पुस्तकालय उद्घाटनमा पूर्वप्रअ र पत्रकारलाई सम्मान

धरान । अभिभावक एवं विभिन्न दाताहरुको सहयोगबाट धरान १७ स्थित श्री निम्म माविमा निर्माण भएको पुस्तकालयको उद्घाटन गरिएको छ । विद्यालयले मंगलबार आयोजना गरेको एक समारोहमा प्रमुख अतिथि एवं भाषाविद् डा.टंक न्यौपानेले पुस्तकालयको उद्घाटन गरेका हुन् ।
विद्यालयको तेस्रो तल्लामा निर्माण गरिएको पुस्तकालय समुदाय, अभिभावक एवं शिक्षकहरुको आर्थिक सहयोगबाट निर्माण गरिएको प्रध्यानाध्यापिका निर्मला राईले जानकारी दिइन् । उनका अनुसार ६ लाख २८ हजार ९ सय ३२ रुपैयाको लागतमा पुस्तकालय तयार भएको हो । पुस्तकालय निर्माणको लागि न्युनतम ५ हजार रुपैयादेखि ६० हजारसम्म स्थानीयबाट आर्थिक सहयोग प्राप्त भएको प्रअले बताइन् । ‘विद्यालय र पुस्तकालय निर्माणमा समुदाय, शिक्षक सबैको ज्यादै अतुलनीय योगदान रहेको छ’–प्रअले भनिन्–‘विद्यार्थीहरुको पठनपाठन सहज बनाउन र गुणस्तरी शिक्षा दिलाउन यहाँ ज्ञानवद्र्धक पुस्तकहरु राख्नेछौं ।’

विद्यालय प्रशासनले दिएको जानकारी अनुसार अभिभावक एवं समुदायबाट कुल ५ लाख ५६ हजार ४ सय ५२ रुपैया आर्थिक सहयोग जुटेको थियो । यस्तै, शिक्षक कर्मचारीहरुबाट एक लाख १० हजार २ सय ९२ रुपैया संकलन भएको थियो । विद्यालयले व्यावस्थापन समितिका सल्लाहकार प्रकाश राईको संयोजकत्वमा ५ सदस्यीय पुस्तकालय निर्माण समिति गठन गरेर गत पुषदेखि पुस्तकाल निर्माण कार्य शुरु गरेको थियो । निर्माण कार्य गत असार मसान्तमा सम्पन्न भएको र पुस्तक राख्ने र्याक एवं पुस्तकहरु क्रमशः जुटाउने योजना रहेको समितिका संयोजक राईले बताए । ‘पुस्तकालयमा खासगरि बालबालिकाहरुलाई फाइदा पुग्ने ज्ञानवद्र्धक पुस्तक, बाल साहित्यहरु संकलन गरिनछ’–उनले भने । यो विद्यालयमा हाल समुदायका ३ सय ७५ जना विद्यार्थीहरु अध्ययनरत छन् ।
....

                           संस्थापक प्रअ र पत्रकार सम्मानित

धरान १७ स्थित निम्न माध्यमिक विद्यालयले विद्यालयका संस्थपाक पूर्व प्रध्यानाध्यापक टेकबहादुर राई र पत्रकार जनकऋर्षि चाम्लिङलाई सम्मान गरेको छ ।
विद्यालयमा मंगलबार आयोजित पुस्तकालय उद्घाटन समारोहमा पूर्वप्रअ राई र पत्रकार चाम्लिङलाई सम्मान गरेको हो । समारोहमा विद्यालयकी प्रअ निर्मला राई र प्रमुख अतिथि एवं भाषाविद् डा.टंक न्यौपानेले सम्मानपत्र सहित ढाका टोपी र दोसल्ला ओढाएर सम्मान गरेका थिए ।

पूर्वप्रअले विद्यालयको संस्थागत विकासमा पुर्याएको योगदानको कदर गर्दै सम्मान गरेको विद्यालयले जनाएको छ । यस्तै, विद्यालयका पूर्व विद्यार्थी र पूर्वशिक्षकसमेत रहेका चाम्लिङले पत्रकारिता क्षेत्रमा पुर्याएको योगदानको कदर गर्दै सम्मान गरेको विद्यालयले जनाएको छ । कार्यक्रम विद्यालय व्यावस्थापन समितिका अध्यक्ष नरबहादुर थापाको अध्यक्षतामा सम्पन्न भएको थियो ।