जोखिममा रहेका ज्येष्ठ नागरिकलाई जोगाउन अभियान
धरान । ज्येष्ठ नागरिकहरुलाई प्राकृतिक प्रकोपबाट जोगिन अपनाउनुपर्ने सावधानीबारे जानकारी गराउन सोमबार धरान एक दिने कार्यशाला गोष्ठी सम्पन्न भएको छ । प्राकृतिक प्रकोपको समयमा सबैभन्दा बढी ज्येष्ठ नागरिक(वृद्धवृद्धा)हरु जोखिममा पर्ने विभिन्न अध्ययनहरुबाट देखिएपछि नेपाल सरकार र विभिन्न गैरसरकारी संघसंस्थाहरुले संयुक्तरुपमा सचेतना अभियान सञ्चालन गरेको हो ।
नेपाल सरकारले यो बर्ष ज्येष्ठ नागरिक दिवस र अन्र्तराष्ट्रिय जोखिम न्युनिकरण दिवसलाई एकै पटक संयुक्तरुपमा मनाउने निर्णय वमोजिम सचेतना अभियान शुरु भएको छ । आइतबार चितवनको देवघाटमा एक दिन कार्यशाला गोष्ठी भएको थियो भने सोमबार सुनसरीको धरानमा गोष्ठी भएको हो । यस्तै, मंगगलबार झापाको चन्द्रगढीमा र बुधबार मोरङको विराटनगरमा पनि गोष्ठी हुने प्रकोप पूर्वतयारी सञ्जालका सल्लाहकार हर्षमान महर्जनले बताए ।
धरानमा आयोजित गोष्ठीमा सुनसरीको हाँसपोशा, पकली, बक्लौरी, इटहरी, पाँचकन्या, धरानलगायत क्षेत्रबाट चार दर्जन ज्येष्ठ नागरिकहरुको सहभागीता रहेको थियो । नगरपालिकाको लर्निङ सेन्टरमा आयोजित गोष्ठीमा ओनस नेपालका सचिव रमनकृष्ण मर्हजनले प्रकोप र बच्ने उपायबारे ज्येष्ठ नागरिकहरुलाई प्रशिक्षण दिएका थिए । प्रशिक्षणमा प्रकोप के हो ? कस्तो कस्तो प्रकोप हुन्छ ? कस्तो घटनाहरु हुनसक्छ र कसरी जनधनको सुरक्षा गर्ने बारे जानकारी पाएको सहभागी हाँसपोशा गाविसका गणेश भण्डारीले बताए । ‘वृद्धवृद्धाहरु प्रकोपको बेला असुरक्षित हुन्छन्, त्यस्तो बेला कसरी जोगिने र अरुलाई जोगाउने भनेर धेरै ज्ञान पायौं’–उनले भने ।
Comments
Post a Comment