जनजाति महिलाहरुलाई श्रृंगार तालिम शुरु

धरान । महिलाहरुलाई आत्मनिर्भर बनाउने उद्देश्यले बिहिबारदेखि धरानमा एक महिने श्रृंगार तालिम शुरु भएको छ । राष्ट्रिय आदिबासी जनजाति महिला महासंघ सुनसरीको आयोजनामा शुरु भएको तालिममा २६ जना जनजाति महिलाहरु सहभागी छन् ।
तालिममा महासंघमा आवद्ध जिल्लामा १३ जातीय संस्थाबाट दुई जनाको दरले २६ महिलाहरु सहभागी भएको आयोजक संस्थाकी अध्यक्ष कल्पना शेर्पाले बताइन् । जिविसको सहयोगमा शुरु भएको तालिम अवधि २० दिनको भनिएपछि एक महिनाको कोर्षअनुसार नै सञ्चालन हुने उनले जानकारी दिइन् । ‘महिला दिदीबहिनीहरुलाई आर्थिकरुपमा आत्मनिर्भर बनाउने मुख्य उद्देश्य हो, चुलाचौकमा मात्रै सिमित नभई आयमुलक कार्यमा पनि अघि बढौं भनेर कार्यक्रम गरेका हौं’–अध्यक्ष शेर्पाले भनिन् । संस्थाले यसअघि पनि महिलाहरुलाई सुकुटीको अचार, च्याउ खेतीलगायत तालिम दिएर आत्मनिर्भर बनाउने प्रयास गरेको उनले बताइन् ।

तालिम उद्घाटन समारोहका प्रमुख अतिथि एवं आदिबासी जनजाति महासंघ जिल्ला समन्वय परिषदका अध्यक्ष खम्बासिंह गुरुङ्गले तालिम लिएपछि त्यतिकै नबसी र्पालर सञ्चालन गरेर आत्मनिर्भर हुन पनि सुझाव दिए । यस्तै, महिला महासंघकी पूर्वअध्यक्ष मिना पुलामीले महिलाले आयमुलक सिप सिकेमा मात्र आर्थिकरुपमा सक्षम हुने र परिवार, समाजमा पनि सशक्तीकारण हुने धारणा राखिन् । स्वागत मन्तव्यको क्रममा आयोजक संस्थाकी सदस्य विमला प्रधानले श्रीमान्को अघि हात पसार्नुपर्ने बाध्यतालाई हटाएर महिलालाई आर्थिकरुपमा सक्षम बनाउने तालिमको उद्देश्य रहेको बताइन् । एक महिने तालिमको प्रशिक्षककोरुपमा कल्पना शेर्पा रहेकी छिन् ।