रगत नपाएका विरामी बचाउदै बीपीका विद्यार्थी

धरान । ओ पोजेटिभ त्यति दुर्लभ रक्त समुह होइन, तर एकै पटक सात पिन्ट रगत खोज्नु मुगा ९, धनकुटाका नीरबहादुर पुरीको अवस्था निक्कै दयनीय हुन्छ । माइलो छोराको उपचारको लागि प्रत्येक महिना कम्तीमा ७ पिन्ट ओ पोजेटिभ समुहको ताजा रगत चाहिन्छ । त्यसमाथि, बेला बेला हुने रगत अभावले उनलाई थप आहत पार्ने गरेको छ ।
यस्तो बेला उनको लागि एउटै सहारा बनेको छ, बीपी कोइराला स्वास्थ्य विज्ञान प्रतिष्ठानमा अध्ययनरत विद्यार्थीहरु । प्रतिष्ठानमा विभिन्न संकायमा अध्ययनरत विद्यार्थीहरुको स्टुडेन्टस् ब्लड डोनेशन कमिटिले केही महिनायता आकस्मिकरुपमा उनको छोरालाई रगतको जोहो गरिदिदै आएको छ । ‘उहाँहरुले धेरै सहयोग पुर्याउनु भएको छ, मेरो लागि त ढुंगा खोज्दा देउता मिले जस्तै भएको छ’–शनिबार रगतको पोको बोक्दै पुरीले भने । उनको माइलो छोरा आनन्दलाई एक्युट मायलोसाइटिक ल्युकेनिया नामको ब्लड क्यान्सर छ ।
प्रतिष्ठानमा उपचारमा आएका विरामीहरुलाई आवश्यक रगत कतैबाट जुट्न सकेन भने ब्लड बैंकले नै डोनेशन कमिटिलाई सम्पर्क गराउछ । कमिटिका नेतृत्वले आवश्यक ब्लड गु्रपका विद्यार्थी पठाइदिएर सहयोग पुर्याइदिने गरेको प्रतिष्ठानस्थित रेडक्रसको रक्तसञ्चार केन्द्रका प्राविधिक सोमनाथ भण्डारीले बताए । ‘विरामीको अवस्था हेरेर विद्यार्थीको कमिटिलाई सम्पर्क गरिदिन्छौं, विद्यार्थीहरु आफै आएर रगत दिन्छन्’–भण्डारीले भने ।
रगत अभावले विरामीहरु छटपटिन थालेपछि १२ बर्षअघि प्रतिष्ठानमा अध्ययनतर विद्यार्थीहरुले कमिटि गठन गरेका थिए । सन् २००० मा गठत भएको यो कमिटिले बर्षेनी ६ सय बढी पिन्ट रगत विरामीहरुलाई आकस्मिकरुपमा सहयोग गर्दै आएको छ । त्यसबाहेक, यो कमिटिले बर्षेनी २ पटक रक्तदान कार्यक्रम गर्दै आएको अध्यक्ष रोहित कर्णले बताए । ‘एकदमै आवश्यक परेका डेलीभरी, सर्जरी, दुर्घटनामा परेका विरामीलाई फ्रेस चाहिएमा र दुर्लभ रक्त समुहकालाई रगतको खाँचो परेपछि ब्लड बैंकबाट खबर आउछ, अनि सम्बन्धित रक्तसमुहका साथीलाई पठाइदिन्छौं’–अध्यक्ष कर्णले भने ।
विरामीको प्रत्यक्ष रेखदेखमा रहेका नर्सिङका विद्यार्थीहरुले रगतको अभावले विरामीलाई सास्ती भोगेको देखेपछि शुरुवातमा कमिटि गठनको पहल गरेका थिए । कमिटिमा नर्सिङ, एमबिबिएस, बिडिएस, बिएमएलटि, बिएमआइटि अध्ययनरत विद्यार्थीहरुसँगै रेसिडेन्ट डक्टर र फ्याकल्टी स्टाफहरुसमेत गरि हाल दुई हजार बढी संगठित छन् । कमिटिले सबैको नाम, ब्लड ग्रुप र सम्पर्क नम्बरसहित लिष्ट बनाएर राखेको छ । नयाँ विद्यार्थी भर्ना भएलगत्तै लिष्टमा अद्यावधिक गरिन्छ । ‘हामीसँग सबै विद्यार्थी, रेसिडेन्ट र फ्याकल्टी स्टाफहरुको नम्बर र ग्रुप छ, कसैलाई अति नै खाँचो भएपछि हामीलाई सम्पर्क गर्छन्, अनि हामी सहयोग गछौं’–अध्यक्ष कर्णले भने ।
                                                    ......................

               ५१ पिन्ट रगत संकलन

धरान । सबैको ध्यान संविधासभाको निर्वाचन र मतपरिणाममा केन्द्रीत हुदा भएको रगत अभाव कम गर्न शनिबार बीपी प्रतिष्ठानस्थित विद्यार्थीहरुको ब्लड डोनेशन कमिटि र द आर्ट अफ लिभिङले रक्तदान एवं निःशुल्क ब्लड ग्रुपिङ कार्यक्रम आयोजना गरेको छ ।
भानुचौकस्थित लोकतान्त्रिक चौतारीमा आयोजित कार्यक्रममा ५१ पिन्ट रगत संकलन भएको थियो । रक्तदानमा प्रतिष्ठानको ब्लड बैंक र रेडक्रसको ब्लड बैंकले प्राविधिक सहयोग पुर्याएको ब्लड डोनेशन कमिटिका अध्यक्ष रोहित कर्णले जानकारी दिए ।

(०७० मंसिर ९ को नागरिक दैनिकमा प्रकाशित)