कमिशन खान बिरामीको जाँच गर्न बाहिर रेफर

धरान । बीपी कोइराला स्वास्थ्य विज्ञान प्रतिष्ठानका वरिष्ठ एवं दक्ष चिकित्सकहरुले नै उपचारको क्रममा गरिने परीक्षणहरु विभिन्न बहानामा बाहिर पठाउने गरेको खुलेको छ ।
अस्पताल प्रशासनको निर्देशन अटेर गर्दै परीक्षणहरु बाहिर पठाउने क्रम नरोकिएपछि प्रतिष्ठानस्थित कर्मचारी कल्याण समाजले बिहिबार अनुगमन गर्दा यस्तो भेटिएको हो । प्रतिष्ठानको नियमविपरीत यस्तो कार्यमा प्रतिष्ठानका केही प्राविधिक कर्मचारीहरुको पनि संलग्नता रहेको भेटिएको छ । समाजको एक टोली बिहिबार प्रतिष्ठानबाहिर खुलेको विभिन्न निजी क्लिनिक तथा परीक्षण केन्द्रहरुमा पुग्दा अधिकांश विरामीहरुलाई प्रतिष्ठानका चिकित्सकहरुले नै परीक्षण गर्न पठाएको फेला परेको थियो । समाजको टोलीले प्रतिष्ठानबाहिरको धरान डायग्नोष्टिक सेन्टर र धरान इमेजिङ एण्ड रिसर्च सेन्टरमा अनुगमन गरेको हो ।
अनुगमनको क्रममा बीपीका सर्जरी विभाग प्रमुख डाक्टर सि.एस.अग्रवाल, डा. निकेश श्रेष्ठ, डा.श्याम गुप्ता, डा.अजय अग्रवाल, डा.विजेन्द्र राई, डा.ध्रुवचन्द्र थापा, डा.जि.एल. झा, डा.अजय अग्रवाललगायतले ती सेन्टरमा विभिन्न जाँच गर्न पठाएको भेटिएको थियो । धरान इमेजिङमा भेटिएका बीपीका ३० जना विरामीमध्ये २२ जनालाई त सर्जरी विभागका प्रमुख अग्रवालले मात्रै पठाएको भेटिएको थियो । प्रतिष्ठानस्थित रेडियोलोजी विभागका प्राविधिक महम्मद रेजा अवारी धरान इमेजिङमा भेटिएका थिए । उनले त्यहाँ आफु काम गर्न नभई आफन्तको अल्ट्रासाउण्ड गर्न त्यहाँ आएको बताएका थिए ।
कतिपय विरामीको प्रतिष्ठानभित्र परीक्षण तथा जाँच गरिसकेपनि चिकित्सकले पुनः बाहिरका सेन्टरमा जाँच गर्न पठाएको विरामी तथा तिनका आफन्तहरुले बताए । ‘बीपी भित्र जाँच गरेको थिएँ, डाक्टरले नै रिपोर्ट स्पष्ट भएन भनेर यहाँ पठाउनु भएको हो’–धरान १५ का अंकित श्रेष्ठले भने । उनलाई सर्जरी विभागका प्रमुख डा.अग्रवालले जाँच गर्न धरान इमेजिङमा पठाएका थिए । बीपीका विरामीहरुलाई चिकित्सकहरुले अल्ट्रासाउण्ड, सिटि स्क्यान, एक्स रे, रगत परीक्षण, दिसा, पिसाबसम्मका जाँचहरु ती सेन्टरमा गर्न पठाएको भेटिएको कर्मचारी कल्याण समाजका अध्यक्ष सुजेन्द्र तामाङले बताए । यी सबै जाँचहरुको सेवा बीपीमा उपलब्ध छन् । ‘बीपी भित्र जाँच गरेर रिपोर्ट आइसकेको विरामीलाई पनि स्पष्ट भएन, क्रस चेक गरौ न भन्दै बाहिर पठाउदा रहेछन्’–अध्यक्ष तामाङले भने–‘कतिसम्म वद्माशी भएको छ भने पेइङ सेवाका विरामीलाई पनि बाहिरै पठाउदो रहेछ, पेइङलाई त बीपीभित्रै तत्कालै जाँच गरेर रिपोर्ट पाउने व्यवस्था छ ।’
अनुगमनको क्रममा धरान इमेजिङमा विरामीको परीक्षण पछि परीक्षण सेवा गुणस्तरीय र विश्वासनीय रहेछ भन्ने व्यहोराको कबुलियतनामामा हस्ताक्षर गराउने गरेको पनि फेला परेको थियो । यो कबुलियतनामा बीपीबाट विरामी पठाउने डाक्टरको रेकर्ड भएको र त्यसैको आधारमा ती सेन्टरबाट चिकित्सकले कमिशन पाउने गरेको समाजको दाबी छ । ‘बीपीको तलब खाएर आफ्नै संस्थालाई धारासायी बनाउने त्यस्ता चिकित्सक, कर्मचारीको पहिचान गरेर अस्पताल प्रशासनमा कारबाहीको लागि दबाब दिन्छौं, बानी नसुधारे उनीहरुलाई बीपीमा काम गर्ने कुनै अधिकार छैन, हामी निषेध गछौं’–अध्यक्ष तामाङले भने–‘भदौ १ गतेदेखि हामी बाहिरको रिपोर्ट प्रतिबन्ध लगाउछौ, त्यसैले बीपीमा सुविधा भएको परीक्षण बाहिर नगर्न आमसर्वसाधारण र डाक्टरहरुमा अपिल गछौं ।’
