बीपी प्रतिष्ठानको वन क्षेत्रमा आगलागी

धरान । बीपी कोइराला स्वास्थ्य विज्ञान प्रतिष्ठान धरानअन्र्ततको निर्वाणा कन्ट्री क्लबस्थित गल्फ कोर्ष नजिकैको वन क्षेत्रमा मंगलबार भिषण आगलागी भएको छ । सुख्खा पातमा सल्केको आगो हुरी चलेर नियन्त्रण बाहिर भई दक्षिणी वन क्षेत्रमा पनि फैलिएपछि नियन्त्रणमा लिन कठिन भएको थियो । सामुदायिक वनले बीपी प्रतिष्ठानको लापरवाहीले आगो लागेको आरोप लगाएको छ भने प्रतिष्ठानले आगलागीको कारण जाँच गर्ने प्रतिक्रिया दिएको छ ।

आगो सल्किदा निर्वाणको गल्फ कोर्षसँगै वन नजिकै रहेको वस्ती जोखिममा परेपछि स्थानीय निक्कै हतास परेका थिए । आगो नियन्त्रणमा लिन धरान उपमहानगरपालिकाको दमकल र व्यापाक सुरक्षाकर्मी परिचालन गरिएको थियो । आगो नियन्त्रणमा लिन अञ्चल प्रहरी गुल्म, इलाका प्रहरी, वडा प्रहरी, सशस्त्र प्रहरीसँगै स्थानीयबासी पनि खटिएका थिए । करिब डेढ घण्टाको प्रयासमा आगो नियन्त्रणमा आएको थियो ।

आगो सल्किनुको कारण अज्ञात भएपनि बीपी प्रतिष्ठानको फोहोर वन क्षेत्रमा फाल्ने र त्यहाँ आगो लगाउने गरेकोले वन क्षेत्रमा आगलागी भएको वन समुहको आरोप छ । हरियाली वन समुहका पूर्वअध्यक्ष टेक तामाङका अनुसार अस्पतालको फोहोर वन क्षेत्रमा थुपारेर आगो लगाउने गरेकोले वनमा आगो फैलिएको दाबी गरे । ‘यो बीपीकै लापरवाहीको कारणले आगो सल्किएको हो, वनमा फोहोर फालेर जलाउने गरेको छ । त्यही आगो वनमा फैलिएको हो’–उनले भने । वनमा आगो सल्किएपछि प्रतिष्ठानका रजिष्टार तुलबहादुर श्रेष्ठ पनि निरीक्षण गर्न घटनास्थल पुगेका थिए । फोहोर फालेर जलाउने गरेको स्वीकार गरेपनि उनले मंगलबारको आगो त्यही कारणबाट भए नभएको प्रष्ट नभएको बताए । ‘यहाँ फोहोर खाल्डो खनेर राख्छौं, आगो लगाउने गरेको पनि रहेछ । के कारणले आगो सल्कियो भनेर सेक्युरिटीलाई बुझ्न भनेको छुँ’–उनले भने ।

प्रतिष्ठानको फोहोर संकलन र व्यवस्थापनको जिम्मा पप्पु श्री इन्टरप्राइजेजले लिएको छ । उसले अस्पतालको सम्पुर्ण फोहोरलाई प्रतिष्ठानको दक्षिणी हाताको वन क्षेत्रमा लगेर फाल्ने गरेको छ । आगो नियन्त्रणमा खटिएका प्रहरी निरीक्षक मिलन भटराईका अनुसार करिब २ बिघा वन क्षेत्रमा आगो फैलिएको बताए । ‘चुरोटको ठुटोबाट पनि सल्किएको हुनसक्छ । सुख्खा पात र हावाको कारण नियन्त्रणमा गाह्रो भयो’–उनले भने–‘फायर लाइन बनाएपछि नियन्त्रणमा लिन सहज भयो ।’ स्थानीयका अनुसार करिब ४ बजेदेखि वनमा आगो लागेको थियो ।