भाटभटेनीको गोदाममा सिल

धरान । विभिन्न कम्पनीका म्याद गुज्रेको खाद्य वस्तुसमेत राखेको भेटिएपछि धरान १० स्थित भाटभटेनी सुपर मार्केटको स्टोरमा जिल्ला अनुगमन टोलीले आइतबार सिल गरेको छ । जिल्ला प्रशासन कार्यालय सुनसरीका प्रशासकीय अधिकृत केशव खतिवडाको नेतृत्वमा बजार अनुगमनमा निस्किएको टोलीले स्टक सामानहरुसँगै मिति नाघेको खाद्य सामानहरु पनि फेला पारेपछि सिल गरेको हो ।
म्याद गुज्रिएका सामाग्रीहरु कति परिमाणमा छन् भन्ने स्पष्ट खुल्न नसकेपछि तत्काललाई स्टोर सिल गर्ने निर्णय गरिएको खतिवडाले जानकारी दिए । उनका अनुसार टोली पुनः धरान आएर थप अनुसन्धान गर्ने जनाए । ‘के कति मात्रामा एक्स्पायर समानहरु छन् भन्ने रेकर्ड नै रहेनछ, हामीलाई अध्ययन गर्न पनि समय नभएकोले सिल गरेको हो’–खतिवडाले भने–‘कुन सामान एक्स्पायार हो, कुन फ्रेस हो भन्ने प्रष्ट नहुदा उपभोक्तालाई बिक्री हुनसक्छ नि ।’

भाटभाटेनीका कर्मचारीले एक्स्पायर सामान कम्पनीलाई फिर्ता गराउने भनेपनि अनुगमन टोलीलाई कति संख्या वा परिमाणमा छन् भनेर खुलाउन सकेनन् । स्टोरमा स्टक गरिएका समानहरु चेकजाँच गर्दा मिति नाघेका सामानहरु पनि भेटिएपछि भाटभटेनीले के कति सामान छन् भनेर रेकर्डसमेत देखाउन सकेन । भाटभटेनी कर्मचारीका अनुसार मिति नाघेको कोल्ड ड्रिंक्स, चकलेट छन् भने कुहिएको फर्चुनको आटा पनि छ ।
यसैगरि, अनुगमनको क्रममा धरान ४ छाताचोकस्थित शान्ति चिया तथा किराना पसलमा लेबल नभएको २ जार पानी फेला परेपछि टोलीले तत्काल नष्ट गरेको थियो । यस्तै, नापतौल तथा गुणस्तर कार्यालयबाट लाइसेन्स नलिई डिजिटल काँटा प्रयोग गरिरहेको पाएपछि टोलीले तीन दिनभित्र दर्ता गरेर प्रयोग गर्न लिखित निर्देशन दिएको छ  छाताचोकको शान्ति चिया तथा किराना पसल, ललन किराना पसल र गंगोत्री डेरीमा लाइसेन्स नलिई डिजिटल काँटा प्रयोग भएको अनुगमन टोलीले फेला पारेको थियो । नयाँ डिजिटल काँटा नापतौल तथा गुणस्तर क्षेत्रीय कार्यालय विराटनगरमा ३५ दिनभित्र दर्ता गरी अनुमति लिएर मात्र प्रयोग गर्न पाइन्छ ।
लक्ष्मी बेकरी उद्योगमा सरसफाईमा ध्यान नदिएको र उत्पादन मिति पनि नराखिएको भेटेपछि अनुगमन टोलीले दुवै कार्य गर्न कडा निर्देशन दिएको छ । बराह ज्वेलरी इण्ड्रष्ट्रिज प्रालिको डिपार्टमेन्टर स्टोर अनुगमनको क्रममा गोदाम(स्टोर) टोलीले देखाउन आग्रह गर्दा कर्मचारीले स्टोर नभएको जवाफ दिएपछि अनुमगन नगरी फर्किएको थियो । ‘बराहमा गोदाम देखाउ भन्दा स्टोर छैन भने, पछि स्टोर भएको भेटिएमा त्यसमा पनि कार्वाही हुन्छ’–खाद्य निरीक्षक रमेश दाहालले भने ।
जिल्ला प्रशासनको नेतृत्वमा हिडेको अनुगमन टोलीमा पशुसेवा कार्यालयका डा.कमल गिरी, सुनसरी उद्योग वाणिज्य संघका द्धितिय उपाध्यक्ष गिरीधारी सापकोटा, कृर्षि विकास कार्यालयका देवनारायण शाह, नापतौल क्षेत्रीय कार्यालय विराटनगरकी अनुजा घिमिरेसहित धरान उपमहानगरपालिकाका प्रतिनिधि, प्रहरीसमेत सहभागी थियो ।