स्वर्ण महोत्सव मनाउदै सुनसरी उद्योग वाणिज्य संघ

 धरान । स्थापनाको ५० औं बर्ष पुगेको अवसरमा सुनसरी उद्योग वाणिज्य संघले मंगलबारदेखि धरानमा तीन दिनसम्म विविध कार्यक्रम गरेर स्वर्ण महोत्सव मनाउदैछ ।
स्वर्ण महोत्सवको पहिलो दिन मंगलबारबाट एक गाउँ एक उत्पादन कार्यक्रमअन्र्तगत विभिन्न जिल्लामा उत्पादन भएका कृर्षिजन्य वस्तुहरुको प्रर्दशनी शुरु भएको छ । संघको सभाहलमा भएको प्रर्दशनीमा विभिन्न २२ जिल्लामा उत्पादन हुने कृर्षिजन्य उत्पादनहरु राखिएका छन् । प्रर्दशनीमा झापाको शान्तिनगर र शनिश्चरे गाविसमा उत्पादन हुने सुपारी, सुनसरीको विष्णुपादुका गाविसमा उत्पादन हुने बेसार, सप्तरीको आँप, दोलखाको लोक्ता, धनुषाको माछा, रामेछापको जुनार राखिएको छ । यस्तै, भक्तपुरको लप्सि, ललितपुरको सिम्बिडियम अर्किड, नुवाकोट र रसुवाको रेम्बो ट्राउट, चितवनको केरा, स्याङ्जाको कफि, पाल्पाको अदुवा, म्याग्दीको टिमुरलगायत कृर्षिजन्य उत्पादनहरु रहेको संघका कार्यकारिणी सदस्य एवं एक गाउँ एक उत्पादन कार्यक्रमका संयोजक मनोज श्रेष्ठले जानकारी दिए ।
अघिल्लो आर्थिक बर्षसम्म सरकारले नेपालका २२ जिल्लालाई एक जिल्ला एक उत्पादनमा समावेश गरेको थियो । हाल यो संख्या बढेर ३२ जिल्ला पुगेको छ । ‘सरकारले पहिचान गरेका जिल्लाको कृर्षिजन्य उत्पादनको बजार प्रर्वद्धनमा गर्न निजी क्षेत्रबाटै पहल हुनुपर्छ, यो प्रद्र्धशनी त्यसैको एउटा प्रयास हो’–संयोजक श्रेष्ठले भने– ‘गाउँको उत्पादनहरुको बजारीकरण गर्न र व्यवसायीहरुबीच सम्बन्ध बढाउन भुमिका खेल्छ ।’ मंगलबार नै सुनसरी जिल्लामा पर्यटन विकासका सम्भावना तथा चुनौतीहरु बिषयक क्याम्पसस्तरीय निबन्ध प्रतियोगिता आयोजना भएको छ भने एक गाउँ एक उत्पादनसँगै सोही हलमा हस्तकलाका उत्पादन र चित्रकलाहरु पनि राखिएका छन् । नेपाल ललितकला प्रतिष्ठानको चित्रकला र हस्तकला विभागले विभिन्न जिल्लामा बनाइएका हस्तकला तथा अघिल्लो दिन(सोमबार) धनकुटाको भेडेटारमा कलाकारहरुले बनाएको चित्रहरु प्रर्दशनीमा राखेको हो ।
संघको सभा हलमा दुई दिनसम्म प्रर्दशनी रहने र अन्तिम दिन सभागृहमा पनि ती सामग्रीहरुको प्रर्दशनी गरिने स्वर्ण महोत्सव मुल समारोहका संयोजक एवं निवर्तमान अध्यक्ष मोहनकाजी शाक्यले जानकारी दिए । ‘संस्था स्थापना भएको ५० औं बर्ष पुग्नु आफैमा गर्विलो इतिहास हो, यो अवधिमा संस्थाले के गर्यो, कस्ता उपलब्धीहरु हासिल गरे र भविष्यमा के गर्नुपर्छ भनेर आत्मसमिक्षा गर्न, आमजनतामा यी कुराहरु पुर्याउन स्वर्ण महोत्सव मनाउदैछौंं’–संयोजक शाक्यले भने–‘राज्यले लगानीको वातावरण बनाइदिनुपर्छ, निजी क्षेत्र स्थानीयस्तरमा पनि देश निर्माणमा अग्रसर हुन तयार छ भन्ने सन्देश पनि दिन चाहन्छौं ।’ संघले ५० बर्षको अवधिमा गरेका काम, गतिविधि र उपलब्धीहरुलाई समेटेर स्वर्ण स्मारिका प्रकाशन गरेको छ । संघको स्थापना २०२० साल भदौ १३ गते व्यापार प्रबन्ध समितिको नाममा भएको थियो । पछि ०५२ सालमा नाम फेरेर उद्योग वाणिज्य संघ सुनसरी बनाइएको थियो भने गत बर्ष पुनः विधान संसोधन गरेर नामको अघि सुनसरी थपेर सुनसरी उद्योग वाणिज्य संघ बनाइएको थियो ।
संघका अनुसार स्वर्ण महोत्सवकै अवसर पारेर बुधबार फिस्टुला स्वास्थ्य परीक्षण र इ लाइब्रेरी संचालनको शुभराम्भ पनि गरिनेछ । साथै, दिउँसो नेपाल पर्यटन बोर्डको सहयोगमा पर्यटन गोष्ठी पनि आयोजना हुनेछ । अन्तिम दिन भदौ १३ गते संघको वेभसाइट र श्रम बजारको उद्घाटन गरिने कार्यक्रम रहेको छ भने धरानलाई प्लाष्टिक झोलामुक्त नगरको घोषणा र सिसि टिभि क्यामेरा पनि उद्घाटन गरिने कार्यक्रम रहेको अध्यक्ष सरोज श्रेष्ठले बताए । योग्यता र सीप भएर पनि बेरोजगार बस्न बाध्य युवाहरुलाई रोजगार दिलाउन रोजगारदातासँग पुलको काम गर्न श्रमबजार सञ्चालनमा ल्याउन लागिएको उनको भनाई छ । भदौ १३ गतेदेखि नै संघले नगरपालिकाबाट वितरण हुदै आएको व्यावसाय दर्ता र प्रमाणपत्र वितरणको काम पनि शुरुवात गर्नेछ ।
....
                                              तीन दिन उपभोक्तालाई बिषेश छुट

सुनसरी उद्योग वाणिज्य संघको तीन दिने स्वर्ण महोत्सवको अवसरमार धरान र इटहरीका व्यवसायीहरुले ग्राहक एवं उपभोक्ताहरुलाई तीन दिनसम्म बिशेष छुट दिने घोषणा गरेका छन् । संघले दिएको जानकारी अनुसार धरानस्थित बराह इष्ड्रष्ट्रिज प्रालिले कपडाको सामानहरु खरीद गर्दा उपभोक्ताहरुलाई १५ प्रतिशत छुट दिने घोषणा गरेको छ भने धरानकै कान्छाकान्छी सपिङ सेन्टरले पनि कपडामा १५ प्रतिशत नै छुट दिने घोषणा गरेको संघका कार्यकारिणी सदस्य एवं महोत्सव प्रचारप्रसार संयोजक उपेन्द्र चाम्लिङले जानकारी दिए ।
यस्तै, बीपी कोइराला स्वास्थ्य विज्ञान प्रतिष्ठानभित्र सञ्चालित लाइफकेयर औषधि पसलले ५ प्रतिशत, धरान ४ स्थित दिपा स्टोरले जुत्ताचप्पलमा १० प्रतिशत, धरान २ स्थित तारा भाडा पसलले १० प्रतिशत, धरान ९ को पिलग्रिम साँझ होटलले खानामा १० प्रतिशत र लजमा २० प्रतिशत छुट दिने घोषणा गरेको छ । साथै, धरानको जगदिस प्रसाद सजन कुमारले खाद्यान्नमा बिषेश छुट दिने भएको छ भने इटहरीस्थित गोर्खा डिर्पाटमेन्ट स्टोरले सबै ग्राहकहरुलाई तीन दिनसम्म २ प्रतिशत छुट दिने घोषणा गरेको प्रचार संयोजक चाम्लिङले जानकारी दिए ।