‘सफारी वक’ गर्दै सिम्सुवा झरना पुग्ने नयाँ रुट

धरान । भेडेटार पुगेका पर्यटकहरुको पछिल्लो समय रोजाईको गन्तव्य बन्यो, भेडेटारबाट ९ किलोमिटर दुरीको सिम्सुवा(नमस्ते) झरना । कोशी राजमार्गको धरान–धनकुटे सडकखण्डको अम्बोटे(नमस्ते मोड) पुगेपछि करिब पर्यटकहरु १५ मिनेट पैदल हिड्नुपर्छ ।
राजमार्ग छोडेपछिको त्यही १५ मिनेट पदयात्रा पर्यटकहरुको लागि कष्टकर थियो । निक्कै साघुरो र भीरको अफ्ठेरो बाटो हुदै सिम्सुवा खोला तरेर पुनः चट्टानमा सम्हालिदै उकालिनुपथ्र्यो । दुई ठाउँमा त बाँसको भर्याङबाट चढ्नुपथ्र्यो । बर्षा लागेपछि त्यही बासको भर्याङ पनि खोलाले बगाउथ्यो । ‘एडभेञ्चर पदयात्रा’ मन पराउने पर्यटकलाई त ठिकै हुदो हो, प्रकृत्तिसँग रमाउने मुडमा पुगेकाहरुलाई भने निक्कै दःख हुन्थ्यो । खासगरि तराईका र भारतीय महिला पर्यटक, बालबालिकाहरु त्यसरी हिड्न डराउथे । तर, अब भने झरना पुग्न पर्यटकहरुले विगतमा झै सास्ती भोग्नु पर्नेछैन ।

पर्यटकहरुलाई झरनासम्म पुग्न सहज होस् भनेर रेलिङसहितको पक्की बाटो बनिदैछ भने झरनासम्म पुग्न ६० मिटर तल पुल निर्माण हुदैछ । पुल बनेपछि झरना पुग्ने बाटो फेरिनेछ । पर्यटकहरु सफारी वक(जंगल यात्रा)मा रमाउदै सजिलै झरनासम्म पुग्नेछन् । पहिला बाँसको भर्याङ भएको स्थानमा फलामे भर्याङ बनिसकेको छ । पर्यटकहरुलाई झरनासम्म आउ जाउ गर्न सजिलो बनाउन बाटो, पुल, भर्याङलगायत सुविधायुक्त संरचनाहरु निर्माण भइरहेको सिम्सुवा नमस्ने झरना सरसफाई व्यवस्थापन समितिका अध्यक्ष दिलिपकुमार लिम्बुले बताए । ‘पुल बनेपछि झरना पुग्ने बाटो फेरिन्छ, जंगल सफारी गर्दै चेञ्जिङ रुम पुगेर फेरि खोला हुदै झरना पुगिन्छ । खोलामा पनि फलामे भर्ङ बनाइसकेकोले सजिलो छ’–अध्यक्ष लिम्बूले भने । उनका अनुसार दुई साताभित्र पुल निर्माण कार्य सकिनेछ र नयाँ रुटबाट पर्यटकलाई झरना पुग्न खुला हुनेछ । साहसिक यात्रा गर्न रुचाउनेको लागि भने पुरानो बाटो खुला नै रहने समितिले जनाएको छ ।
समितिका अनुसार जिविस धनकुटाले सिम्सुवामा पुल बनाइदिदै गरेको हो भने गत बर्ष नै पर्यटकहरुलाई झरनामा खेल्न, नुहाउन सजिलोको लागि चेञ्जिङ रुम बनाइदिएको थियो । यो बर्ष २ सय २६ मिटर लम्बाईको रेलिङसहितको बाटो पनि निर्माण हुदैछ । सिम एनले शौचालय बनाइसकेको छ । झरनास्थलमा पर्यटकहरुको सुरक्षाको लागि ढुंगा झरेर नलागेस् भनेर तारजालीले छेक्ने काम पनि भइरहेको समिति सदस्य कुमार सुब्बाले बताए । ‘सुविधासँगै घुम्न आउने पर्यटकहरुको सुरक्षामा पनि ध्यान दिएका छौं, बैशाख १२ को भुकम्प पछि १५ दिन बन्द गरेर झरनाको मुहान रहेको जंगल सर्च गरेर लड्न लागेको ढुंगाहरुलाई पनि हटाइसकेका छौं’–उनले भने । सिम्सुवा झरनामा ०६८ सालदेखि छिटफुटरुपमा पर्यटकहरु जान थालेको हो । यो झरना छोटो समयमै चर्चित र धेरै पर्यटक पुग्ने पर्यटकीय गन्तव्यमध्येमा पहिलो भएको पर्यटनकर्मीहरुको भनाई छ । झरनास्थल पुग्न सुविधा थपिदै गएपछि भेडेटार पुग्ने पर्यटकहरुको गन्तव्य झरना हुदै गएको छ ।

                           झरनामा क्यानोनिङ र जिप लाइन

भेडेटार गाविस ३ र ४ को सिमानामा अवस्थित सिम्सुवा(नमस्ते) झरनामा व्यावसायिकरुपमा क्यानोनिङ र जिप लाइन पनि शुरु हुन लागेको छ । दुवै साहसिक खेललाई धरानस्थित तमोर रिभर र्याफ्टिङ प्रालिले शुरु गर्न लागेको हो । प्रालिका सञ्चालक मदन ढकालका अनुसार खेलको लागि झरनास्थलमा रड फिक्स भइसकेको छ । ‘प्रालिका गाइड सेतुमान गुरुङलाई तालिम गराएका छौं, क्यानोनिङ शुरु भइसकेपनि औपचारिकरुपमा घोषणा गर्नमात्रै बाँकी हो । जिविसले उद्घाटन गर्ने पर्खाइमा छौं’–ढकालले भने ।
प्रालिका अनुसार झरनाको माथिबाट डोरीमा झुण्डेर पानीमा रुझ्दै तल झर्ने साहसिक खेल हो क्यानोनिङ । यस्तै, एक रुखदेखि अर्को रुखमा बाँधिएको डोरीमा हिड्ने खेल हो जीप लाइन । तीन हजार प्याकेजमा धरानबाट यातायात, खानासहितको व्यवस्था इच्छुक पर्यटकहरुलाई यी खेल सुविधा उपलब्ध हुनेछ । क्यानोनिङको लागि सिम्सुवा नमस्ने झरना सरसफाई व्यवस्थापन समितिले चेञ्जिङ रुमदेखि झरनाको शिर(टुप्पा)सम्म पुग्न बाटो बनाइदिएको छ । रुमदेखि ५९० मिटर जति हिडेर झरनाको शिर पुगिने समितिका अध्यक्ष लिम्बूले बताए । क्यानोनिङ शुरु भएपछि पर्यटकहरुको सख्या झनै थपिने उनले आशा जनाए ।