पठन सँस्कृति बढाउदै धरान रिडर्स गु्रप

धरान । दशैं–तिहार चाडको विदाको कारण विद्यालयहरु अहिले बन्द छ । स्कुल विदाले गर्दा शिक्षक, विद्यार्थीहरु फुर्सदिला छन् । विदामा के गर्ने ? साथीभाई भेटेर गफिने, घुम्न जाने, टिनेभी हेरेर वा फेसबुकमा समय बिताउने ।
धरान १८ स्थित माउण्ड हार्मोन एकेडेमीका प्रिन्सिपल अनुप योञ्जनसँग विगतको यस्तो अनुभव अचेल भने छैन । उनी हिजोआज विदाको समयमा नयाँ नयाँ पुस्तक पढेर समय बिताउछन् । पढिसकेका किताबबारे साथीभाईबीच छलफल गर्छन्, किताबबारे आफ्नो धारणा व्यक्त गर्छन् । उनकै शब्दमा ‘अचेल एउटा किताब पढ्यो, अर्को पढ्न मन लाग्ने’ बानी बसेको छ । किताब पढ्न पाउदा उनलाई आनन्द लाग्छ । ‘मेरो बानीमा सुधार आएको छ । पहिला छुट्टीमा यता उता गयो, गफ गर्यो, त्यतिकै समय बित्थ्यो’–सोमबार उनले अनुभब बाड्दै भने–‘अचेल छुट्टीमा यति वटा किताब पढीसक्छु भन्ने भावना विकास भएको छ, एउटा पढ्यो अर्को पढ्न मन लाग्छ । किताब पढ्न मजा आउन थालेको छ ।’
उनका अनुसार पछिल्लो समय उनले मदन पुरस्कार विजेता राधा पौडेलको खलंगामा हमला, साइकल यात्री पुष्कर शाहको संसारलाई पाँच फन्को, कुमार नगरकोटीको फोसिललगायत पाँच पुस्तक पढिसकेका छन् । उनमा यो परिवर्तन त्यसै भएको भने होइन । पठन सँस्कृतिको विकास गर्ने उद्देश्यले गत साउन तेस्रो साता धरानका केही लेखक एवं पुस्तक अध्येताहरुले सल्लाह गरेर धरान रिडर्स गु्रप गठन गरेको प्रभाव उनमा परेको हो । साउन यता यो गु्रपले प्रत्येक महिना पुस्तक अध्येताहरुलाई भेला गराउछ र त्यसबीचमा आफुले पढेको पुस्तकबारे धारणा व्यक्त गर्न लगाउछ । भेलामा जो कोही पुस्तक अध्येता सहभागी हुन सक्छन् ।
‘मैले विजयकुमार पाण्डेको खुशी पढे, उनको हाइप्रोफाइलसँग धेरै संगत रहेछ । केही गर्छु भन्ने छ भने सनकीपन हुनुपर्छ भन्ने कुरा यो पुस्तकबाट मैले बुझे’–जेनिथ बोर्डिङ स्कुलका प्रिन्सिपल समुन जवेगुले पुस्तबारे भने । रिसर्ड ग्रुपसँगको सामिप्यताले पढ्ने बानीको विकाससँगै आफुले पढ्न नपाएको पुस्तक र त्यसले दिने सन्देशबारे पनि थाह पाउने अवसर पाएको उनले बताए । ‘आफुले पढेको पुस्तकबाट ज्ञान त पायौं नै, पढ्न नपाएको किताबको ज्ञान पनि अरुबाट पाइन्छ, यो ज्यादै राम्रो अभियान हो’–उनले थपे ।

भेलामा पहिलो पटक सहभागी धीजनबाबु काफ्लेले आफु विराटनगरमा हुँदा वाणी प्रकाशनमा प्रत्येक १५ दिनमा हुने साहित्यिक जमघटको सुखद् स्मरण गराएको बताए । शिक्षक हेमन्त भण्डारीले डुलेर, खाएर र फेसबुकमै बसेर बित्ने विदाको समयलाई सदुपयोग गर्दै खलंगामा हमला र नयनराज पाण्डेको चकलेट कथा संग्रह पढेको अनुभव सुनाए । भेलामा सहभागी बालजित राई, युवा गजलकार रोमनाथ ढुंगेल, शिक्षक सन्तोष कोइराला, लेखक चेवन राईलगायतले पनि आफुले अध्ययन गरेको पुस्तक र त्यसले दिने सन्देशबारे धारणा राखेका थिए । धरान १८ स्थित माउण्ट हार्मोन एकेडेमीमा प्रत्येक महिनामा हुने भेलाको आगामी सँस्करणमा भने अग्रज लेखक एवं साहित्यकारलाई उपस्थित गराएर पठन सँस्कृति र पुस्तकबारे छलफल गराउने योजना रहेको ग्रुपका अनुप योञ्जनले बताए ।