोड मात्र रहेको छ । गत आर्थिक बर्षमा भने १२ करोडमा खरीद गर्ने प्रक्रिया अघि बढेको थियो ।
क्यान्सर र मुटु रोग भवनको परामर्शदाता नियुक्तीमा गर्दा पनि देशकै हालसम्म सबैभन्दा महंगो दर(लागतको ३.६ प्रतिशत)मा ठेक्का दिइएको छ । जबकी निर्माणाधिन ४ सय शैयाको एमसिएच(मातृ शिशु) सेन्टरको भवनमा भने सोही ठेकेदारले लागतको १.४ प्रतिशतमा ठेक्का लिएको थियो । यसमा पनि करोडौंको संस्थागतरुपमा नै भ्रष्टचार भएको कर्मचारी कल्याण समाजले दाबी गरेको छ । मुटु सेन्टरको लागत स्टिमेट १ अर्ब ४४ करोड र क्यान्सरको १ अर्ब ८३ करोड गरी कुल ४ सय शैयाको भवनको लागि कुल ३ अर्ब २७ करोड लागत अनुमान रहेको छ । यसको ३.६ प्रतिशतले परामर्श दातालाई ११ करोड ७७ लाख २० हजार बुझाउनुपर्छ । तर, यसअघि ४ सय बेडकै एमसिएचको परामर्शदाता नियुक्ती गरिदा ४ करोड ५७ लाख ८० हजारमा भएको थियो । यसले पनि प्रतिष्ठानलाई ७ करोड १९ लाख ४० हजार रुपैया नोक्सानी पुगेको समाजको दाबी छ ।
अख्तियारमा पनि सेटिङ
प्रतिष्ठानमा विगतकालदेखि नै भ्रष्टचार हुने गरेको र अख्तियारले छापा मारेर फाइलहरु लगेपनि सेटिङमा अहिलेसम्म कारबाही नभएको अन्र्तक्रियाका सहभागीहरुले व्यक्त गरेका थिए । अर्थशास्त्रका सहप्रध्यापक डा.राजेन्द्र शर्मा पोखरेलले चरम राजनीतिकरण र राजनैतिक नियुक्तीले जर्जर हुदै गएको धारणा राखे । साथै उनले सर्वजनिक खरीद अनुगमन कार्यालयको मापदण्डअनुसार परामर्शदाता नियुक्ति गर्दा लागतको २.५ प्रतिशतभन्दा बढीमा ठेक्का दिन नहुने भएपनि बीपीमा सरासर भ्रष्टचार भएको देखिएको पनि बताए । ‘बीपीको भ्रष्टचार, आर्थिक अनियमिताको कुरा अख्तियारमा पनि नपुगेको होइन, तर त्यहाँ पनि सेटिङ छ । खै अहिलेसम्म कस्लाई कारबाही भयो ? अब मन्त्रालय र अख्तियारमा हुने सेटिङ भत्काउनुपर्छ,’शर्माले भने ।पुर्वमेयर एवं नागरिक समाज धरानका अध्यक्ष मनोज मेन्याङ्बोले प्रतिष्ठान धरानको लागि वरदान सावित भएपनि नयाँ उपकुलपति आएपछि आर्थिक अनियमितताको कुरा सतहमा आएकोले उनको नियतप्रति शंका उब्जिएको बताए । भ्रष्टचारी मानसिकतालाई रोक्न नसके प्रतिष्ठानकै भविष्यमाथि प्रश्न खडा हुने भन्दै उनले सबै धरानबासी लाग्नुपर्नेमा जोडदिए । एमालेका जिल्ला नेता प्रदिप भण्डारीले विचौलियाबाट पैसाको पोको बुझाएर पदाधिकारी नियुक्ती हुने प्रवृत्ति तोडिनुपर्ने बताए । ‘बीपीमा भएको विकृति, विसंगित हटाउन कुन व्यक्ति मन पर्यो, कुन परेन भन्ने होइन, सुधार्न सबै लाग्नुपर्छ । भिसि भएर जो आएपनि भ्रष्टचार रोकिनपर्छ,’भण्डारीले भने ।
