व्यापारीक भवन ठडिदै, सर्वसाधारणलाई भने रोक

धरान । भुकम्प पछि सरकारले असार मसान्तसम्म दुई तलाभन्दा अग्ला घर एवं भवन बनाउन रोक लगाएपनि धरान उपमहानगरपालिका क्षेत्रमा भने पुर्ण पालना भएको छैन । उपमहानगरपालिकाले सरकारको निर्देशन वमोजिम घरनक्सा दर्ता रोके पनि दुई तलाभन्दा बढीको स्वीकृति भएका संरचना अहिले पनि धमाधम निर्माण भइरहेको छ ।
सरकारी निर्देशन उल्लंघन गर्नेमा निर्माणाधिन निजी व्यापारीक भवनहरु छन् । उपमहानगरपालिका कार्यालयलाई सरकारको निर्देशन अटेर गरेर ती भवन ठडिइरहेको जानकारी भएर पनि मौन छ । तर, सर्वसाधारणको निर्माणाधिन घर मापदण्डविपरीत भए तत्काल उपमहानरपालिकाले निर्माण कार्य रोक्न भन्दै पत्र थमाउने गरेको छ । बैशाखको भुकम्प पछि सरकारले नक्सा दर्ता गर्न र स्वीकृत भइसकेको घरनक्सालाई पनि दुई तलामाथि बनाउन रोक लगाउन स्थानीय निकायलाई निर्देशन दिएको थियो । नक्सा स्वीकृत भएपनि निर्माण कार्य शुरु नभएकोलाई पनि बनाउन नदिन सरकारको निर्देशन थियो । निर्देशन वमोजिम उपमहानगरको एक टोलीले केही वार्डमा सर्वसाधारणको निर्माणाधिन घरमा अनुगमन गरेपनि निर्देशन अटेर गर्ने व्यापारीक भवनको काम भने रोक्न तत्परता देखाएको छैन ।
अहिले धरानमा निर्माण स्वीकृत लिएका ठुला व्यापारीक भवनमध्ये धरान ९ पुतलीलाइनस्थित भाटभटेनी र धरान १५ स्थित लोक खापुङको होटल पनि दुई तला बढी नै निर्माण भइरहेको छ । यस्तै, धरान ८ धनकुटे रोडमा गोर्खा डिपार्टमेन्ट स्टोर र पुरानो ट्राफिक चोकमा पनि एक निजी भवन निर्माणाधिन रहेको छ । सरकारको निर्देशनलाई कार्यान्वयन गर्ने क्रममा उपमहानगरले लगत्तै सार्वजनिक सुचना मार्फत दुई तलामाथि घर एवं भवन नबनाउन आह्वान गरेको थियो । त्यतिबेला भाटभाटेनीको भवनको तेस्रो तला ढलाई भएकै थिएन । शनिबार निर्माणाधिन भवनस्थल पुग्दा पाँचौं तलाको ढलाईको काम भइरहेको थियो । यस्तै, लोक खापङको होटलको पनि तेस्रो तलाको काम जारी छ । यस्तै, धरान ८ स्थित गोर्खा डिपार्टमेन्ट स्टोर र पुरानो ट्राफिक चोकस्थित भवनको काम सरकारी निर्देशन र उपमहानगरपालिकाले सुचना जारी गर्दा काम शुरु भएकै थिएन । निर्देशनअनुसार दुवै भवनको काम रोकिनु पर्ने हो, तर धमाधम बनिरहेको छ । भाटभटेनीका लेबर सुपरभाइजर गणेश श्रेष्ठले सरकारको निर्देशनबारे आफुले सुनेपनि कुनै निकायबाट काम रोक्न भनेर पत्र वा निर्देशन नपाएको बताए । ‘कसैले केही पनि भनेको छैन, पाँच तलाको नक्सा भएकोले अहिले त्यहीसम्मको काम हुदैछ ।’–श्रेष्ठले भने ।

एपमहानगरपालिकाका घरनक्सा उपशाखाका नायब सुब्बा हरि कार्कीले भने सार्वजनिक सुचना जारी गरेसँगै पहिलो चरणमा निर्माण व्यावसायीहरुको संगठन स्थानीय भवन निर्माण व्यावसायी संघलाई काम रोक्न पत्र पठाएको बताए । मापदण्ड विपरीत घर बनिरहेको उजुरी आएपछि वडा १५, ८, ३ लगायत वार्डको केही क्षेत्रमा स्थलगत अनुगमनमा गएर काम रोक्न निर्देशन दिएपनि ठुला व्यापारीक भवनमा भने नपुगिएको उनले बताए । उनका अनुसार ७ वटा जति सर्वसाधारणको घरलाई निर्माण रोक लगाइएको छ । ‘निर्देशन, नियम सबैलाई समान हो, सर्वसाधारणलाई मात्रै हो भन्ने होइन’–कार्कीले भने–‘भोली(आइतबार)देखि स्पटमा नै गएर मापदण्ड विपरीतका भवनलाई काम रोक्छौं ।’
उनका अनुसार यो बर्ष करिब साढे ५ सय घरनक्साले उपमहानगरपालिका कार्यालयबाट निर्माण इजाजत पाएका छन् । ती घरमध्ये कति २ तला माथिको अनुमति छ भनेर आइतबारसम्म निक्यौल हुने र ती सबैलाई आइतबारदेखि नै निर्माणस्थलमा गएर काम रोक्न पत्र थमाउने नायक सुब्बा कार्कीले बताए । ‘इजाजत लिएकाको मात्रै होइन, इजाजत विना पनि घर बनिरहेको छ छैन, इजाजत लिएभन्दा बढी तला थपिएको छ छैन भनेर पनि हामी निरीक्षण गरिरहेकै छौं’–उनले थपे ।