विपन्न परिवारलाई बाख्रा वितरण
धरान । पाँचकन्या गाविसकी पदमकुमारी दर्जी शनिबार दिउसो बाख्रा डोर्याउन पाउदा हर्षित भइन् । निम्न आर्थिक अवस्थाकी उनलाई अब यही बाख्रा परिवारको पालनपोषणको लागि थप सहारा हुन्छ भन्ने आशा जागेको छ ।शनिबार हात लागेको बाख्रालाई उनले तत्काल बिक्री गर्न पाउने छैनन् । पाठापाठी जन्मिएपछि मात्रै बाखा्रमाथि उनको पुर्णअधिकार रहनेछ । जन्मिएको पहिलो पाठी भने उनलाई जसले माउ बाख्रा दिएको हो, उसैलाई फर्काउनुपर्ने सर्त छ । ‘यसलाई राम्ररी पाल्छुँ, स्याहार गर्छु, पछि पाठापाठी भएपछि बिक्री गरौला’–उनले भनिन् ।
बाख्रा पाउने थप व्यक्तिहरुमा पाँचकन्याकै टिकाराम कर्मा र मनकुमारी बिक छन् भने धरानका रामकुमारी बिक, दुर्गा पाँचकोटी, टेकबहादुर राई, टिका आचार्य, शान्ति बिक, मसिने परियार, चामबहादुर गुरुङ, कमल श्रेष्ठ, र गोमाकुमारी छन् ।
संस्थाको अभिलाषा कार्यक्रमअन्र्तगत स्थानीयसँगको छलफल गर्नुका साथै सबै अवस्था बुझेर आर्थिक अवस्था नाजुक भएका परिवारलाई बाख्रा वितरण गरिएको अध्यक्ष अनन्त अर्यालले बताए । ‘हामीले स्थानीय नेताहरुको रोहबरमा एउटा समिति बनाएका छौं, उक्त समितिले उहाँहरुको नियमित अनुगमन गरिरहन्छ’–अर्यालले भने–‘विपन्न वर्गको आर्थिक अवस्था सुधार गर्न कृर्षिमा आधारिक बाख्रापालन प्रोत्साहन गर्न वितरण गरेका हौं ।’अध्यक्ष अर्यालका अनुसार जजसलाई बाख्रा दिइएको छ, ती बाख्राबाट जन्मिएको पहिलो पाठी फिर्ता लिइनेछ र त्यसरी फर्काएको पाठीलाई पुनः अरु विपन्न समुदायलाई वितरण गरिनेछ । शनिबार वितरण गरिएको बाख्राहरु अमेरिकाको न्युजर्सीस्थित फ्रेण्ड्स अफ नेपालका डा.तुलसी मर्हजनको पहलबाट प्राप्त सहयोग र रोटरी इन्टरनेशनलको आर्थिक सहयोगमा खरीद गरिएको संस्थाले जनाएको छ ।
Comments
Post a Comment