रुबि भइन्, मिस पुर्वाञ्चलको विजेता

धरान,असोज ७ । तेह्रथुमको पौठाक पुख्यौली घर भएकी धरान ११ की २० बर्षीय रुबि लिम्बूले नेपाल आइस नेचुरा मिस पुर्वाञ्चल २०१७ को उपाधि जितेकी छिन् । शुक्रबार राती सभागृहमा सम्पन्न फाइनल स्पर्धामा आफुलाई अब्बल सावित गर्दै रुबिले पुर्वाञ्चलको सबैभन्दा ठुलो मानिएको सुन्दरी प्रतियोगिताको ताज पहिरिएकी हुन् ।
फाइनलमा मुख्य निर्णायक एवं पिएलओ लुब्रिकेन्टका प्रबन्ध निर्देशक भोलेश्वर दुलालले सोधेको ‘महिला हुनुको महत्व के छ ?’ भन्ने प्रश्नमा उत्कृष्ट जवाफ दिदै उनले मिस पुर्वाञ्चलको ताज पहिरिन् । दुलालको जवाफमा उनले ‘महिलालाई माया, सहनशीलता र दयाको खानी’कोरुपमा ब्याख्या गरेकी थिइन् । उनको त्यही जवाफले ताज पहिरिन सफल भइन् ।

 विजेता रुबिले ताजसँगै यामाहा स्कुटी हात पारिन् भने एक साताको हङकङ टुर प्याकेजको पुरस्कार पनि पाएकी छिन् । धरानस्थित सुनसरी टेक्निकल कलेजमा माइक्रोबायोलोजी तेस्रो बर्षमा पढ्दै गरेकी रुबि भविष्यमा अध्ययनमा केन्द्रीत हुदै सामाजिक काममा सक्रिय हुने योजना रहेको बताउछिन् । सामाजिक क्षेत्रमा लाग्न प्रेरणा मिल्ने र अनुभव बटुल्ने प्लेटफर्मकोरुपमा लिएर मिस पुर्वाञ्चलमा सहभागी भएको उनले बताइन् । ‘भविष्यमा पढाईलाई नै निरन्तरता दिन्छु, र सामाजिक कार्यमा सक्रिय रहन्छु,’उनले भनिन् ।
प्रतियोगितामा धरानकी सिमरन श्रेष्ठ फष्ट रनरअप घोषित भइन् भने झापा विर्तामोडकी अनु ढुंगाना सेकेण्ड रनरअप घोषित भइन् । सिमरनले नगद ५० हजार हात पारिन् भने अनुले नगद ४० हजार पाइन् । फाइनलमा कुल २१ प्रतियोगी सुन्दरीहरु उपाधि दौडमा र्याम्पमा उत्रिएका थिए । ती मध्ये निर्णायकहरुले ७ प्रतियोगीहरुलाई छनौट गरेर अन्तिम उपाधि दौडमा अघि बढाएका थिए । टप ७ मा छनौट भएका प्रतिस्पर्धीहरुलाई मुख्य निर्णायक दुलालले प्रश्न सोधेका थिए ।

टप ७ मा ताज विजेताहरुबाहेक शताब्दीका गिरी, विपना श्रेष्ठ, सविना आचार्य र सन्ध्या भेटवाल पनि परेकी थिइन् । विजेता रुबिलाई गत सँस्करणकी विजेता कृतिका गिरीले ताज पहिराएकी थिइन् भने फष्ट रनरअपलाई गत बर्षकी विजेता इक्सा मादेन र सेकेण्ड रनरअपलाई २०१५ की विजेता प्रमिशा बज्रचार्यले ताज पहिराइदिएकी थिइन् ।
विजेता रुबिले मिस हेल्दी, मिस इन्टेलेक्चुअल र मिस ट्यालेण्टको उपाधि पनि हात पारिन् भने फष्ट रनरअप मिसरनले मिस फोटोजेनिक र मिस पर्सनालिटीको उपाधि पनि जितिन् । यस्तै, मिस चार्मिङको उपाधि शर्मिला खतिवडा, मिस फ्रेण्डसिपको उपाधि विपना श्रेष्ठ, मिस क्याटवकको उपाधि यस्तर तामाङले हात पारिन् ।

 यस्तै, मिस पब्लिक च्वाइस र मिस मल्टिमिडियाको उपाधि शताब्दीका गिरी र मिस ज्वेलरीको उपाधि प्रतिमा तिवारीले पाइन् । प्रत्येक टाइटल विजेतालाई नगद १२ हजार र अन्य आकर्षक पुरस्कारहरु दिइएको आयोजक सिल्भर इन्टरटेन्मेन्टले जनाएको छ । विजेताहरुलाई आयोजक संस्थाका अध्यक्ष दिपक वनेपाली, पिएलओका प्रबन्ध निर्देशक दुलाल, सि.जि.ब्रुअरीका सिनियर जि.एम. प्रदिप पुडासैनी,गजुरमुखी ट्रेडका सिइओ गोपाल आचार्य, वडा नं ३ का अध्यक्ष आशाकुमार श्रेष्ठलगायतले पुरस्कार वितरण गरेका थिए ।