तरुण दलका नगर उपसभापतिसहित तीन पक्राउ

धरान । मदिरा सेवन गरेर राती छिमेकीको घरमा ढुंगामुढा गर्ने तरण दल धरान नगर समितिको उपसभापति कुले भनिने रञ्जन राईसहित तीन युवा बिहिबार पक्राउ परेका छन् ।
पक्राउ लगत्तै धरान प्रहरीले ती युवाहरुलाई सार्वजनिक ऐनअन्र्तगत मुद्दा दर्ता गरेर कारबाही प्रक्रिया अघि बढाएको छ । अन्य पक्राउ पर्नेमा धरान १८ का सुवास राई र अरुण लिम्बू छन् । छोड्न राजनैतिक दबाब आउनसक्ने भन्दै प्रहरीले उनीहरुलाई बिहिबार नै म्याद थप गरिसकेको छ । जिल्ला प्रशासन कार्यालय सुनसरीबाट पाँच दिनको म्याद थप गरिएका ती युवाहरुलाई धरान नल्याइ जिल्ला प्रहरी कार्यालय इनरुवामा नै हिरासतमा राखिएको इलाका प्रहरी कार्यालय धरानले जनाएको छ ।
‘यहाँ राखिरहदा कारबाही नगर्न दबाब आउने भएकोले तत्कालै म्याद थप गर्न इनरुवा पठायौं, म्याद थप पछि जिल्लामै राखिएको छ’–इलाका प्रहरी कार्यालय धरानका प्रहरी निरीक्षक रामेश्वर त्वातीले भने । उनका अनुसार तरुण दलका उपभापति राईसहित तीन जना युवाहरुले रातभर मदिरा सेवन गरेर तीन बजेतिर धरान १८, बुद्धचोकस्थित विष्णुकमार राई र माया राईको घरमा ढुंगामुढा गरेका थिए । उपसभापति राई र पीडित परिवारबीच साइनो पनि छ ।
पीडित परिवारका अनुसार मदिदा राती करिब ३ बजेतिर नशाले लट्ठ भएर घरमा तथानाम गालीगलौज गर्दै ढुंगामुढा गरेको थिए । ढुंगा प्रहार गर्दै युवाहरुले ज्यान मार्ने धम्की पनि दिएको थियो । उनीहरुले करिब एक घण्टासम्म आतंक मच्चाएको पीडित विष्णुकुमारले बताए । सोही घटनाबारे बिहानै करिब ५ बजेतिर छलफल गरिरहदा रञ्जनले घरबेटी विष्णुकुमारमाथि आक्रमण गरे र, फेरी घरमा जथाभावी ढुंगा प्रहार गरेर क्षति पुर्याएको पीडित परिवारजनले जनाएको छ ।
‘अहिलेसम्म हामीबीच नराम्रो केही भएको जस्तो लाग्दैन, तर राती एक्कासी घरमा ढुंगा हान्दै तिमेरुले सारालाई ठगेर घर बनायौ,घर नै भत्काइदिन्छु भन्दै तथानाम गाली गर्योे’–घरबेटी विष्णुकमारले भने–‘बिहान छरछिमेक, बुढापाकाहरु बोलाएर छलफल गर्दा मलाई नै दुई मुक्का हान्यो, अनि, फेरि घरमा ढुंगामुढा गर्न थालिहाल्यो ।’ राती करिब ३ बजेतिर नै प्रहरीलाई घटनाबारे जानकारी गराएपनि नआएको उनले गुनासो गरे । थुप्रै ढुंगा प्रहारबाट घरको झ्यालका सिसाहरु फुटेको छ । घरमुली माया राई जग्गा व्यापारी हुन् ।
छलफलको क्रममा बिहान आक्रमण भएपछि भने पीडित परिवारजनले प्रहरीमा लिखित उजुरी दिएका थिए । प्रहरीले युवाहरुलाई पक्राउ गरेर मेडिकल जाँच गरेर तत्कालै म्याद थप गर्न जिल्ला प्रशासन कार्यालय इनरुवा पठाएको थियो । प्रहरीको अनुमानअनुसार नै पक्राउ पछि म्याद नथप्न दबाब दिन विभिन्न समुह इलाका प्रहरी कार्यालय पुगेको थियो । पीडित परिवारलाई पनि घटना छिमेकीबीच भएको भन्दै सामाजिकरुपमा नै मिलाउन दबाब दिन पुगेको थियो । ‘यस्तै दबाब आउछ भनेरै जाहेरी आएलगत्तै म्याद थप गर्न पठाइहाले’–प्रहरी निरीक्षक त्वातीले भने–‘पछि त उजुरीकर्ता पनि फिर्ता लिनुपर्यो भन्दै आएको थियो, मैले हुदैन भनेर फकाईदिए ।’