सर्जरी विभागका प्रमुख डा.अग्रवालले सञ्चारकर्मीलाई प्रतिक्रिया दिदै आफुले बाहिर नपठाएको दाबी गर्दै कहाँ परीक्षण गर्ने विरामीको अधिकार भएको बताए । यस्तै, मेडिसिन विभागका डाक्टर निकेश श्रेष्ठले सञ्चारकर्मीहरुसँग बीपी भित्रको रिपोर्ट राम्रो नहुने भएकोले परीक्षण गर्न बाहिर पठाउनुपर्ने बताए । ‘सुधार गर्न अस्पताल व्यावस्थापन चासो राख्दैन, बीपी प्रतिष्ठान कहिल्यै सुध्रिदैन’–उनले थपे । प्रतिष्ठानका उपकुलपति डा.बलभद्रप्रसाद दासले भने प्रतिष्ठानभित्रै परीक्षणको व्यवस्था हुदाहुदै अन्यत्र पठाउने गरेको भेटिए ती चिकित्सकहरुलाई स्पष्टीकरण सोधिने बताए । बीपीको रिपोर्टमा चित्त नबुझेको भए सम्बन्धित विभागका प्रमुखसँग छलफल गर्नुपर्नेमा नियमविपरीत अन्यत्र पठाउनु गलत भएको उनले बताए । ‘बाहिर क कस्ले पठाएको हो, नाम आएपछि स्पष्टीकरण सोध्छौं । चित्तबुझ्दो भएनभने नियमावलीअनुसार कारबाही हुन्छ’–उपकुलपति डा.दासले भने–‘हाम्रो कुनै परीक्षणको रिपोर्ट चित्त नबुझे त्यो विभागको प्रमुखसँग कुरा गर्ने पो हो त, त्यसो नगरि बाहिर पठाउछु भन्नु ठिक हुन्छ ?’
प्रतिष्ठानका विभागीय प्रमुखहरुसँगको प्रत्यके वैठकमा बाहिर नपठाउन यो बिषयमा छलफल हुने गरेको उनले जानकारी दिए । चिकित्सकहरु नैतिकरुपमा जिम्मेवार महशुस नगरेसम्म कारबाहीले मात्रै नियन्त्रण सम्भव नहुने भएकोले हरसम्भव प्रयास भइरहेको उपकुलपति डा.दासको भनाई छ । ‘यहाँबाट रिपोर्ट ढिलो आउछ भन्ने गरेकोले पनि फास्ट ट्रयाक ल्याब बनाउन अस्पताल निर्देशकलाई निर्देशन दिइसकेको छुँ, त्यहाँ अहिलेको भन्दा केही बढी शुल्क तिरेर तत्कालै जाँच र रिपोर्ट पाउने व्यवस्था हुनेछ’–उपकुलपति दासले भने ।
प्रतिष्ठानमा सबै टेष्ट र परीक्षणहरुको व्यवस्था भएपनि केही चिकित्सकहरुले परीक्षण गर्न बाहिर पठाउने गरेपछि अस्पताल प्रशासनले बाहिर नपठाउन निर्देशन दिएको थियो । तर, निर्देशन अटेर गरेर विरामीको जाँच बाहिर पठाउदा प्रतिष्ठानलाई ठुलो आर्थिक नोक्सानी भएको भन्दै कर्मचारी कल्याण समाजले भदौ १ गतेदेखि बाहिरको परीक्षणको रिपोर्टको आधारमा उपचार गर्न निषेध गर्ने घोषणा गरेको छ । यसअघि, अस्पतालले विरामीको सुविधाको लागि केही महिनाअघिदेखि ल्याबको समय तालिका पनि विस्तार गरिसकेको छ भने बिहान ११ बजेसम्मको सेम्पल कलेक्सनको रिपोर्ट त्यही दिन बेलुकासम्म दिने व्यवस्था गरेको छ । पहिला दिउँसो १ बजेपछि २ बजेसम्म ल्याब वन्द हुने गरेपनि अचेल त्यो समयमा पनि सेवा दिइन्छ भने साँझ ८ बजेसम्म ल्याब खुल्लै रहन्छ । ल्याबमा परीक्षण हुने रगत, खकार, दिसा, पिसाब र एक्सरेलगायतको परीक्षणहरु बिहान एघार बजेसम्म बुझएकोमा त्यसैदिन बेलुकासम्म उपलब्ध हुन्छ ।
 (०७० साउन ३२ गते नागरिक दैनिकमा प्रकाशित समाचार)