धरानलाई हराउदै एपिएफ क्लब फाइनलमा

धरान । सशस्त्र प्रहरीको एपिएफ क्लब १७ औं अन्र्तराष्ट्रिय आमन्त्रण बुढासुब्बा रेडबुल गोल्डकपको फाइनलमा पुगेको छ । धरान १७ स्थित एन्फा टेक्निकल सेन्टरमा बुधबार भएको पहिलो सेमीफाइनल खेलमा आयोजक धरान फुटबल क्लबलाई ३–० को फराकिलो जित दर्ता गर्दै एपिएफ उपाधि नजिक पुगेको हो ।

बुढासुब्बाको इतिहासमा एपिएफ फाइनल पुगेको यो पहिलो पटक हो । सेमीफाइनलमा एपिएफका रञ्जन विष्ट, गणेश लावली र नविन लामाले गोल गर्दै घरेलु दर्शकलाई निराश बनाए । हारसँगै घरेलु मैदानमा उपाधि जित्ने आयोजकको धोको पुरा हुन सकेन । गएको सँस्करणमा पनि सेमीफाइनलमा आयोजक सहारा क्लब पोखरासँग सडन डेथमा पराजित हुदै उपाधि होडबाट बाहिरिएको थियो ।

पहिलो हाफको खेल शुरु भएको २ मिनेटमै रञ्जन विष्टले गोल गर्दै एपिएफले खेलमा अग्रता लिएको थियो । दोस्रो हाफको दशौं मिनेटमा गणेश लावतीले गोल गर्दै एपिएफको अग्रता दोब्बर बनाए । यस्तै, दोस्रो हाफको ३९ औं मिनेटमा नविन लामाले गोल गर्दै एपिएफको जित सुनिश्चित गरे । खेलको म्यान अफ दि म्याच एपिएफका नविन लामा घोषित हुदै नगद ५ हजार र ट्रफी थापे । धरानका प्रशिक्षक सुवास केसीले अफ्रिकन खेलाडीले म्याच फिक्सिङ गर्दा हार्नु परेको दाबी गरे । पहिलो हाफमा शुरुमै गोल खानु र हावाले पनि दबाब दिएकोले खेलमा तालमेल हुन नसकेको उनको भनाई थियो । सेन्टर डिफेन्स मनिष घलेको अभाव खट्किएको उल्लेख गर्दै उनले डिफेन्स लाइन कमजोर भएको बताए । ‘विदेशी खेलाडी पिटर, आबा र गोही खेल्नै सकेनन्, बाहिरबाट भनेको पनि मानेन, म्याच फिक्सिङ गर्यो’–धरानका प्रशिक्षक केसीले भने ।

एपिएफका प्रशिक्षक कृष्ण थापाले २ मिनेटमै गोल गरेपछि विपक्षीको खेल विथोलिएको र हावाको कारणले पनि धरानको खेलमा तालमेल हुन नसक्दा आफुहरुलाई फाइदा पुगेको बताए । धरानको खेलाडी व्यक्तिरुपमा राम्रो भएपनि टिमवर्कको अभाव भएको भन्दै उनले आफ्नो खेलाडीको टिमवर्ककै कारण जित भएको बताए । ‘हाम्रोबाट ठिक समयमा स्कोर गर्यो, तर गोल अझै बढी हुनुपथ्र्यो’–म्याच फिक्सिङको सन्दर्भमा उनले भने–‘म्याच फिक्सिङ हुनै सक्दैन, यो अनर्थ, बेकारको कुरा हो ।’ प्रतियोगितामा बिहिबार त्रिभुवन आर्मी क्लब र दुई पटकको विजेता मनाङ मस्र्याङदी क्लबबीच दोस्रो सेमीफाइनल खेल हुनेछ ।