धरानका डि.जे.हरु संगठित हुदै

धरान । एक समय थियो, धरानका डि.जे.(डिस्क जकी) हरुको डिमान्ड अत्यधिक थियो । डान्स पार्टीको लहर यस्तो थियो कि जुन सुकै अवसरमा पनि धरानमा डान्स पार्टी भइहाल्थ्यो । हरेक महिना कुनै न कुनै वहानामा हुने पार्टीमा धराने युवाहरु मस्तसँग झुम्थे, डि.जे.हरुको पनि ब्यस्त । डिजेइङविनाको डान्स पार्टी वा नाइट क्लबहरु खल्लो हुन्छ ।
तर, हिजोआज भने धरानमा शुन्यता छाएको छ । औलामा गन्न सकिने नाइट क्लब र अक्कल झुक्कलमा हुने डान्स पार्टीमा मात्रै डि.जे.हरुका डिजेइङ कला देखिन्छन् । डिजेइङ पेशा नै संकटमा पर्न थालेपछि भने अहिले धरानका डि.जे. युवाहरु संगठित हुने प्रयासमा छन् । उनीहरुले धरान डि.जे.एशोसिएशन नामको संस्था गठन गरेर दर्ता गराउने पहल गरिरहेका छन् । ‘दुई तीन बर्षयता डान्स पार्टी ज्यादै कम हुनथाल्यो, त्यसैले हाम्रो पेशा पनि संकट भएकोले संगठित हुने पहल गर्दैछौं’–डि.जे.डबल बिले भने–‘चाडैं संस्था दर्ता गछौैं र डि.जे.पेशालाई व्यावसायिक बनाउन सक्रिय हुन्छौं ।’
संगठित हुने पहलमा रहेका डि.जे.हरुले आइतबार मित्रता दिवसको अवसरमा ओ टु पब एण्ड बारमा गेट टुगेद पार्टी आयोजना गरेर संस्थाको अवधारणाबारे प्रष्ट्यएका थिए । समाजले डान्स पार्टी र डि.जे.प्रति नकरात्मकरुपमा हेर्ने भएकोले त्यो धारणा परिवर्तन गराउन पनि संगठित हुनजरुरी रहेको उनीहरुको भनाई छ । ‘अहिलेसम्म हामी एक्ला एक्लै काम गथ्र्यौ, एकजुट नहुदा हाम्रो पेशा नै धरापमा परेहो हो कि भन्ने लागेको छ’–अर्का डि.जे. नेक्स स्याडोले भने–‘अब संस्था दर्ता गरेर कार्यालय खोल्छौं र डान्स पार्टी, डि.जे.प्रति समाजको धारणा सकारात्मक बनाउन नौलो खालका कार्यक्रमहरु बनाउछौं ।’ संस्था दर्ता पछि संस्थागतरुपमा नै पार्टीको बुकिङ गरिने र डि.जे.कला पनि सिकाउने उनले बताए ।
समाजले डान्स पार्टी र डिजेहरुलाई सहजरुपमा स्वीकार गरेको छैन । कोलाहाल मच्चाएको र छोराछोरी बिगारेको आरोपमा विरोध भएपछि कतिपय स्थानमा हिजोआज डान्स पार्टी आयोजना गर्न नै दिदैनन् । स्थान अभावले इभेन्ट म्यानेजमेन्टहरु सिथिल भएपछि यसको प्रभाव डि.जे.हरुमा पनि पर्न थाल्यो । तर, डि.जे.हरु भने डान्स पार्टी र डिजेप्रति समाज, अभिभावकको धारणा गतल भएको बताउछन् । ‘पार्टीले छोराछोरी बिग्रन्छन् भन्ने धारणा गलत हो, डान्स पार्टीले रिफ्रेसमेन्ट बनाउछ, त्यसैले कतिपय त आफ्नो श्रीमति, छोराछोरीको साथमा पनि आउछन्’–डि.जे.नेक्स स्याडो भन्छन्–‘डिजेइङ पनि कला हो, यो कलालाई पेशाकोरुपमा अपनाउन सकिन्छ ।’ पर्यटन प्रर्वद्धन गर्न रात्री जीवन आवश्यक हुने र रात्री जीवनको लागि नाइट क्लब र डि.जे. आवश्यक हुने उनले बताए ।
धरानमा हाल करिब एक दर्जन डिजेहरु सक्रिय छन् । धरानमा हाल डि.जे.डि.याक्खा, डि.जे.डबल बि, डि.जे.नेक्स स्याडो, डि.जे.चिता, डि.जे.ज्याक्युब, डि.जे. अनिललगायत डिजे युवाहरु छन् । धरानमा करिब एक दशक अघिदेखि डान्स पार्टीमा डिजेइङ हुनथालेको हो । धरानका पहिलो डि.जे. मिराक हुन् । उनी हाल अष्ट्रेलियामा छन् । पूर्वमा सबैभन्दा बढी डान्स पार्टी हुने ठाउँ धरान नै हो । धरानबाहेक पछिल्लो समय विराटनगर, दमक, इटहरीतिर पनि डान्स पार्टी आयोजना भएपछि त्यहाँ धरानबाटै डि.जे.हरु डिजेइङ गर्न जान्छन् । डान्स पार्टी अथवा नाइट क्लबहरुमा क्राउड(सहभागी)को मनोभावना बुझेर उनीहरुलाई गीत,संगीतमा झुलाउन सक्नु नै डि.जे.को कला हो । ‘क्राउडलाई विचार पुर्याएर कस्तो गीत, संगीत बजाउने भनेर डि.जे.ले बुझ्नसक्नुपर्छ र त्यही वातावरण अनुसार म्युजिक दिनुपर्छ’–अर्का डि.जे.चिताले भने ।
(०७० साउन २२ गते मंगलबार नागरिक दैनिकको पूर्वेली सँस्करणमा प्रकाशित समाचार)