धरानमा छुट्टै रात्री बसपार्क सञ्चालन

धरान । भानुचौकस्थित साघुरो बन्दै गएको बसपार्कलाई व्यवस्थित गर्ने उद्देश्यले धरानमा लामो दुरीमा चल्ने बसको लागि छुट्टै रात्री बसपार्क निर्माण भएको छ । धरान उपमहानगरपालिका र यातायात व्यावसायीको पहलमा धरान १५ स्थित पाथीभारा लाइनमा निर्माण भएको रात्री बसपार्क आइतबारदेखि औपचारिकरुपमा सञ्चालनमा आएको छ ।
भानुचौकस्थित बसपार्क साँघुरिदै गएर अस्तब्यस्त बनेपछि व्यावस्थित गर्न दुई बर्षअघिदेखि लामो दुरीको रात्री बसलाई स्थानन्तरण गर्न पहल भएको थियो । उपमहानगरले विघटन भइसकेको घरेलु तथा सिलपकला बिक्री भण्डारको उपभोगविहिन करिब ७ कट्ठा जग्गामा दुई चरण गरी रात्री बसपार्क निर्माण गरेको हो । नवनिर्मित टिकट काउण्टरसहितको बसपार्क आइतबार एक समारोहबीच कोशी अञ्चल प्रहरी कार्यालयका वरिष्ठ प्रहरी उपरीक्षक एसएसपी ज्ञानबिक्रम शाहले गरे । रात्री बसपार्कमा ६ वटा कोठा भएको टिकट काउण्टरको भवन छ भने महिला र पुरुष दुवैको लागि छुट्टै शौचालय छ । बसपार्क निर्माणमा व्यावसायीहरुको ३ लाखसहित १५ लाख बढी लागतमा तयार भएको हो । बसपार्कमा सोलार बत्ति पनि जडान गरिएको छ । सुरक्षाको लागि अस्थायी प्रहरी पोष्टको व्यवस्था गरिएको छ । बसपार्कमा दैनिक ३० वटा बस छुट्न सक्ने अनुमान छ ।

सवारीसाधानको संख्या बढेपछि भानुचौकको बसपार्क साधुरिएकोले यात्रु, यातायात मजदुर सबैले कष्ट व्यहोर्नु परिरहेकोले रात्री बसपार्कको विकल्प तयार गरिएको नेपाल यातायात व्यावसायी महासंघका कोशी अञ्चल संयोजक कृष्णप्रसाद सुवेदीले बताए । ‘सवारीको संख्या बढेर भानुचौक अस्तब्यस्त छ, हामीले कष्टपुर्णरुपमा सेवा सञ्चालन गरिरहेका छौं । अब रात्री बस यहाँ सरेपछि केही खुकुलो र सहज हुने अपेक्षा छ’–उनले भने । नयाँ रात्रीबस सञ्चालनबारे व्यावसायी, मजदुर, ट्राफिक एवं उपमहानगरबीच एकतर्फी रुटमा बस सञ्चालन गर्ने सहमति पनि भएको छ ।

लामो दुरीको रात्री बस अबदेखि भानुचौकमा यात्रु चढाउन जान पाउने छैन । अन्यत्रबाट यात्रु बोकेर धरान आएको रात्री बसले मात्रै बिहान यात्रु ओराल्न भानुचौक जान पाउनेछ । बेलुका भने नयाँ बसपार्कबाट पुष्पलाल मार्ग वा वरगाछी हुदै गन्तव्यतर्फ रात्री बस जानुपर्ने छ । ‘बिहान धरान आउदा मात्रै यात्रु ओराल्न भानुचौकमा बस जान पाउछ, बेलुका यात्रु चढाउन जान भने पाउदैन’–उपमहानगरपालिकाका प्रशासकीय अधिकृत गणेशप्रसाद खतिवडाले भने–‘धनकुटा, तेह्रथुमतिरबाट काठमाण्डौंतिर जाने रात्री बसले पनि भानुचौक हुदै सिधै जान पाए पनि रोकेर यात्रु झार्न वा चढाउन पाउदैन ।’ उनका अनुसार पहाडी क्षेत्रबाट आएको बसले छाताचोक क्षेत्र वा भोटेपुल क्षेत्रमा पुगेर मात्रै रोक्न पाउनेछ ।

रात्री बसपार्क व्यवस्थापन समितिका अध्यक्ष अइन्द्र बेघाले व्यवस्थित र सुरक्षितरुपमा बसपार्क सञ्चालन गर्न स्थानीयबासीसँगै सरोकारवाला सबै पक्षबाट हातेमालो हुनुपर्ने बताए । रात्री बस छुट्टै शुरु भएपछि भानुचौकको बसपार्कमा चाप कम हुने र व्यवस्थित हुने बताए । नयाँ बसपार्कमा भानुचौकमा जस्तो जथाभावीरुपमा जुनसुकै गाडीको पनि टिकट काउण्टर रहने छैन । यसले यात्रुहरुले गुणस्तरीय सेवा पाउने समितिको दाबी छ । धरानबाट राजधानी, पोखरा र नेपालगञ्ज रुटमा चल्ने रात्री बसहरु दैनिक ३० देखि ४० वटासम्म सञ्चालन हुन्छ । लामो दुरीको रात्री बसको पार्किङ सरेपछि ठाउँ अभावमा सकडमा पार्किङ हुदै आएको छोटो दुरीको सवारीसाधानहरु भानुचौकस्थित बसपार्कभित्रै अट्ने ट्राफिक प्रहरीको अपेक्षा छ ।