सुरक्षा घेरामा अनुषाको अन्त्येन्टी, पोष्टमार्टम रिपोर्टमा के छ ?

धरान । रहस्यमय मृत्यु भएकी धरान १६ की तेह्र बर्षीया अनुषा राईको शुक्रबार विवाद र तनावपुर्ण अवस्थामा सुरक्षा घेराबीचमा अन्त्येन्टी गरिएको छ । पोष्टमार्टम पश्चात मृतकको शवलाई जैविक पिता(वास्तविक बुबा) जितबहादुर राईले जिम्मा लिएपछि शुक्रबार रितिरिवाजअनुसार अनुषाको अन्त्येष्टी गरिएको हो ।
मृतककी आमा र पुर्खाहरुको पनि दाहसँस्कारस्थ फुस्रेस्थित सर्दु खोला पारी लगेर अनुषाको शवको अन्त्येष्टी गरिएको धरान १६ की वडा नागरिक मञ्चकी अध्यक्ष एवं संघर्ष समितिकी संयोजक उर्मिला प्रधानले बताइन् । ‘मनिषाको शव शुरुमा काकाको घरमा लग्यौं, र रितिरिवाजअनुसार नै दाहसंस्कार भयो’–उनले भनिन् । शुक्रबार मृतकको अन्त्येष्टी पनि सहजरुपमा हुन सकेन । काकाको घरमा राखिएको शवलाई महिलाहरुको समुहले अन्त्येष्टीमा लैजान अवरोध गरेका थिए ।

प्रत्यक्षदर्शीहरुका अनुसार प्रहरीले आगजनीको आरोपमा पक्राउ गरेका युवाहरुलाई छुटाएर मात्र शव अन्त्येष्टीमा लैजान पाउने भन्दै अवरोध गरेका थिए भने कसैले वडा १६ स्थित आरोपित वलिमान र पदमकुमारीको घरमा नै अन्त्येष्टी गर्नुपर्ने अडान लिएका थिए । स्थिति तनावपुर्ण भएपछि प्रहरी स्कर्टिङमा अत्येष्टी सम्भव भएको थियो । ‘शव काकाको घरमा लगिएको थियो, रितिरिवाजको कार्य सकेपछि शव लैजानै दिएनन् । पहिला केटाहरु छुटाउनुपर्छ भने, कसैले वडा १६ कै घरमा गाड्ने भनेर अवरोध गरे’–ती प्रत्यक्षदर्शीले भने–‘पछि प्रहरीको स्कर्टिङमा लगियो ।’
धरान १६ का वलिमान र पदमकुमारी राईको घरमा करिब १० बर्षअघि धमीपुत्री बनाएर राखिएकी १३ बर्षीय अनुषाको सोमबार रहस्यमय मृत्यु भएको थियो । धर्मपुत्री बनाएपनि राई दम्पत्तिले अनुषालाई घरेलु कामदार बनाएको र यातना पनि दिने गरेको दाबी गर्दै मंगलबारदेखि नै सयौंको संख्यामा स्थानीयबासीहरुले प्रर्दशन गरिरहेका छन् । प्रदर्शनकारीहरुले राई दम्पत्तिको घर तोडफोड र आगजनीसमेत गरेका छन् । त्यसक्रममा दोहोरो झडपसमेत भएको छ भने प्रहरीले झण्डै ४ दर्जन अश्रु ग्याँससमेत प्रहार गर्नुपरेको थियो । बिहिबार राती राई दम्पत्तिको घरभित्रको सामान सडकमा निकालेर आगजनी गरेपछि प्रहरीले २१ जनालाई पक्राउ गरेको थियो । ती मध्ये १७ जनालाई मात्र प्रहरीले सामान्य अनुसन्धान गरेर छाडेको थियो । शुक्रबार बिहान थप १० जनालाई पक्राउ गरेर प्रहरीले कुल १४ जनालाई आगजनी मुद्दामा म्याद थप गरेको डिएसपी ढकेन्द्र खतिवडाले जानकारी दिए ।
स्थानीयबासीहरुले राई दम्पत्तिले अनुषाको हत्या गरेको आरोप लगाए पनि उनीहरुले प्रहरीमा दिएको वयान अनुसार सोमबार अनुषाले बिष(नाम खुल्न नसकेको) सेवन गरेकी थिइन् । तत्काल उनलाई बीपी कोइराला स्वास्थ्य विज्ञान प्रतिष्ठान पु¥याए पनि उपचारको क्रममा अनुषाको मृत्यु भएको थियो । राई दम्पत्तिले घटनाबारे छरछिमेकलाई समेत जानकारी नदिई सतगत गर्न शव राख्ने बाकस बनाउदै गरेको भेटेपछि हत्या गरिएको स्थानीयबासीहरुले आशंका गरेका थिए । वलिमान हेभन्ली पाथका सुनसरी अध्यक्ष पनि हुन् । दुई भाई छोरा मात्र रहेका उनीहरुले अनुषालाई छोरी बनाएर आफ्नै नाममा जन्मदर्तासमेत गराएका छन् । अनुषा धरान १६, जोरसुवास्थित सियोन इन्टरनेशनल स्कुलमा कक्षा ३ मा अध्ययनरत थिइन् ।
.................................................

                                                      पोष्टमार्टम रिपोर्टमा के छ ?

मृतक अनुषा राईको शवको पोष्टमार्टम बीपी कोइराला स्वास्थ्य विज्ञान प्रतिष्ठान धरानमा बिहिबार पोष्टमार्टम भएको थियो । पोष्टमार्टमको रिपोर्ट शुक्रबार चिकित्सकको टोलीले प्रहरीमा बुझाए पनि प्रहरीले गोप्य राखेको छ । पोष्टमार्टममा संलग्न चिकित्सक स्रोतका अनुसार अनुषाको मृत्यु चोटपटकबाट भएको देखिएन । बिष सेवनबाट अनुषाको मृत्यु भएको हुनसक्ने भन्दै ती चिकित्सकले थप पुष्टिको लागि भिसेरा परीक्षण गर्न प्रहरीलाई पठाएको खुलाए । ‘चोटपटकले मरेको देखिएन, कुनै ताजा चोटपटक छैन । पोइजनिङ हुनसक्छ, भिसेरा टेष्ट गर्न प्रहरीमा पठाएका छौं’–चिकित्सकले भने–‘बाँया हातमा ३, ४ ठाउँ काटेको देखिन्छ, तर पुरानो हो । ताजा चोटपटक एकदमै कम छ, ती चोटपटकले मान्छे मदैन ।’ मानसिक तनाव भएर हात आफैले काटेर आत्महत्याको प्रयास गरेको हुनसक्ने पनि ती चिकित्सकको भनाई छ ।
प्रदर्शनकारी तथा स्थानीयहरुले अनुषालाई बलात्कार गरिएको आशंका गरेका थिए । पोष्टमार्टमबाट बलात्कार भएको पुष्टि गर्ने योनीको वरीपरी ताजा चोटपटक एवं कुनै संकेत पनि फेला नपरेको चिकित्सकको भनाई छ । यद्यपी, चिकित्सक टोलीले वीर्यको कुनै अंश भेटिन्छ कि भनेर भेजाइनल स्वाब परीक्षणको लागि पठाइएको पनि फोरेञ्सिक विभाग स्रोतले जानकारी दिएको छ । ‘बलात्कार भएको देखिएन, तरपनि विगतमा यौन सम्पर्क भएको थियो थिएन भनेर जाँच गर्न भेजाइनल स्वाब परीक्षण गर्न पठाइदिएका छौं’–चिकित्सकले भने ।



...........