‘धरानबासीको खेलभावनालाई राज्यले सम्बोधन गर्नुपर्छ’

धरान । राष्टिय खेलकुद परिषदका पूर्व सदस्य सचिव पनि रहेका नेपाल ओलम्पिक कमिटिका महासचिव जीवनराम श्रेष्ठले खेलकुदप्रति धरानबासीहरुको रुचि र भावनालाई राज्यले उचितरुपमा सम्बोधन गर्न नसकेको बताएका छन् । उनले धरानबासीहरुको भावनाको कदर गर्दै भौतिक पूर्वाधार निर्माण गर्न सरकार र राखेपको ध्यानाकर्षण पनि गराएका छन् ।

‘धरानबासीहरुको खेलकुदप्रति जुन लगाव र रुचि छ, त्यस भावनालाई राज्यले उच्च प्राथमिकता दिनुपर्छ तर, अहिलेसम्म त्यसो हुन सकेको छैन’–एकमहिने जुनियर ब्याडमिन्टन प्रशिक्षण शिविरको समापन समारोहमा श्रेष्ठले भने–‘राज्यले खेलकुदको क्षेत्रमा धरानलाई सम्बोधन गर्न जरुरी छ । अहिले खेलकुदमा ५० करोड रुपैया छुटिएको छ, त्यसबाट धरानको लागि पनि आवश्यक बजेट विनियोजन गर्न म सरकार र राखेपसँग आग्रह गर्दछु ।’ पूर्वाधार विकास हुन सक्यो भने मात्रै खेलकुदको समग्र विकास हुनसक्ने भन्दै उनले जनताले संरक्षण, स्याहार सम्भार हुनसक्ने ठाउँमा मात्रै संरचना निर्माण हुनुपर्ने धारणा राखे । 

सरकारले सुनसरीमा बनाउने भनेको क्षेत्रीयस्तरको रंगशालामा स्थान विवाद हुँदा संरचना बन्न नसक्नुलाई उनले दुर्भाग्यपुर्ण भएको बताए । ‘ठाउँ विवादले क्षेत्रीय रंगशाला बन्न नसक्नु ज्यादै दुःखद र दुर्भाग्यपुर्ण हो, जहाँ उचित संरक्षण र स्याहार हुनसक्छ, त्यही बनाउनुपथ्र्यो’–पूर्व राखेप सदस्य सचिव श्रेष्ठले वीरगञ्जको उदाहारण दिदै भने–‘वीरगञ्जमा पनि क्षेत्रीयस्तरको रंगशाला छ, तर संरक्षण छैन । त्यस्तो ठाउँमा बनाएर हुदैन ।’ नेपाल ओलम्पिक कमिटिले राष्टिय झण्डा अन्र्तराष्टियस्तरमा पुर्याउने प्रयास गरिरहेको भन्दै उनले खेलाडी तथा प्रशिक्षकहरुलाई आधुनिक प्रविधियुक्त बनाउन लागिपरेको बताए ।

........................

जुनियर ब्याडमिन्टन प्रशिक्षण शिविर सम्पन्न

क्षमतावान जुनियर ब्याडमिन्टन खेलाडी उत्पदान गर्ने उद्देश्यले आयोजित एक महिने जुनियर ब्याडमिन्टन प्रशिक्षण शिविर शनिबार सकिएकोछ । 

धरान १३ स्थित पूर्व क्षेत्रीय प्रहरी आवासिय माविको कवर्ड हलमा सञ्चालित प्रशिक्षण शिविरको समापन अवसरमा जुनियर खेलाडीबीच आयोजकले प्रतियोगिता गराएको थियो । प्रतियोगितामा पुरुषतर्फ १५ बर्ष उमेर समुहमा पूर्वक्षेत्रीय प्रहरी आवासिय माविका देवेन्द्र मगर प्रथम, सोही स्कुलका मनोज खड्का द्धितिय र जुनियर पायनियर बोर्डिङ स्कुलका अर्पण राई तथा विष्णु मेमोरियलका अनिष कटवाल तृतीय भएका थिए । 

यसैगरि, पुरुषतर्फ १२ बर्ष उमेर समुहको स्पर्धामा लोटस विद्या विहारका आयुष लिम्बु पहिलो, होलि गार्डेन एकेडेमीका अनिकेत पलिखे दोस्रो र जुनियर पायनियरका निसान्त मेन्याङ्वो तथा युरेका आवासिय उच्चमाविका राहुलमान श्रेष्ठ तेस्रो भएका थिए । यस्तै, महिलातर्फ १५ बर्षमुनिका खुला स्पर्धामा विजयपुर उच्चमाविकी रिया कर्मचार्य प्रथम भईन भने ज्ञानोदय बोर्डिङकी सिमा राई दोस्रो र पूर्वक्षेत्रीय प्रहरीकी किरण तामाङ तथा युरेकाकी सुष्मिता लिम्बू तेस्रो भईन् । विजेता खेलाडीहरुलाई धरान ब्याडमिन्टन क्लबका अध्यक्ष मनोज मेन्याङ्बो, प्रमुख अतिथि एवं नेपाल ओलम्पिक कमिटिका महासचिव जीवनराम श्रेष्ठ, राष्टिय ब्याडमिन्टन संघका अध्यक्ष विरेन्द्र श्रेष्ठलगायतले मेडल तथा प्रमाणपत्र वितरण गरेका थिए ।

राष्टिय ब्याडमिन्टन संघको आयोजना, नेपाल ब्याडमिन्टन संघको प्राविधिक सहयोग तथा धरान ब्याडमिन्टन क्लबको संयोजनमा गत असार २९ गतेदेखि धरानमा एक महिने प्रशिक्षण शिविर आयोजना भएको थियो । शिविरमा धरानका विभिन्न दश वटा विद्यालयका ३९ जना विद्यार्थीहरु सहभागी थिए । उनीहरु सबै १५ बर्षसम्मका थिए । प्रशिक्षण सकिएपछि सहभागीहरुको परीक्षासरह समापन अवसरमा प्रतियोगिता आयोजना गरिएको स्थानीय संयोजन धरान ब्याडमिन्टन क्लबले जनाएको छ । ‘यिनै साना केटाकेटीहरु भविष्यका ब्याडमिन्टनका प्रतिभावन् खेलाडीहरु हुनेछन् भन्ने आशा लिएका छौं’–क्लबका अध्यक्ष मेन्याङ्बोले भने–‘यो प्रशिक्षणमा उत्कृष्ट ठहरिएका १० जना खेलाडीहरुलाई हामी नियमित प्रशिक्षण दिने व्यावस्था पनि गछौं ।’