पूर्वको ठुलो माउण्टेन बाइक शोरुम ग्रिनह्विल्सको उद्घाटन
धरान । पूर्वाञ्चलको अहिलेसम्मकै ठुलो र एक मात्र ब्राण्डेड माउण्टेन बाइकको शोरुम ग्रिनह्विल्स धरान शनिबारदेखि आधिकारीकरुपमा सञ्चालनमा आएको छ । धरान १९, धनकुटे रोडमा खुलेको शोरुमको युवा संघ नेपालका केन्द्रीय अध्यक्ष महेश बस्नेतले शनिबार एक समारोहबीच रिबन काटेर उद्घाटन गर्नुभएको थियो । साथै उहाँले माउण्टेन बाइकमा पनि केहीक्षण राइड गर्नुभएको थियो ।शोरुमको उद्घाटन गर्दै नेता बस्नेतले युवाहरु आयमुलक एवं व्यावसायिक काममा संलग्न हुनु स्वागतयोग्य काम भएको बताउनुभयो । साइकल शोरुमले पूर्वको पर्यटन विकासमा महत्वपूर्ण योगदान पुर्याउने उहाँको भनाई थियो । धरानलाई साइकल सिटि बनाउने अभियानका चार युवाहरु हेम लिम्बू, कृष्ण केसी, डा.समीर चौधरी र शिक्षक दिपक राईले यो शोरुम सञ्चालनमा ल्याएका हुन् । यो शोरुम विश्वप्रसिद्ध साइकल कम्मेन्सल र चेन ब्राण्डको माउण्टेन बाइक उत्पादक कम्पनीको पूर्वाञ्चल क्षेत्रको एक मात्र आधारिक डिलर हो । ललितपुरको झम्सीखेलस्थित इपिक माउण्टेन बाइक प्रालिको पूर्वाञ्चल क्षेत्रीय डिलरकोरुपमा यो शोरुम रहने सिइओ हेम लिम्बूले बताउनुभयो ।
शोरुममा कम्मेन्सल र चेन ब्राण्डको साइकलसँगै साइक्लिङलाई आवश्यक पर्ने हेल्मेट, ड्रेस, पञ्जा, टि सर्ट, हेडलाइटलगायत सबै ब्राण्डेड सामग्रीहरु उपलब्ध हुनेछ । यस्तै, काली, एक्जष्टर, म्याक्सिस, फन, सिग्मा, अल्पाइन स्टार, फक्सलगायत साइकल उत्पादन गर्ने विश्वप्रसिद्ध कम्पनीका ब्राण्डेड सामानहरु रहनेछ । शोरुममा डाउनहिल, अल माउण्टेन, फन राइड, पम्प राईड, बिएमएक्स, सिटि बाइक, एक्स ओ बाइकलगायत विभिन्न प्रकारका बाइक उपलब्ध हुनेछ । ती बाइकको मुल्य कम्तीमा २० हजारदेखि साढे ३ लाखसम्मको हुनेछ । पूर्वमा साइकल पर्यटनको सम्भावना भएकोले ७ दिने, १५ दिने टुर प्याकेज बनाएर पर्यटकहरुलाई नियमित राइडमा लैजाने ग्रिनह्विल्सले जनाएको छ । यस्तै, साइक्लिङप्रति आर्कषण बढाउन वातावरणमैत्री एवं स्वास्थ्यबारे जनचेतनामुलक कार्यक्रमहरु गर्ने व्यावस्थापक कृष्ण केसीले बताए ।
हुकमेनलाई काली हेल्मेट
नियमिति साइक्लिङ गर्ने धरानका युवा हुकमेन राईले क्रम कन्टी काली हेल्मेट पुरस्कार जितेका छन् । इपिक माउण्टेन बाइक र काली प्रोटेक्टिभले फेसबुकमार्फत काली हेल्मेटको प्रर्वद्धन गर्ने प्रतियोगितामा सहभागी हुकमेन गोलाप्रथाद्धारा विजेता बनेका हुन् ।
विजेता हुकमेनले १ सय ८९ डलर बराबारको काली मरक्का क्रसकन्टी हेल्मेट जितेका छन् । उनलाई शनिबार ग्रिनह्विल्स धरानको उद्घाटन समारोहमा इपिक माउण्टेन बाइकका प्रज्वल श्रेष्ठले पुरस्कार हस्तान्तरण गरेका थिए । सोही अवसरमा श्रेष्ठले ग्रिनह्विल्सका संस्थापकहरुलाई इपिकको आधिकारिक डिलरको प्रमाणपत्र पनि प्रदान गरेका थिए ।
Comments
Post a Comment