एन्फामा मतभेद टुंग्याएर अघि बढ्न असन्तुष्ट पक्षको आग्रह

धरान । अखिल नेपाल फुटबल संघ(एन्फा)को असन्तुष्ट पक्षले संस्था नेतृत्वविहिन भएको भन्दै मतभेद त्यागेर नयाँ प्रक्रियाबाट अघि बढ्न संस्थापन पक्षसँग आग्रह गरेको छ । एन्फाका कार्यवाहक अध्यक्ष ललितकृष्ण श्रेष्ठको निधनपछि एन्फा नेतृत्वविहिन भएको र नेपाली फुटबलको भविष्य नै संकटमा परेको भन्दै असन्तुष्ट पक्ष लचिलोरुपमा प्रस्तुत भएको हो ।
एन्फा द्धितिय उपाध्यक्ष एवं असन्तुष्ट पक्षधर किसोर राईले बिहिबार गृहनगर धरानमा पत्रकार सम्मेलन गर्दै असन्तुष्ट पक्षको धारणा सार्वजनिक गरेका हुन् । उनले कार्यबाहक अध्यक्ष श्रेष्ठको निधनप्रति गहिरो दुःख व्यक्त गर्दै नेपाली फुटबल नै नेतृत्वविहिन अवस्थामा पुगेकोले आआफ्नो हठ त्यागेर दुवै पक्ष जिम्मेवार हुनुपर्ने समय आएको बताए । त्यसक्रममा उनले स्वर्गीय श्रेष्ठसँगै एन्फाबाट हाल अलगिएका अध्यक्ष गणेश थापाको पनि फुटबलमा योगदान रहेको चर्चासमेत गरे । ‘एन्फा कार्यवाहक अध्यक्ष ललितकृष्ण श्रेष्ठको असामयिक निधनले म पनि धेरै दुःखी छ, ०४७ सालमा उहाँले नै मलाई थ्री स्टारमा खेल्ने अवसर दिलाउनु भएको थियो । फुटबल विकासमा उहाँको धेरै योगदान छ । गणेश थापाको पनि उतिकै लगानी छ’–उपाध्यक्ष राईले भने–‘यो शोक र दुःखको बेला हो, तर संस्था र नेपाली फुटबललाई अब शुन्यतामा राख्नु हुदैन, नेतृत्वविहिन हुन नदिन दुवै पक्षले आफ्नो मतभेदलाई अब टुंगोमा पुर्याउनै पर्छ ।’
यद्यपी उनले अर्कोपक्षले स्वेच्छाचारी प्रवृत्ति र कार्यशाली अझै पनि सुधार गर्न नसकेको आरोप भने लगाए । कार्यवाहक अध्यक्ष श्रेष्ठको निधनलगत्तै आफुले शोक प्रस्तावको एजेण्डासहित कार्यसमिति बैठक राख्न महासचिवलाई पत्राचार गरेपनि अटेर गरेको भन्दै आक्रोश पोखे । आफुहरुले आधारिकरुपमा विभिन्न निकायमा उजुरी गरेको र त्यसबारे जे निर्णय आउछ, असन्तुष्ट पक्षधार त्यसलाई स्वीकार्न तयार रहेको उपाध्यक्ष राईको भनाई थियो । अर्कोपक्षबाट पनि आफ्नो कार्यशैली र स्वेच्छाचारी प्रवृत्तिमा परिवर्तन ल्याउदै विधि, प्रक्रिया र सिस्टमबाट चल्नुपर्ने आफुहरुको सर्त रहेको उनले बताए । ‘हामी दुवै पक्षलाई छलफलमा बस्ने वातावरण भएको छैन, यसको लागि राष्ट्रिय खेलकुद परिषद, मन्त्रालयले पहल गरिदिनुपर्छ । हामी हरेक कुरा, मुद्दामा छलफल गर्न चाहन्छौं’–उनले थपे–‘त्यसो भन्दा पनि उहाँहरु मान्नु हुन्न भने माथिल्लो निकाय वा सरकारले हस्तक्षेप गरेर भएपनि नेपाली फुटबललाई जोगाउनुपर्छ ।’

आफुहरुले व्यक्तिगतरुपमा गणेश थापाको नभई उनले एकलरुपमा संस्था चलाउन खोज्ने स्वेच्छाचारी प्रवृत्ति र आर्थिक अपारदर्शीता भएको कारण मात्रै विरोध गरेको बताए । अध्यक्ष थापाले दुई दशक नेपाली फुटबलको नेतृत्व सम्हालेको उल्लेख गर्दै राईले उनीबाट फुटबल माथि उठ्न नसक्ने जिकिर गरे । भ्रष्टचारकै कारण फिफा अध्यक्ष सेप ब्लाटरले राजिनामा दिएको प्रसंग उल्लेख गर्दै उनले विश्वभर नै भ्रष्टाचारलाई समाप्त पार्ने अभियान छेडिएकोले अध्यक्ष थापा पनि अछुतो भने नरहने ठोकुवा गरे । ‘ एकदुई दिनभित्रै फिफाको इथिक्स कमिटिको निर्णय आउछ’–उनले भने । हाल नेपाली फुटबल सबैभन्दा सुस्त र लथालिङ् अवस्थामा पुगेकोले भविष्यप्रति चिन्तित हुनुपरेको उनले बताए । ‘पद होइन, भुमिका ठुलो कुरा हो । अब मतभेद, संघर्षलाई टुंगोमा पुर्याऔं, र सबै एकमत भएर ओरालो लागेको फुटबललाई उभो लगाऔंं’–राईले भने ।