संकटा बुढासुब्बा गोल्डकपको फाइनलमा (फोटोफिचर)

धरान । उपाधिको दाबेदार मानिएको अग्नी रुपन्देही ११ लाई २–१ गोलअन्तरले हराउदै सिएमजि क्लब संकटा १९ औं बुढासुब्बा रेडबुल गोल्डकपको फाइनलमा प्रवेश गरेको छ । धरान १७ स्थित एन्फा टेक्निकल सेन्टरमा बुधबार भएको सेमीफाइनल खेलमा अनिल गुरुङले २ गोल गर्दै संकटालाई फाइनलमा पु¥याए ।
रुपन्देहीको लागि दिपक राईले गरेको गोल सान्त्वनामा सिमित भयो । संकटाले यो सिजनमा नारायणगढमा विकास रनिङ सिल्ड र आठौं सिमरा गोल्डकप जितिसकेको छ । संकटाले नेपाल पुलिस क्लब र आयोजक धरान निलोबीच शुक्रबार हुने सेमीफाइनलको विजेतासँग शनिबार फाइनल खेल्नेछ ।

प्रतिस्पर्धात्मक खेलमा संकटाका अनिल गुरुङले पहिलो हाफको २३ औं मिनेटमा गोल गरेका थिए । तर, पहिलो हाफको ४३ औं मिनेटमा रुपन्देहीका दिपक राईले गोल गर्दै खेल बराबरी बनाए । दोस्रो हाफको ३५ औं मिनेटमा संकटाका अनिल गुरुङले पेनाल्टीमा गोल निर्णायक गोल गरेका थिए । रुपन्देहीका सौरभ मगरले संकटाका दिपेश श्रेष्ठलाई डि बक्सभित्र फल गरेपछि पाएको पेनाल्टीमा अनिलले विजयी गोल गरे । उनी खेलको म्यान अफ दि म्याच घोषित हुदै नगद ५ हजार थापे ।

पहिलो हाफमा बराबरी खेलेपनि दोस्रो हाफमा संकटाले रुपन्देहीलाई दबाबमा राखेको थियो । संकटाका प्रशिक्षक सल्यान खड्गीले खेलाडीहरुले योजनाअनुसार नै खेलेकोले जित पाएको बताए । रुपन्देहीका प्रशिक्षक दयाराम सापकोटाले संकटाले पेनाल्टी मौका पाउनु नै हारको मुख्य कारण भएको प्रतिक्रिया दिए ।
..................................................................................

                                      दर्शकलाई माउण्टेन बाइक

टिकट काटेर बुढासुब्बा रेडबुल गोल्डकपको सेमीफाइनल खेल हेर्न पुगेका एक दर्शकले माउण्टेन बाइक उपहार पाएका छन । आयोजकले घोषणा गरेअनुरुप टिकट कोटर खेल हेर्न आएका दर्शकहरु मध्ये एक जना भाग्यशाली दर्शकलाई आयोजकले माउण्टेनबाइक उपहार दिएका हुन् । बुधबारको पहिलो सेमीफाइनलका दर्शक धरान १६ का शंकर लिम्बुले माण्टेनबाइक पाए । साथै, उनले एउटा टि सर्ट र ६ वटा रेडबुलसमेत पुरस्कार पनि हात पारे । आयोजकले दुवै सेमीफाइनलमा टिकट काटेका मध्ये एक जनालाई माउण्टेनबाइक उपहार दिने घोषणा गरेको थियो भने फाइनलमा एक जना भाग्यशाली दर्शकलाई सुनको सिक्का दिइने आयोजक क्लबका अध्यक्ष किसोर राईले बताए ।