गुटबन्दी र विवादकै बीचमा महिला युथफोर्स गठन
धरान । युवा नेताहरुको विवाद र विरोधकाबीच धरानमा आयोजना भएको युवा संघ नेपालको राष्टिय युवा महिला भेलाले महिला युथफोर्स गठन गरेको छ । पार्टी अध्यक्ष झलनाथ खनाललेसमेत भेला स्थगित गर्न दिएको निर्देशनविपरीत शनिबार युवा महिला भेलाले ७५ सदस्यीय महिला युथफोर्स गठन गरेको हो । संविधानसभा निर्वाचनलाई लक्षित गरेर गठन गरिएको फोर्सको प्रमुखमा संघकी उपाध्यक्ष निरु पल छिन् । यस्तै, तीन जना उपप्रमुखहरुमा संघकी सचिव तथा महिला विभाग प्रमुख अञ्जली अधिकारी, सरस्वती खड्का र शान्ता राई छन् भने सचिवमा वालिका खड्का रहेकी छिन् । फोर्समा हाल भेलामा सहभागी ६१ जिल्लाको प्रतिनिधित्व छ । पछि बाँकी रहेका जिल्लाको पनि प्रतिनिधित्व गराएर फोर्स विस्तार गरिने संघले जनाएको छ ।
पुरुष युथ फोर्सको गठन भने भदौ २९ र ३० गते चितवनमा आयोजना हुने राष्टिय कार्यकर्ता भेलाबाट घोषणा गरिने अध्यक्ष महेश बस्नेतले बताए । महिलाहरुमा प्रतिरोधी क्षमता र जुझारुपन बढाउन फोर्स गठन गरिएको अध्यक्ष बस्नेतको भनाई थियो । घरघरमा तथा गाउँ गाउँमा चुनावी लहर ल्याउन र हिंसा, अत्याचारविरुद्ध प्रतिरोध क्षमता बढाउन पनि फोर्सको आवश्यकता रहेको उनले बताए । ‘महिलामाथि हिंसा गर्नेहरु, बलात्कारीहरु सावधान, अब युथफोर्स आयो, आयो’–बस्नेतले भने–‘अब देशभर महिला हिंसा, बलात्कारी, अन्याय गर्नेहरुको प्रतिरोध महिला युथ फोर्सले गर्नेछ ।’ आगामी निर्वाचनमा एमालेलाई पहिलो शक्ति बनाउन फोर्स गठन गरिएको उनले बताए ।
भेला आयोजनाबारे संघका विवाद चर्कैदै गएपछि पार्टी अध्यक्ष खनालले नै स्थगित गर्न दिएको निर्देशन विपरीत आयोजना भएको भेलाको उद्घाटन भने पार्टी उपाध्यक्ष विद्यादेवी भण्डारीले गरेकी थिइन् । महिल युथफोर्स गठनले पार्टीलाई नयाँ आयाम दिएको भन्दै उनले एमालेलाई पहिलो पार्टी बनाउने दाबी गरिन् । ‘वाइसिएलले समाजमा त्रास फैलाएर लुटपाट, हिंसा मच्चाएको थियो, अब त्यस्तो हुनेछैन’–उपाध्यक्ष भण्डारीले भनिन्–‘त्रसित मनस्थितिमा अघि बढ्न गाह्रो हुन्छ, भयमुक्त अवस्थामा मात्रै आफ्नो विवेकले अघि बढ्न सकिन्छ ।’ उनले जनसंगठनहरुलाई सांगठनिक स्वायत्तता दिएको भन्दै पार्टी अध्यक्षको निर्देशनप्रति असहमति पनि जनाइन् । ‘पार्टीले नीतिमा मात्रै निर्देशन दिनसक्छ, अनावश्यक हस्तक्षेप गर्नसक्दैन’–उनले भनिन् ।एमाले सचिव शंकर पोख्रेलले पनि फोर्सले जनता र समाजलाई भयमुक्त बनाउने धारणा राखे । जनतामा प्रतिरोधी क्षमता नहुदा विगतमा हिंसा र आतंकको राजनीतिलाई पहिलो शक्तिकोरुपमा स्थापित गरेको भन्दै उनले युथ फोर्सले आउदो संविधानसभाको निर्वाचनलाई भयरहित र निष्पक्ष बनाउने दाबी गरे । उनले पनि पार्टीले विधि, प्रक्रिया र नीतिमा मात्रै चासो राख्ने भन्दै अध्यक्ष खनालको निर्देशनप्रति असहमति जनाए । ‘अहिले पार्टीभित्र एकथरी साथीहरु जबज परिवर्तन गर्नुपर्छ भनिरहनुभएको छ, म भन्छु जबज होइन कामरेड, ज्बजले तपाईलाई रुपान्तरण गर्छ, यो सिंगो समाजलाई रुपान्तरण गर्छ’–उनले भने ।
प्रहरी घेरामा एकदिनमै सकियो भेला
अध्यक्षले एकलौटी निर्णय गरेर मिति तोकेको भन्दै भेलामा संस्थापन पक्षका भनिएका उपाध्यक्षहरु झपट रावल, दिलकुमारी पन्त, सुर्य ढकाल, सचिव मञ्जु यादवलगायत भने भेलामा सहभागी भएनन् । भेलामा ६१ जिल्लाबाट ४ सय ११ जना महिला युवा प्रतिनिधिहरु सहभागी भएको आयोजकले जानकारी दिएको छ । तर,विवादको कारण भेला आयोजना भएको जिल्ला सुनसरीको युवा संघको जिल्ला कमिटि र एमाले पार्टीले भने आधिकारिकरुपमा सहभागी भएन । विवाद चर्किएको भन्दै संघको जिल्ला कमिटिले व्यावस्थापनको जिम्मा नलिएपछि कोशी अञ्चल कमिटिले व्यावस्थापन गरेको थियो ।
(०७० भदौ २ गतेको नागरिक दैनिकमा प्रकाशित समाचार) ।
Comments
Post a Comment