गर्मी विदामा यू-१४ फुटबल प्रशिक्षण शिविर

धरान । फटबल भनेपछि हुरुक्कै हुने माउण्ट हर्मन एकेडेमीका ९ बर्षीय मौषम राईलाई शनिबारको रात एक युग झै भयो । कहिले उज्यालो होला भन्ने उनको छटपटीले उनको अभिभावकलाई पनि चिन्तामा डुबायो ।
उनको छटपटिको कारण थियो, आइतबारदेखि शुरु हुने समर फुटबल ट्रेनिङ क्याम्प । फुटबल प्रशिक्षण हुने थाह पाएदेखि नै उनी असाध्यै उत्साहित थिए । ‘कहिले बिहान होला र ट्रेनिङमा जान पाइएला भनेर छटपछि भइरह्यो’–कक्षा ३ का मौषमले भने–‘ज्यादै खुशी छुँ ।’ उनलाई यो अवसर माउण्ट हार्मन एकेडेमीले दिलाएको हो । एन्फाको प्राविधिक सहयोगमा आइतबारदेखि शुरु भएको अण्डर १४ प्रशिक्षणमा मौषम झै ४३ जना फुटबल क्रेजी विद्यार्थीहरु सहभागी छन् ।
धरान १७ स्थित एन्फा टेक्निकल सेन्टरको खेल मैदानमा अबको १५ दिनसम्म प्रशिक्षण रहने एकेडेमीले जनाएको छ । विद्यार्थीहरुको विदाको समय उपयोग गर्दै उनीहरुमा भएको खेल क्षमतालाई निखार्न प्रशिक्षण आयोजना गरिएको एकेडमीका संस्थापक एवं एन्फाका जिल्ला उपाध्यक्ष नविन राईले बताए । ‘प्रशिक्षणले विद्यार्थीहरुलाई स्वस्थ्य, तन्दुरुस्त राख्छ र उनीहरुमा भएको खेल प्रतिभा पनि हामीले चिन्ने अवसर पाउछौं’–उनले भने ।
प्रशिक्षण शिविरको उद्घाटन गर्दै एन्फाका केन्द्रीय उपाध्यक्ष किसोर राईले जुनियर खेलाडी उत्पादन तथा फुटबलको विकासमा शिविर फलदायी हुने आशा व्यक्त गरे । ‘एन्फाले ग्रासरुट ट्रेनिङ आयोजना गर्ने योजना बनाएपनि गर्न सकेको थिएनौं, त्यस्तै कार्यक्रम स्कुलले आयोजना गरेकोमा खुशी छौं’–उनले भने–‘सानै उमेरदेखि प्रशिक्षण र अवसर पाउने हो भने नेपालमा पनि योग्य र दक्ष फुटबलर उत्पादन हुन्छ ।’ उनका अनुसार विद्यालयस्तरमा फुटबल प्रशिक्षण शिविर आयोजना भएको नेपालमै पहिलो हो । प्याब्सन सुनसरीका उपाध्यक्ष नरबहादुर थापाले हालसम्म कुनै स्कुलले नगरेको कार्य माउण्ट हार्मोनले गरेको भन्दै प्रसंसा गरे ।
एकेडेमीका प्रिन्सिपल अनुप तामाङले विद्यार्थीहरुलाई अध्ययनमा मात्रै सिमित नराखी अतिरिक्त क्रियाकलापमा पनि प्राथमिकतामा राखेको बताए । ‘विद्यार्थीहरुको समग्र विकासको लागि खेलकुद पनि आवश्यक छ, त्यसैले हामीले अध्यापनसँगै फरक शैलीका कार्यक्रमहरुमा विद्यार्थीहरुलाई सहभागी गराउछौं’–उनले थपे । अभिभावक दिपक राईले प्रशिक्षणले शैक्षिक वातावरणलाई सकारात्मक बाटोमा हिडाउने धारणा व्यक्त गरे । पन्ध्र दिने शिविरमा एन्फाका प्रशिक्षक मनिल महराले विद्यार्थीहरुलाई प्रशिक्षण दिनेछन् । प्रशिक्षणमा कक्षा ६ देखि ९ सम्मका छात्रहरु सहभागी छन् । उद्घाटन समारोहका प्रमुख अतिथि एवं एन्फा केन्द्रीय उपाध्यक्ष राईले प्रशिक्षक महरालाई फुटबल तथा जर्सी प्रदान गरेका थिए ।