नेचुरल थिएटर-खोर्साने खाप
तालतलैयामा दैनिक सयांै आन्तरिक पर्यटक घुम्न पुग्छन् । तर, नजिकको खोर्साने खाप र त्यहाँ रहेको होम स्टेसम्म उनीहरु पुग्दैनन् । ओझेलमा परेको त्यही गाउँमा विश्व पर्यटन दिवसको दिन असोज ११ गते (२७ सेप्टेम्बर) धरानबाट ३० भन्दा बढी टोली पुग्यौं । त्यसमध्ये पनि २० जना धरानबाट साइक्लिङ गर्दै पुगे । अरु मोटरसाइकल र गाडीमार्फत । सुनसरी उद्योग वाणिज्य संघ र धरान जेसिजले पर्यटन प्रर्वद्धन गर्ने उद्देश्यले खोर्साने खापलाई गन्तव्य छनौट गरेको थियो । एक रात बास बस्ने योजनासहित । यात्रामा जुनियर जेसिज, होटल एशोसिएशन अफ धरानको पनि सहभागिता थियो ।
सबै भेला भएपछि गाइडभन्दा अघि नजाने निर्देशन आयो । त्यसपछि सौजनलाई पछ्याउदै दक्षिण लाग्यौं । वस्ती सकियो । जंगल शुरु भयो । साइकलमा जंगल सफारी रमाइलो अनुभव हुन्छ । गाडी पनि गुड्न सक्ने ट्रयाक । साइकल गुडाउन गाह्रो हुन्न । बीच जंगलमा खोला तगारो बन्यो । पानवारी प्रवेश गर्नेबेला पनि सेहरा पार गर्नुपर्छ । तर, त्यहाँ पक्की पुल छ । जंगल बीचमा भने खोलामा हेलिएरै तर्नुपर्ने । निरन्तर बर्षा भइरहेकोले खोलामा पानी बढी नै छ । साइकल गुडाएरै तर्ने प्रयास गर्दा एउटाको चेकपकेट भाचियो । त्यसपछि त सबैले साइकल बोकेरै खोला त¥यौं ।
खाजा तयार हुन ढिलो भयो । हाम्रै टोलीले वंगुर मासु लिएर गएको रहेछ । होटल एशोसिएशनका केन्द्रीय सदस्य महेश श्रेष्ठ बिकी साथीहरुसँग सेकुवा बनाउन थाले । कोही गाउँमै बनेको तीनपानेको चुस्की लिन थाले । पाल ठडियो । स्थानीयले नै जेनेटरको व्यवस्था गरे, लोडेसेडिङमा पनि नो टेन्सन । साउण्ड सिस्टम पनि जोडियो । एकातिर क्याम्प फायर । वरिपरी कुर्सीमा हामी । गीत घन्कन थाल्यो । गोलघरभरि गाउँले भेला भए । सुरेन्द्र प्रधान राम्रो गाउदा रहेछन् । डिजे ललित राई र उनका जोडीले नेपाली, हिन्दी गीत गाउन थाले । धराने टोलीसँगै स्थानीयहरु युवाहरु पनि नाच्न थाले । तिहारमा देउसी भैलो खेल्न आएजस्तै त्यहाँ रमिता भयो ।
गाउँमा प्रगतिशिल सुरक्षा समिति र त्यसअन्र्तगत अनुसन्धान विभाग छ । टोल विकास कोषबाट गाउलेहरु ऋण लैजान्छन्, र ६ महिनाभित्र तिर्छन् । आमा समुह, युवा समुह, होम स्टे समिति सबैको छुट्टाछुट्टै कोष रहेछ । होम स्टे समितिले गोलघरमा सामुहिक पसल पनि चलाउने रहेछ । दश बर्षअघि निर्माण मजदुरी गर्ने धिमाल आफै अहिले होम स्टे र सरस्वती वन समितिको अध्यक्ष छन् । परिवर्तनको ज्युदो नमुना उनी आफै हुन् । उनकै घरमा शिवराज र उपेन्द्र दाईसँगै म र दिनेश सुत्यौं । एकैछिनमा निदाएछांै । बिहान ब्युझदा त साथीहरु धरान फर्कन तयारी अवस्थामा थिए । होम स्टेमा २० जना बसेछौं, १० जना साथीहरु टेण्टमा । जाने बेला पनि अक्षता टिका र फुल दिदै एक महिलाले भनिन्,‘गएपछि नर्बिसनुस है हाम्रो गाउँलाई ।’ अहो, कति आत्मीयता । हामी तालतलैया, तरहरा हुदै कोशी राजमार्गबाट साइक्लिङ गर्दै धरान लाग्यौं ।
