किताब प्रर्दशनीमा धरान बिशेष कार्यक्रम हुने

 धरान । बैशाख पहिलो साता विराटनगरमा हुन लागेको दश दिने ‘किताबसँग रंगहरु’ शिर्षकको पुस्तक प्रर्दशनीमा एक दिन धरान बिशेष कार्यक्रम हुने भएको छ । प्रर्दशनीलाई सफल बनाउन धरान १८ स्थित विमल स्मृति पुस्तकालयमा आयोजित छलफलमा आयोजक तथा धराने लेखक, साहित्यकारहरुबीच यस्तो समझदारी बनेको हो । धरान बिशेष कार्यक्रमको संयोजन विमल स्मृति पुस्तकालयलाई जिम्मेवारी दिइएको छ ।
घोष्ट राइटिङ प्रालिले बैंशाख ३ देखि १३ गतेसम्म विराटनगरमा प्रर्दशनी गर्दैछ । उक्त प्रर्दशनीमा पुस्तक किनबेच मात्रै नभई कला प्रर्दशनी, साहित्यिक गोष्ठी, नाटक प्रस्तुतीलगायत विभिन्न गतिविधिहरु हुनेछन् । ‘एक दिन धरान बिशेष कार्यक्रम हुन्छ । त्यसदिन धरानको कला, साहित्य, सँस्कृति पस्किने कार्यक्रम हुन्छ’–वरिष्ठ साहित्यकार अनिल पौडेलले भने । छलफलमा धराने साहित्यकारहरुले धरान बिशेष कार्यक्रम राख्न प्रस्ताव गरेपछि आयोजकले सहर्ष स्वीकार गरेको थियो । आयोजकका अनुसार अन्य दिन भने पुर्वभरिका कला, साहित्यको प्रस्तुती रहनेछ । शुक्रबार र शनिबार झापा, मोरङ, सुनसरीका विभिन्न स्थानका लेखक, साहित्यकारहरुसँग आयोजकले अन्र्तक्रिया गरेको थियो ।
प्रर्दशनीलाई पुर्वको कला एवं साहित्यिक जमघट बनाउन आयोजक विभिन्न जिल्लाका पाठक, साहित्यकारहरुसँग अन्र्तक्रिया गर्दै तयारीमा जुटेको छ । प्रर्दशनीलाई जीवन उपयोगी बनाउने तयारी भइरहेको आयोजक प्रालिका अध्यक्ष कमल ढकालले बताए । ‘किताब प्रर्दशनी भनेको किनबेच गर्ने थलो मात्रै हो भन्ने बुझाई छ, हामी यो धारणालाई परिर्वतन गर्ने गरि तयारीमा जुटेका छौं’–छलफलको क्रममा धरान आइपुगेका ढकालले भने–‘जीवनको रंग पुस्तकमा देखिन्छ, पुस्तकको रंगलाई हामी यो प्रर्दशनीमा देखाउछौं । जीवनसँग जोडिएका कला, साहित्य, नाटक, किताब सबैको प्रर्दशनी हुन्छ ।’

प्रर्दशनीमा एक सय १० भन्दा बढी प्रकाशन गृहका पुस्तकहरु राखिनेछन् भने चित्रकला, मुर्तिकला, फोटो प्रर्दशनी, नाटक, साहित्यिक गोष्ठी पनि एक साथ सञ्चालनमा हुने ढकालको भनाई छ । ती सबै प्रस्तुतीहरु पुर्वका कलाकार, साहित्यकारहरुबाट नै हुनेछ । ‘एउटा ब्लकमा किताब हुन्छ, अर्को ब्लकमा चित्रकला, अर्कोमा मुर्ति, फोटो प्रर्दशनी हुन्छ भने साहित्यिक गोष्ठी र नाटक पनि देखाइरहेको हुन्छ’–उनले भने–‘यो कार्यक्रम पुर्वकै श्रष्टाहरुको मात्र कार्यक्रम हो, पुर्वकै कला, साहित्यको केन्द्र बन्नेछ ।’ दश दिनअवधिभर एक लाख बढीले सहभागीता जनाउने आयोजकको अपेक्षा छ । पुर्वको विराटनगरबाट शुरु हुने प्रर्दशनी पछि पोखरा, नेपालगञ्जमा पनि आयोजना हुनेछ ।