श्रीशीशा राईको एकल कविता वाचन(फोटोफिचर)

धरान । हरदम समाचारको खोजीमा रहने पत्रकार श्रीशीशा राईले सधैं अरुको दुःख, पीडालाई ठुलो हेडलाइनमा छापेका छन् । समस्या त आफ्नो पेशा(पत्रकार)को पनि कम छैन, तर पत्रकारिता धर्मले आफ्नो पीडालाई समाचार बनाएर पोख्न दिदैन । त्यसो भन्दैमा उनी चुप लागेर बसेका भने छैनन् । लेखनकै अर्को पाटो साहित्यमार्फत उनले पत्रकारका पीडालाई यसरी पोखेका छन् अर्धाङ्गीनिको पीडा..शीर्षकको कवितामा ।
  झिसमिसेका कसिला अँगालाहरु
दिनभरिको बाटो सम्झेर खुकुलिन्छन्
हतार हतार म झोला भिर्छु
एक्लोपनको भयले
मेरी श्रीमतीको अनुहारको रङ्ग बदलिन्छ
तिनका प्यास, रहर र समर्पण जति
आलै छाडेर म
दुनियाँ पछार्न निक्लन्छु घरबाट ।

कविताले भने झै पत्रकार राई शनिबार पनि सुनसरीको हाँसपोशास्थित घरबाट निस्किएर भरौल १ स्थित कालाबञ्जार पुगे । तर, यो यात्रा सदाको भन्दा अलग्गै थियो । गोरखा पत्र दैनिकसँग आवद्ध उनले कालाबञ्जारमा पुगेर कविता सुनाए । धेरै कविताहरुको लहरमा अर्धाङ्गीनिको पीडा..शीर्षकको कवितामार्फत आफ्नो मात्रै होइन, समग्र पत्रकारहरुको अवस्था छर्लङ्ग पारिदिए ।
स्थानीय स्वर्णिम साहित्य समाजले एकल कविता वाचन कार्यक्रम आयोजना गरेर पत्रकार एवं कवि राईलाई कालाबञ्जरको साहित्यिक माहौलमा उभ्याएको थियो । रेडक्रसको भवनमा आयोजित एकल वाचनमा कवि राईले आफ्ना सृर्जनामार्फत पत्रकारको समस्या खोले, पहिचानको नारा घन्याए, तत्कालीन समयमा द्धन्दको चपेटामा परेको नेपाली समाज र नेपालीको मनोदशालाई व्यक्त गरे, यसरीः
जब देश सम्झन्छु–
म एउटा परदेशी जस्तो लाग्छ

जङ्जल भासिएको छु म
अहिले बस्तीमा
विश्वास, इमान, धर्म
मेरै बाटो हेरिरहेका होलान् (दुःखद् सम्झना)

यताबाट आए, म उभिए र बँचे
उताबाट आए, म बसे र बँचे(द्धन्द्दमा)

कार्यक्रममा कवि राईका डेढ दर्जन कविता वाचन भएको थियो । आयोजक संस्थाकातर्फबाट पहलमान बस्नेतले राईको आगमन... शिर्षकको कविता वाचन भए पछि कवि स्वयम्ले दुःखद् सम्झना.., द्धन्द्दमा..,अर्धाङ्गीनीको पीडा..,देशबहादुर भरिया..,धरान भर्सेस काठमाण्डौं..,भविष्य एक्सप्रेस..हुदै सुखराम ताराखुकको कविता..शिर्षकबाट एकल वाचन टुंग्याएका थिए । बीच बीचमा कवि देवान किराती, सुदिप पाख्रिन, कवयित्री रेखा सुवेदी र स्थानीय आयोजककी निशा बिष्टले पनि कवि राईका कविता वाचन गरेका थिए । स्थानीय साहित्यनुरागीको भव्य उपस्थिति रहेको कार्यक्रम नेपाल प्रज्ञा प्रतिष्ठानका परिषद सदस्य उपेन्द्र पालगको प्रमुख आतिथ्यमा आयोजना भएको थियो । भोजपुरको सिन्द्राङमा जन्मिएका कवि राईको २०६६ मा चेतनाहरु चबाएर नामको कविता संग्रह प्रकाशन भइसकेको छ । आफ्ना कविताहरुलाई समिक्षकहरुले द्धन्द्दकाल लक्षित गरेर लेखिएको भनेर समिक्षा गर्ने गरेको कवि राईले बताए । यो उनको पहिलो एकल कविता वाचन हो ।

वरिष्ठ साहित्यकार अनिल पौडेलले कवि राईको कविताहरु सुन्दा शान्त काव्यिक तलाउमा एउटा माझीले छाल आउने गरि पानी चलाएको झै आफुले अनुभूत गरेको बताए । आफ्नो जाती, भाषाको मिथकलाई कवितामा उत्कृष्टढंगले ल्याएको बताउदै साहित्यकार पौडेलले यस्ता स्रष्टा, सृष्टि र उनको दृष्टिलाई सार्वजनिक कार्यक्रमहरुमा उद्धरण गर्नुपर्ने धारणा व्यक्त गरे । यस्तै, समिक्षक डमरु बल्लभ भण्डारीले राईका कविताले नेपाली जनता र नेपालबारे बोलेको धारणा व्यक्त गरे । अर्का समालोचक डा.बद्रीबिशाल पोख्रेलले कविताको शिर्षक चयनमा मौलिकता र कलात्मकता रहेको बताए । साथै, कविताहरु बिम्बात्मक, प्रतिकात्मक र मिथकले भरिएको नयाँपन पनि राईका कविताहरु भेटिने बताए ।
 आयोजक संस्थाका अध्यक्ष प्रकाश दिप्साली राई मिराकले स्थानीय कवि, साहित्यकारहरुलाई नेपाली साहित्य एवं कविता कुन दिशामा अघि बढ्दैछ भनेर बुझाउनको लागि पनि कार्यक्रम आयोजना गरिएको बताए । ‘नयाँपिढीले नेपाली साहित्य, कविता कुन ट्याकमा हिडिरहेको छ भनेर बुझ्ने मौका पाउछन्, यसले साहित्य सृर्जनामा मलजलको काम गर्छ’–कार्यक्रमको उद्देश्यबारे उनले भने । कार्यक्रमको दौरान गायक निरज राईले गीत पनि गाएका थिए भने कवि राईलाई किराती परम्पराअनुसार फेटा पनि गुथिएको थियो ।