धरान चौकीबारी समाजद्धारा अक्षयकोष स्थापना

धरान । हङकङमा रहेको धरान चौकीबारी समाजले धरान १९ स्थित किरातेश्वर माविलाई अक्षय कोष स्थापना गर्न आर्थिक सहयोग गरेको छ । समाजले स्वर्गीय डोमा लामाको स्मृतिमा अक्षय कोष खडा गर्न नगद ५४ हजार ७ सय रुपैया प्रदान गरेको हो ।
शुक्रबार विद्यालयमा आयोजित एक कार्यक्रमबीच समाजका सचिव वालकुमार राई र प्रतिनिधि पुर्ण लिम्बुले विद्यालय व्यावस्थापन समितिका अध्यक्ष देउमान लिम्बु र प्रअ योगेन्द्र पालुङ्वालाई उक्त रकम हस्तान्तरण गरेका थिए । सचिव राईका अनुसार क्यान्सरबाट ग्रस्त लामाको उपचार सहयोगार्थ रकम संकलन भएको थियो । उपचारको क्रममा लामाको मृत्यु भएपछि बचेको रकम समाजको निर्णयअनुसार उनको स्मृतिमा छात्रवृत्ति प्रदान गर्न विद्यालयलाई सहयोग गरिएको हो ।
विद्यालयका प्रअ पालुङ्वाले अक्षयकोष निर्देशिका तयार गरिएको र सोही वमोजिम दातासँग आपसी सल्लाहमा कस्तो विद्यार्थी र कुन संख्यामा छात्रवृत्ति प्रदान गर्ने भनेर तय गरिने बताए । अक्षय कोषको ब्याजबाट प्राप्त रकम बर्षेनी वितरण हुने उनले प्रष्ट्याए । अध्यक्ष देउमान लिम्बुले सामुदायिक विद्यालयलाई अझै सहयोगको खाचो रहेको भन्दै निरन्तर सहयोगको लागि आग्रह गरे ।
प्रअ पालुङ्वाका अनुसार यसबाहेक क्युपेक नेपालले १० हजारको अक्षयकोष स्थापना गरिदिएको छ भने नरदेव ध्रुव बतासेको स्मृतिमा पनि १ लाख १२ हजारको अक्षय कोष स्थापना छ । यस्तै, मनप्रसाद लिम्बुको नाममा १ लाखको अक्षय कोष बनाइदिने पनि लगभग निश्चित भइसकेको उनले बताए ।