टुर डे लुम्बिनीमा धराने साइक्लिष्ट युवाहरु

धरान । शान्ति, सम्मृद्धि र समुन्नति नारा दिएर यहाँका साइक्लिष्ट युवाहरु टुर डे लुम्बिनी साइकल यात्रामा निस्किएका छन् । यहाँका १४ जना साइक्लिष्टहरु पाइडल पर पिसको सन्देश बोकेर आइतबार लुम्बिनीसम्मको साइकल यात्रामा निस्किएका हुन् । उनीलाई नगरपालिकाका निमित्त कार्यकारी प्रमुख गणेशप्रसाद खतिवडाले खादा लगाउनुका साथै राष्ट्रिय झण्डा फहराएर विदाई गरेका थिए । नगरपालिकाको कार्यलयबाट विदाई भएपछि धरान छोड्नुअघि साइक्लिष्टहरुले यहाँको सबै गुम्बाहरुमा पुगेर दर्शन गरेका थिए ।
 टुर डे लुम्बिनी कार्यक्रम काठमाण्डौंबाट सन् २०१२ देखि शुरु भएको थियो । शुरुका दुई बर्ष राजधानीबाट साइक्लिष्ट युवाहरु लुम्बिनीसम्म साइकलबाट पुगेका थिए । यस बर्ष भने धरान बाइकिङ क्लबको पहलमा यहाँका युवाहरु पनि टुर डे लुम्बिनीमा सहभागी भएका हुन् । चौध साइक्लिष्टमध्ये ३ जना युवती पनि छन् । शान्ति, सम्मृद्धि र समुन्नतिको कामनासँगै धरानलाई पर्यटकीय गन्तब्यकोरुपमा चिनाउन एवं वातावरणमैत्री बनाउन कार्यक्रममा सहभागी भएको क्लबका सचिव आशिक साहनीले बताए । ‘धरानलाई साइकलमैत्री शहरकोरुपमा चिनाउन, वातावरण संरक्षण र पर्यटकीय गन्तव्यकोरुपमा चिनाउने उद्देश्य छ’–उनले भने ।

यात्रामा साइक्लिष्टहरु फरेन लिम्बू, मिङमा चुक्टे शेर्पा, अनिता ताम्राकार, आशिक साहनी, रिया लिम्बू, देवेन्द्र थेगिम, प्रविण राई र सपन लिम्बू छन् । यस्तै, अञ्जना लिम्बू, सन्तोष लिम्बू, दिलिप रोनाहाङ, दिलिप चौधरी, नोवाहाङ लिम्बू र किरण राई पनि यात्रामा सहभागी छन् । धरानबाट प्रस्थान गरेको यो टोलीले सोमबार नारायणगढमा राजधानीबाट आउने टर डे लुम्बिनीको टोलीलाई भेट्नेछ र, उनीहरुसँगै मिमिएर बुद्ध जयन्तीको दिन लुम्बिनी पुग्नेछ । राजधानीबाट पनि एक टोली आइतबार नै लुम्बिनीतर्फ प्रस्थान गरिसकेको छ । धरान र राजधानीको गरि पाँच दर्जन बढी साइक्लिष्टहरु टुर डे लुम्बिनीमा सहभागी हुने क्लबका सचिव साहनीले बताए । साइकल यात्रीहरुलाई विदाई गर्दै धरान नगरपालिकाका निमित्त कार्यकारी अधिकृत खतिवडाले धरानको पर्यटन प्रर्वद्धनमा नयाँ आयाम थपिने विश्वास व्यक्त गरे । ‘साइकल पर्यटनको विकास हुनसक्यो भने धरानको पर्यटन प्रर्वद्धनमा नयाँ आयाम थपिनेछ भन्ने आशा लिएको छु’–उनले भने ।