रेयुकाईको कार्यालयमा युवा संघद्धारा तालाबन्दी

धरान । गैरकानुनीरुपमा करोडौंको चलअचल सम्पत्ति बिक्री गर्न लागेको विरोधमा उत्रिएका एमाले निकट युवा संघ नेपालले धरान १५ स्थित युरासिया रेयुकाई नेपालको भवन एवं कार्यालयमा तालाबन्दी गरेको छ । भुमाफियासँगको मिलेमतोमा धरानसहित विभिन्न स्थानको सम्पत्ति बिक्री गर्न टेण्डर गरेको रहस्य खुलेपछि गैरसरकारी संस्थाको सम्पत्ति सरकारीकरण गर्नुपर्ने माग गर्दै संघले धरानस्थित भवनमा ताला लगाएको हो ।
भवनसहितको जग्गाको लिलामी प्रक्रिया तत्काल रोकेर संस्थाको सम्पत्तिलाई सरकारीकरण गर्न संघले नेपाल सरकार एवं सरोकारवाला निकायलाई आह्वान पनि गरेको छ । संघका केन्द्रीय सदस्य एवं सुनसरी जिल्ला इञ्चार्ज ज्ञानदिप लिम्बुको नेतृत्वमा गएको युवाहरुले कार्यालय र भवन प्रवेश गर्ने मुल गेटमा नै तालाबन्दी गरेको छ । संस्थाको सम्पत्ति सरकारीकरणको पक्षमा आन्दोलित स्थानीयबासीले पनि संघलाई साथ दिएको थियो । स्थानीयबासीले यसअघि नै एक समिति बनाएर उपमहानगरपालिका, मालपोत, जिल्ला प्रशासन कार्यालय लगायत विभिन्न निकायमा ज्ञापन पत्र बुझाउदै बिक्री प्रक्रिया रोकेर सरकारीकरण गर्न माग गरेको थियो । संघले पनि पुष १६ गते संस्थाको भवनमा ब्यानर राख्दै गैरकानुनीरुपमा बिक्री नगर्न चेतावनी दिएको थियो ।

आर्थिकरुपमा टाट पल्टिएको भन्दै युरासिया रेयुकाईको केन्द्रीय कार्यालयले विभिन्न स्थानको जग्गा एवं जग्गासहितको भवन बिक्रीको लागि बोलपत्र आह्वान गरेको थियो । ‘यो सम्पत्ति जनता र सरकारको हो, यसलाई व्यक्तिगत सम्पत्ति सरह किनबेच गर्न पाइदैन । सरकारीकरण हुनैपर्छ भनेर सम्बन्धित निकायको ध्यानाकर्षण गराउन संघले दोस्रो चरणमा तालाबन्दी गरेको हो’–संघका केन्द्रीय सदस्य एवं जिल्ला इञ्चार्ज लिम्बुले भने–‘यहाँका सबै राजनीतिक दल, युवा र नागरिक समाजले पनि यो अभियानमा साथ दिन आह्वान गर्छु ।’ संघका नगर अध्यक्ष राजेन्द्र राईले संस्थाको सम्पत्ति किनबेच रोक्न र सरकारीकरण गराउन कानुनी प्रक्रिया अवलम्बन गरिने बताए । उनका अनुसार स्थानीयबासीसँग मिलेर अदालतमा जाने तयारी भइरहेको छ । स्थानीयबासीले गठन गरेको संघर्ष समितिका संयोजक पदम कार्कीले पनि कानुनी प्रक्रियामा जान लागेको खुलाउदै साथ दिन सबैमा आग्रह गरे ।
युरासिया रेयुकाईको धरान १५ मा ५ कठ्ठा जग्गासहित २ तले पक्की भवन छ । यो भवनलाई रेयुकाईले सामाजिक विकास केन्द्रको नाममा सञ्चालन गरिरहेको छ । आर्थिकरुपमा टाट पल्टिएको भन्दै युरासिया रेयुकाईले धरानसहित काठमाण्डौं, बाँके, सिद्धार्थनगर र भक्तपुरमा रहेको घर, जग्गा बिक्री गर्ने तयारी गरेको छ । यी सबै स्थानको सम्पत्तिको मुल्य ३५ करोड भन्दा बढीको रहेको आँकलन गरिएको छ । विश्व शान्ति फैलाउने उद्देश्य लिएको युरेसिया रेयुकाई जापानी संस्था हो । द रेयुकाई नेपालको नाममा शुरुवात भएपनि पछि उक्त संस्थालाई युरासिया रेयुकाईमा गाभेका थिए । जानकारहरुका अनुसार दुई गैरसरकारी संस्था एक अर्कामा गाभ्नै पाइदैन । युरासिया ललितपुर जिल्ला प्रशासन कार्यालय र समाज कल्याण परिषदमा दर्ता भएको छ ।

धरानस्थित १९ आंै शाखा जिल्ला प्रशासन कार्यालय सुनसरीमा छुट्टै दर्ता भएपनि पछि विभिन्न प्रपञ्च गरेर यहाँको घरजग्गालाई केन्द्रीय कार्यालय मातहत बनाइएको थियो । रेयुकाईलाई युरासियामा गाभेपछि विवाद चर्किएर यसका सदस्य संख्या ह्वातै घट्यो भने अनुदान पनि आउन छोडेपछि आर्थिकरुपमा यो संस्था धरासायी हुन पुगेको थियो । धरानस्थित कार्यालयमा हाल समाज विकास केन्द्रका संयोजक भीमबहादुर बस्नेतसहित २ जना कर्मचारीले रेखदेख गरिरहेका छन् । डिसेम्बर ३१ देखि आफुहरु जिम्मेवारीमुक्त भएपनि केन्द्रीय कार्यालयको आग्रहमा भवन हेर्न बसेको उनले बताए । उनका अनुसार द रेयुकाई नेपाल र युरेसिया रेयुकाईको दाता एउटै भएकोले रेयुकाईलाई युरेसियामा गाभिएको थियो । जापानको ८ औं शाखाबाट सहयोग पाउदै आएपनि विगत ३ बर्षदेखि आउन छोडेको छ ।