रोयल इष्र्टन इनफिल्डर्स क्लबको बिबिक्यु र डिनरमा सहभागी हुँदा

 धरान । कसैको कानमा टप, कसैको झ्याम्प जुल्फी कपाल । धराने युवाहरुको साँझको समयमा बिबिक्यु र डिनर पार्टी । यस्तो माहौल मदिराविना कसरी जम्न सकिएला ? तपाई यस्तो सोच्दै हुनुहुन्छ भने त्यो गलत हुनेछ ।

कुनै समय लागुपदार्थ एवं दुव्र्यसनले वदनाम बनेको धरानका बुलेट राइडर युवाहरु अचेल आफ्नो ठाउँको पुरानो परिचय बदल्न जुटेका छन् । रोयल इष्र्टन इनफिल्डर्स क्लबमा आवद्ध युवाहरु आफु पनि मदिरा पिउदैनन् र अरुलाई पनि नपिउन सल्लाह दिन्छन् । मदिरा पिएर भन्दा बुलेट राइड गरेरै जीवनमा मजा लिनुपर्छ भन्ने उनीहरुको मान्यता छ । ‘हामी पार्टीमा होस् वा राइडमा कतै जादा होस, कसैले पनि ड्रिंकस्(मदिरा) लिदैनौं’–क्लबका अध्यक्ष योगेन राईले भने–‘हामी ड्रिंक गरेर कहिल्यै पनि चलाउदैनौं र गन्तव्यमा पुगेपछि पनि सबैलाई पिउन मनाही गछौं ।’ बुलेट राइड नै आफुहरुको नशा भएकोले क्लबमा आवद्ध हुने युवाहरुलाई मदिरा निषेध गरिएको उनले बताए ।
बुलेट चढ्ने यहाँका युवाहरु गतबर्ष एकत्रित हुदै क्लब गठन गरेका थिए । त्यसयता नै उनीहरुले क्लबमा आवद्ध हुने युवाहरुलाई मदिराजन्य पदार्थ पिउन नपाउने नियम बसाले । क्लब गठन भएको मंगलबार ठिक बर्षदिन पुग्यो । त्यसैको अवसरमा आयोजित बिबिक्यु तथा डिनर पार्टीमा पनि कसैले मदिरा पिएनन् । बर्षातले करिब चार घण्टा लम्बिएको प्रथम बार्षिकोत्सव कार्यक्रममा क्लब सदस्य र अतिथिहरु सबैले कोक, स्प्राइटलगायत सफ्ट ड्रिंकस् नै पिए । युवाहरुले राइड र पार्टीसँगै जीवनमा मदिरालाई निषेध गरेको देखेर अतिथिहरुले पनि प्रसंसा गरे । ‘समाजको लागि केही गरौं भन्ने युवाहरु छन्, उहाँहरुले मदिरापान नगरेको सुन्दा, देख्दा खुशी लागेको छ’–होटल व्यावसायी महासंघ नेपालका केन्द्रीय सदस्य महेन्द्र प्रधानले भने–‘पिएरै मात्र रमाईलो हुदैन । मद्यपान, धुमपानविना पनि त साथीभाईबीच रमाउन सकिन्छ भनेर यो क्लबले राम्रो उदाहरण पेश गरेको छ ।’
क्लबमा आवद्ध हुनुअघि कतिपय युवाहरुले मदिरा पिउथे । तर, क्लबमा सक्रियता बढाएपछि भने उनीहरुले पनि पिउन छोडेका छन् । दुव्र्यसन त्यागेर समाजमा स्थापित हुन चाहिरका कतिपय युवाहरुको लागि क्लब सारथी बनेको छ । ‘रिकभरिङ्ग हुदै गरेका साथीभाईहरुलाई पनि सहज भएको छ । क्लबमा आएपछि चटक्कै छाडेका पनि छन्’–सचिव सुवास आलेमगरले भने । क्लबमा आवद्ध भएपछि रुकेश राईले मदिरा पिउन छोडेको ७ महिना बढी भइसक्यो भने तिलक राईले पनि चटक्कै छाडिसकेका छन् । ‘धरानप्रति र धरानका युवाहरुप्रति हेर्ने दृष्टिकोण परिवर्तन गर्ने प्रयासमा छौं, धराने युवाहरु लागुपदार्थ र कुलतमा मात्रै छैनन् है भन्ने सन्देश दिन चाहन्छौं’–उनले थपे । क्लबका अनुसार पूर्वमा करिब दुई सयको हाराहारीमा बुलेट राइडरहरु रहेको अनुमान छ भने धरानमा मात्रै सयको हाराहारीमा युवाहरुले बुलेट चढ्छन् ।
बुलेट राइडरहरु कतै भेट हुदा र छुटिदा ‘जय बुलेट ! ’ भन्दै हात मिलाउछन् । क्लब गठन भएपछि उनीहरु धनकुटाको हिले, तेह्रथुम, डाँडाबजार, राजारानी, चितवन, ताप्लेजुङ्ग, काठमाण्डौं, पोखरालगायत क्षेत्रमा मजा लिइसकेका छन् । आफ्नै खर्चमा यसरी डुल्दा उनीहरु पर्यटन प्रर्वद्धन पनि गरिरहेका हुन्छन् । दुव्र्यसन तथा मदिरा विरोधी सन्देश पनि पुर्याइरहेका हुन्छन् । । राजनैतिक दलहरुले युवा शक्तिलाई गलत उद्देश्यमा प्रयोग गरेकोप्रति उनीहरुको विमति छ । ‘हामी कुनै दलको पछि लाग्दैनौं, र हाम्रा साथीहरुलाई यूज हुन पनि दिदैनौं’–कोषाध्यक्ष इन्द्रबहादुर लिम्बूले भने । क्लबले राइडमा जादाको तस्वीर, भिडियो पनि तयार पारेर समाजिक सञ्जालहरुमार्फत प्रचारप्रसार पनि गरिरहेका छन् ।
विदेशबाट घर फर्किएका युवाहरुलाई पनि क्लबले राहत मिलेको छ । यहाँ क्लब गठन भएपछि सिंगापुर पुलिसमा कार्यरत युवाहरुले पनि करिब ६ महिनाअघि रोयल सिंगापुर इनफिल्डर्स नाम दिएर संगठित भए । उनीहरु प्रत्येक ३ महिनामा ६ महिने विदामा घर आउदा पुराना साथीभाईसँग भेटघाट गर्छन् र राइडमा जान्छन् । ‘युवा साथीभाईहरु कुलतबाट टाढै रहेर धरानको छवि राम्रो बनाउन सक्रिय भएको देख्दा खुशी छौं’–रोयल सिंगापुर इनफिल्डर्सका हेम लिम्बूले भने । मंगलबार साँझ यो समुहले रोयल इष्टर्न इनफिल्डर्स क्लबलाई सहयोग स्वरुप ५ हजार एक सय पनि हस्तान्तरण गरेको थियो । धरानका प्याराग्लाइडर राम राईले क्लब पर्यटन प्रर्वद्धन र सामाजिक सचेतनामा कार्यमा अग्रणी रहेको बताए । यस्तै, समाजसेवी सुजन शाक्यले युवाहरुलाई क्लबले कुलतबाट जोगाउदै सामाजिक कार्यमा सक्रिय गराएर उदारहणीय काम गरेको बताए ।
(साउन १७ गतेको नागरिक पूर्वेलीमा प्रकाशित समाचार)
..............
फोटो क्याप्सनः
रोयल इष्टर्न इनफिल्डर्स क्लबको प्रथम बार्षिकोत्सवको तस्वीरहरु ।