अन्र्तक्रियामा कांग्रेसका सभापति तिलक राई, राप्रपा नेपालका जुद्ध लोहनी, संघीय समाजवादी फोरमका ताजुब लिम्बू, एमाले नगरसचिव राजमणी निरौला, प्रा.डा.भिम खतिवडा, एमाले कार्यवाहक अध्यक्ष नारायण सुवेदीलगायतले धारणा राखेका थिए । उनीहरुले भ्रष्टचार,आर्थिक अनियमिता अन्त्यमा धरानबासी जागरुक हुनुपर्ने, आन्दोलनरत कर्मचारीहरुको माग पुरा गराउनुपर्ने, प्रतिष्ठानको सेवागुणस्तरमा सुधार आउनुपर्ने र कर्मचारीहरुले पनि आफ्नो पदीय जिम्मेवारी पुरा गर्नुपर्नेमा जोडदिए ।
अनियमितताविरुद्ध दबाब समुह गठन
बीपी कोइराला स्वास्थ्य विज्ञान प्रतिष्ठान धरानमा भ्रष्टचार एवं आर्थिक अनियमितता भइरहको भन्दै नागरिक दबाब समुह गठन भएको छ । नयाँ उपकुलपति नियुक्ती भएपछि विभिन्न विवादमा फस्दै आएको प्रतिष्ठानलाई भ्रष्टचार एवं अनियमितताबाट मुक्त गरेर धरासायी हुन नदिन भ्रष्टचार विरुद्ध नागरिक दबाब समुह गठन गरिएको हो । प्रतिष्ठानस्थित कर्मचारी कल्याण समाजले आइतबार नागरिक समाज, राजनैतिक दल र बुद्धिजिविहरुबीच आयोजित अन्र्तक्रियापछि समुह गठन भएको हो । यो समुहले प्रतिष्ठानमा भइरहेको भ्रष्टचार एवं अनियमितताविरुद्ध आवाज र अभियान चलाउने साथै कर्मचारीहरुको जायज माग पुरा गराउन दबाब दिने र गुणस्तरीय सेवा प्रदान गर्न हरदम निगरानी गर्ने बताइएको छ ।बुद्धिजिवि एवं सहप्राध्यापक डा.राजेन्द्र शर्मा संयोजक रहेको समुहमा सदस्य सचिव पत्रकार किसोरकुमार कार्की छन् । समुहको सदस्यहरुमा पुर्वमेयर मनोजकुमार मेन्याङ्बो, दलका प्रतिनिधिहरु, आदिबासी जनजाति महासंघको प्रतिनिधि, महिला सञ्जाल, उद्योग वाणिज्य संघको प्रतिनिधि, पत्रकार महासंघका प्रतिनिधि सदस्य हुनेछन् । यस्तै, धरानस्थित महेन्द्र बहुमुखी क्याम्पस, केन्द्रीय प्रविधि क्याम्पस, पिण्डेश्वर विद्यापिठ, पुर्वाञ्चल क्याम्पसका प्रमुखहरु पनि दबाब समुहको सदस्य हुनेछन् भने विद्यार्थी प्रतिनिधिकोरुपमा सागर प्रसाई पनि सदस्य छन् । ‘बीपीमा भइरहेको विकृति, विसंगित विरुद्ध निगरानी गर्छ र न्युनिकरण गर्न पहल गर्छ । जे जति अनियमितता प्रकरण आएको छ, त्यस विरुद्ध सही ठाउँमा ल्याउन सकेसम्म पहल गछौं,’ब्लाष्ट टाइम्सका सम्पादकसमेह रहेका सदस्य सचिव कार्कीले भने ।
........................................................
Comments
Post a Comment