विदेशमा बस्नेलाई धरानेको कोसेली: सुकुटी
‘दिदीको साथी जादैछ, उहाँलाई मनपर्ने भएकोले सुकुटी पार्सल पठाइदिन लागेको हो’–धरान ६, कुसुम बजार(छाप्रीलाइन)मा सुकुटी पसलमा भेटिएकी उनले भनिन् । मैया मात्रै होइन, विदेशमा रहेका आफन्तजनलाई यता(घर)बाट कोसेली(पार्सल)को रुपमा सुकुटी पठाउने चलन बढ्दो छ । स्थानीयस्तरमा उत्पादन हुने सुकुटीको माग यहाँको बजारमा त छदैछ, सात समुन्द्र पारी विदेशमा पनि अत्यधिक छ । विभिन्न कारणले विदेशिएका आफन्तजनहरुलाई परिवारले कोसेलीकोरुपमा सुकुटी पठाउने चलनले यसको कारोबार पनि बढ्दो छ ।
व्यापारी तामाङका तीन पुस्ताले सुकुटी व्यापारमा बिताएका छन् । उनका अनुसार एक पसलबाट दैनिकरुपमा कम्तीमा ३० केजी सुकुटी बिक्री हुन्छ । सुख्खा सुकुटीको प्रतिकेजी १३ सय रुपैयामा कारोबार भइरहेको छ भने चिसो सुकुटीको प्रतिकिलो १२ सय रुपैया पर्छ । सुकुटीको यो नयाँ मुल्य भर्खर बैशाख १ गतेबाट कायम भएको हो । त्यसअघि, प्रतिकेजी एघार सयमा कारोबार हुन्थ्यो । धरानका अधिकांश होटल, रेष्टुरेष्ट व्यावसायीहरुले आफ्नो होटलमा खपत हुने सुकुटी आफै बनाउने गर्नाले पनि सुकुटीको कारोबार विदेश निर्यातमा भर पर्ने गरेको व्यापारीहरु बताउछन् ।
व्यापारीहरुका अनुसार रागा र भैसीको मासु किनेर ल्याएपछि त्यसबाट नशा, बोसोलगायत अनावश्यक वस्तु छिलेर झिकिन्छ । त्यसपछि आगोमा ४८ घण्टा(पुरै २ दिन) सुकाएपनि मात्रै सुकुटी बन्छ । चार केजी राम्रो मासुको एक केजी सुकुटी बन्ने व्यापारीहरु बताउछन् । ‘मासुको आ आफ्नै ठेक्का हुन्छ, हामी प्रतिकिलो ३ सय रुपैयामा मासु ल्याउछौं, ४ केजीको एक किलो सुकुटी बन्छ’–व्यापारी गीताले भनिन् ।
Comments
Post a Comment