पूर्नस्थापना गृहमा असहाय एवं अशक्तहरुसँग दशैं

धरान । हुनेखानेले पो रमाइलोसँग दशैं मनाउछन्, नयाँ कपडा फेर्छन् र मिठो परिकार खान्छन् । तर, जसको कोही छैन र अरुको सहारामा बाँचेका छन्, उनीहरुलाई दशैं पक्की पनि नमिठो लाग्ला । तर, यसपाली धरान ४ छाताचोकस्थित पूर्नस्थापना गृहका असक्त एवं हाय बालबालिका एवं वृद्धहरुले भने दशैंमा निराशामा बिताउनु परेन ।
दशैंमा पूर्नस्थापना गृह पुगेर विभिन्न व्यक्ति एवं संघसंस्थाले लत्ताकपडा मात्रै फेरिदिएन, त्यहाँका बालबालिका एवं वृद्धहरुलाई मिठो परिकार पनि खुवाइदिए । जसले गर्दा गृहमा रहेका बालबालिका एवं वृद्धहरुलाई दशैं आएको महशुस गरायो । फुलपातीको दिन डिपोट उच्चमाविका २०५०/०५१ ब्याचका पूर्वविद्यार्थीहरुले गृहलाई करिब ५६ हजार बराबरको ४ वटा सामान राख्ने ड्र, ४ वटा प्लाइउड हस्तान्तरण गरे भने त्यहाँ आश्रय लिइरहेका बालबालिका एवं वृद्धहरुलाई खाना पनि खुवाए ।

कार्यक्रमकी संयोजक फुलमति राईले शिक्षकहरुको सही मार्गनिर्देशनको कारणले समाजसेवाको भावना जागेको बताइन् । सामाजिक सञ्जाल फेसबुकबाट देश विदेशमा रहेका सहपाठीहरुबीच सम्पर्क गरेर आर्थिक सहयोग जुटाउन सकिएको उनले बताइन् । पत्रकार भिम राई ज्वालाले सामाजिक सञ्जालबाट राम्रो काम पनि गर्न सकिन्छ भन्ने उदाहरण डिपोटका पूर्वविद्यार्थीहरुले दिएको धारणा राखे । साथै उनले पूर्नस्थापना गृहलाई व्यवस्थितरुपमा अन्यत्र स्थानान्तरणबारे सोच्न पनि सबैलाई आग्रह गरे ।
सोही कार्यक्रममा ०५० /०५१ ब्याचका विद्यार्थीहरुले हाल बनेपामा मास्तिष्क पक्षघात भएर उपचाररत डिपोटका २०६१ ब्याचका पूर्वविद्यार्थी विकास लिम्बूलाई पनि उपचारको लागि ७५ हजार ५ सय ८१ रुपैया सहयोग प्रदान गरेका थिए । उनीहरुले विद्यालयका प्राचार्य राईलाई संयुक्तरुपमा नगद हस्तान्तरण गरेका थिए । पूर्नस्थापना गृह र विरामी पूर्वविद्यार्थी लिम्बूलाई सहयोग जुटाउन धरानबाट फुलसरी राई, मञ्जु राई, प्रविण राई, केशव राई तथा हङकङबाट सुमी लिम्बू, बेलायतबाट आजु राई, अर्जुन राईलगायतले बिशेष पहल गरेका थिए ।

यस्तै, ज्वाइन ह्याण्डस् सेभ लाईफ नामक सामाजिक संस्थाले पनि गृहका बालबालिका एवं वृद्धहरुलाई दशैंको लत्ताकपडा प्रदान गरेको थियो भने धरान १६ निवासी कमल रिजालले दशैंको कपडा र एक महिनाको राशन पानीको लागि नगद १२ हजार रुपैया प्रदान गरेको गृह प्रमुख भिम राईले बताए । ‘अरुबेला जेजस्तो भएपनि दशैंमा बच्चाहरुले न्यास्रो मान्छन्, यसरी तपाईहरु आइदिएर खुशी बाड्दा यी बच्चाहरुलाई पनि हाम्रो आफन्तजन छन् भन्ने महसुस हुन्छ’–उनले भने । गृहमा २२ जना असहाय एवं अशक्त बालबालिका एवं वृद्धहरुले आश्रय पाएका छन् ।