खोर्साने खापदेखि एक किलोमिटर पश्चिममा तालतलैया छ । डेढ किलोमिटर दुरीमा हसिना सिमसार र ९ किलोमिटर दुरीमा वेतना सिमसार । गाउँमै बुढासुब्बा, गुम्बा र धिमाल जातिको धनपाल थान छ । दिउसो ती सिमसार घुम्ने र साँझमा खोर्साने खापमा बास बस्ने सकिने । पर्यटन व्यावसायीहरुले खोर्साने खापलाई पनि समेटेर प्याकेज बनाउदा हुने । मासु खानासहित एउटा बेडको ५ सय ५० मात्र । अझ सादा खाना खाए ४ सय ५० मात्र । बिहान चिया र खाजा पनि पाइन्छ । मात्र २५ रुपैयामा घोड सवारी पनि छ । यहाँ कुल ५२ घरधुरी छ । राई, लिम्बु, क्षेत्री, बाहुन, धिमाल, दलित सबै मिश्रित जातजातिको बसोबास छ । इटहरी तीब्र शहरीकरण र विकासमा अघि बढीरहे पनि खोर्साने खापको दुःखलाई नबुझेको स्थानीयको गुनासो छ । यो गाउँ सेहरा र बुढी खोलाको बीचमा छ । दुवै खोलामा पुल छैन । बर्षाको बेला केटाकेटीहरु स्कुल जादैनन् । बाढी गाउँमा पसेर वितण्डा मच्चाउछ । तरपनि गाउलेहरु निराश छैनन् । पाहुनालाई स्वागत गर्न हरदम उनीहरु तम्तयार भएर बसेका छन् ।.................................................................................................
आशबहादुर धिमाल, अध्यक्ष, खोर्साने खाप होम स्टे व्यावस्थापन समिति
..................................................................................
अतुलदिप श्रेष्ठ, अध्यक्ष, धरान जेसिज
ः पर्यटन प्रर्वद्धनको कार्यक्रम गर्ने योजनामा थियौं । पर्यटन दिवस पनि परेकोले २७ सेप्टेम्बरमा खोर्साने खापको होम स्टे रोज्यौं । उद्योग वाणिज्य संघ, जुनियर जेसिज, होटल एशोसिएशनसँग सहकार्य भयो । साइक्लिङको पनि प्रर्वद्धन भयो । ओझेलमा परेको होम स्टेलाई पनि चिनाउन खोजेका हौं । म पनि पहिलो पटक साइक्लिङमा गएको । धेरै रमाइलो भयो । यसरी नै महिनामा एक पटक अरु संघसंस्था पनि घुम्न जाने, बास बसिदिने ग¥यो भने पर्यटन प्रर्वद्धनमा मद्दत पुग्छ ।............................................................
शिवराज श्रेष्ठ, महासचिव सुनसरी उद्योग वाणिज्य संघ
ः संघले पर्यटनलाई प्राथमिकता दिएको छ । हामी पर्यटन प्रर्वद्धन र विकासको लागि धेरै कार्यक्रमहरु गर्दैछौं । खोर्साने खापमा आउनुको कारण पनि यो ठाउँको प्रचारप्रसार र प्रर्वद्धन होस भन्ने उद्देश्य नै थियो । यहाँको व्यावस्थापनमा केही कमीकजोरी देखिए पनि आगामी दिनहरुमा सुधार गर्नुपर्छ । म पनि पहिलो पटक यसरी होम स्टेमा बसेको हो । यहाँको सँस्कार, खानपिन, आतित्थ्यता सबै राम्रो लाग्यो ।
Comments
Post a Comment